2 Yamwene 25 - Amazwi Yakwe Leza 2013

Ukuwa kwa musumba wa Yelusalemu

¹ Zedekiya wasusile asangukila umwene Nebukadineza. Fwandi lyene Nebukadineza ala pakukatuka ni vita vyakwe vyonsi uku kwiza lwisya umusumba wa Yelusalemu. Cali apa wanda walenga ikumi uwa mwezi uwalenga ikumi, umu mwaka wakwe fundimbali uwa kuteeka kwakwe Zedekiya. Yizile yakuula insakwe zyao ukunzi ya musumba, yauzinguluka, yatulika imitumba yiivu iya kulwisizya anisi yao.

² Ivita vivi vyazingulwike umusumba ulya ukufika nu mu mwaka walenga ikumi na onga uwa wene wakwe Zedekiya.

³ Apa wanda walenga fundimbali umu mwezi wakwe cini, uwa mwaka kwene uwa, nupya lilyo ala kwapona icipowe icakuti kutali nanti icakulya nanti cimwi cino antu yangalya.

⁴ Alino ilinga lya musumba lyaongolwike. Lelo nanti ivita vya ina Babiloni vyazingulwike umusumba, umwene Zedekiya pamwi ni vita vyakwe yapuusile apa nsita ya usiku. Apa kupuuka yalondile inzila iyalungama uku calo ca mwene nu kwiza pitilila apa mpongolo iyayela apakasi ka viumba viili, nu kulungama uku mukonko wa Yodani.

⁵ Lelo ivita vya ina Babiloni vizinganya umwene Zedekiya, nu kuya mulemela uku lunyika lwaku Yeliko. Ni vita vyakwe vyonsi ivisaata nu kusaata.

⁶ Walanga yalema umwene Zedekiya, iyamutwala ku mwene Nebukadineza, wino wali mu musumba wa Libula. Ali kuno Nebukadineza waile aputwila Zedekiya umulandu.

⁷ Alino Nebukadineza akoma ana aonsi yakwe Zedekiya apa manso yakwe Zedekiya. Alino Nebukadineza atonkola Zedekiya amanso, amunyepa mu minyololo, nga amusenda uku Babiloni.

Vino aina Babiloni yononyile Ng'anda ikulu yakwe Yawe

⁸ Uwanda walenga cinimbali uwa mwezi walenga cisano, uwa mwaka walenga ikumi na fundimbali, uwa kuteeka kwakwe Nebukadineza umwene waku Babiloni, Nebuzaladani musika mukulu uwa vita vyakwe umwi uwali a mpandamano wakwe, aingila umu Yelusalemu.

⁹ Alino aoca Ng'anda ikulu yakwe Yawe, nga aoca ni sano kumwi na mang'anda ya antu yonsi acindame amu Yelusalemu.

¹⁰ Lyene ivita vyakwe, ivyatungululwanga na musika mukulu uwa vita, iyatulola ilinga lya musumba ulya uwa Yelusalemu.

¹¹ Alino Nebuzaladani, musika mukulu uwa vita wilya, asenda antu yonsi asiile, ayatwala uku Babiloni, kumwi na yamfundi yonsi asiile, nga na yayo yonsi yano walanga yapuukila mpiti ku ina Babiloni.

¹² Lelo musika mukulu uwa vita wilya asya sile alanda yatupu umu mpanga ilya yakwe Yuda, yao atakweti icuma nanti cimwi. Ayano aika umu kuomba umu vyalo vya miolivi ni vyalo vyuze.

¹³ Ivita vya ina Babiloni vyatamozile incesi ya vyela zyamu Ng'anda ikulu yakwe Yawe. Ivitamola ni ngolofwani izyali mwenemo kumwi ni tanki likalamba. Lyene yasenda nu mukuwa onsi ku Babiloni.

¹⁴ Iyasenda yafosyolo yonsi ni viombelo vyonsi vino yaomvyanga apakuzyolela itwi apa kavuwa. Iyasenda nu tunkolonkolo tonsi tuno yaomvyanga apa kukozezya inyali, ni viya vino yatengelezyanga pa kuzwisya uwazi uku nyama zino yafyulanga pa kupeela impolelwa. Alino ni mbale zino yaomvyanga apa kocela ubani. Alino ni viya vyonsi ivya mukuwa vino yaomvyanga umu mulimo uwamu Ng'anda ikulu yakwe Yawe.

¹⁵ Musika mukulu uwa vita asenda ni vifutikilo ni mbale muno mwazwilanga uwazi uwa mpolelwa alino na vyonsi ivyapingilwa na zaabu na siluva.

¹⁶ Ivyela vya mukuwa vino Solomoni wapanzile vyamu Ng'anda ikulu yakwe Yawe, ivili wa ncesi ziili, intontoka, itanki likalamba, vyali ivinyome sana vino umuntu atangapima.

