2 Yamwene 24 - Amazwi Yakwe Leza 2013

¹ Lino Yeoyakimu wali apa wene, Nebukadineza umwene waku Babiloni, wazanzile impanga ya Yuda. Yeoyakimu ali pakutontela Mwene Nebukadineza apa myaka itatu, nu kwiza musangukila nupya.

² Yawe ali pakutumila Yeoyakimu ivita vya nkondo ukufuma uku Babiloni, uku Asilya, uku Moabu, pamwi ni vya ina Amoni, apakuti viye vikonone impanga ya Yuda, wakwe muno yakasema, aomvi yamwene yalandile ukuti ali muno Yawe alacitila.

³ Cumi kwene ivintu vii vyacitikile aikazi amu Yuda ukulingana ni lamulo lya Mwene, pasi pano Yawe walondanga ukutazyela aikazi amu Yuda apamulandu nu utalami wao uwa vicitwa viipe vino umwene Manase wasiile wayaletelela.

⁴ Makamaka apamulandu uwa uno wakomile antu akaele umu Yelusalemu. Apamulandu uo, awe kwene Yawe wene atalondanga nanti panono ukuyakwatila uluse.

⁵ Ivintu vyuze vyonsi vino Yeoyakimu wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Yuda.

⁶ Lyene Yeoyakimu asuka afwa, nga yamuzika. Alino Yeoyakini umwana wakwe umonsi amupyana pa cilimba ca wene.

⁷ Alino umwene waku Eguputo ni vita vyakwe atatazile nupya afume ku Eguputo, pamulandu wakuti umwene waku Babiloni ali wino wateekanga impanga yonsi ino mpiti yali iya ina Eguputo, iyatandikile sile uku Luzi lwa Yufulate ukupelela nu ku mupaka uwayela ku katutu kaku Eguputo.

Yeoyakini umwene waku