¹⁷ Incesi zizyo ziili zyakoline sana. Longa lwali amamita cinani umu utali, na kakupiko ka mukuwa apapela kano kali mita wenga na citika mu utali. Ukuzinguluka akakupiko konsi, yakazifizye ningo sana ni viyembelo ivipombane ivikoline ni viseekwa ivya pomegeleneti. Navyo ale vipanzilwe ni cela ca mukuwa.

Aikazi amu Yuda yasendwa uku Babiloni

¹⁸ Nga ukulunda penepo, Nebuzaladani umukalamba wakwe yakalinda ya mwene waku Babiloni wasenzile Selaya Simapepo Mukalamba, Zefaniya simapepo uwalondelile penepo mu ukalamba muli usimapepo. Ukwika penepo nayauze yatatu yakalinda ya Ng'anda ikulu yakwe Yawe.

¹⁹ Umu musumba ulya, wene wasenzile umuntu wenga uwali umukalamba wa vita nga asenda mwenemo na antu yasano yampandamano ya mwene. Alino asenda mwenemo nu walondelela umukalamba wa vita uwasunganga impapulo umwalemvilwe imilandu ya nkondo. Asenda na acindami amakumi mutanda.

²⁰ Nebuzaladani, musika mukulu uwa vita wilya, ayasenda yonsi pyu nu kuyatwala uku mwene waku Babiloni, wino apa nsita iyo wali uku musumba wa Libula.

²¹ Kuku kwene uku Libula, umu mpanga yaku Hamati, akuno umwene wiyo apeela ilamulo kuti yayakome. Nayo ali pakuyuma nu kuyakomola. Ali vino aikazi yaku Yuda yayafumizye umu mpanga yao nu kuyasenda umu uzya.

Gedaliya umulasi waku Yuda

²² Nebukadineza umwene waku Babiloni uwasonsile Gedaliya umwana wakwe Aiikamu, nupya umwizikulu wakwe Syafani, kuti aye umulasi waku Yuda, apakuti asunga antu yano yasiile ukwaula kusendwa uku Babiloni.

²³ Intunguluzi zyonsi zyaku Yuda na akalamba ya vita, yayo yonsi akanyile uku cimbila aina Babiloni, lino yuvwa umulandu uo, ali pakuya kuli Gedaliya, uwali ku Mizipa. Antu yayo yali a Isumeli umwana umonsi wakwe Netaniya, Yoanani umwana umonsi wakwe Kaleya, na Selaya umwana umonsi wakwe Taniumeti uwaku Netofa, na Yazaniya umwana umonsi wa mwina Maaka, pamwi na antu yao kwene.

²⁴ Gedaliya nawe ali pakuyalaya nu mulapo ati, “Mwemo mutalinzile ukoopa intunguluzi zyaku Babiloni. Lelo mwikale sile mukwene muno mpanga. Mwaombela nu mwene waku Babiloni, nga mumalola ukuti ivintu vyonsi vyaya sile ningo kuno muli.”

²⁵ Lelo walanga wafika umwezi walenga cinimbali, Isumeli umwana umonsi wakwe Netaniya, umwizikulu wakwe Elisyama, uwali uwaku wene, waile uku Mizipa apali ponga na antu ikumi lyonga nu kuya zanza Gedaliya, iyamukoma nga iyakoma na ina Izlaeli pamwi na ina Babiloni yano yali nawe, mpaka afwa.

²⁶ Alino aina Izlaeli akama pamwi na apina, ukwikapo na akalamba ya vita kwene, yonsi iyapuukila uku Eguputo, apamulandu wa koopa aina Babiloni.

Yeoyakini wafuma umu ng'anda yaminyololo

²⁷ Mu mwaka uwalenga amakumi yatatu na cinimbali ukufuma pano Yeoyakini umwene waku Yuda wasenzilwe umu uzya, uli mwaka uno Evili Melodaki yamulasike apa wene waku Babiloni. Wene wizile akwatila Yeoyakini amizu, nu kumufumya mu ng'anda yaminyololo. Nu wanda uno wene wamufumizye mu ng'anda yaminyololo, uli wanda uwalenga amakumi yaili na cinimbali, umu mwezi uwalenga ikumi na iili, umu mwaka kwene ulya.

²⁸ Evili Melodaki atamucuzyanga foo. Wamupile nu mucinzi ukulu sana apa wene wakwe ukuluta vino wacindike yamwene yonsi yano yali nawe umu Babiloni.

²⁹ Fwandi Yeoyakini ali pakuzula ni vyakuzwala vya ukaili, nu kulya alya ivyakulya pali ponga nu mwene, amanda yonsi yano watenzi pano nsi.

³⁰ Amanda yonsi ukusinta na pano wizile afwila, umwene Evili Melodaki wamupeelanga ivintu vyonsi vino walondanga kuti angakwata mu wikazi wakwe.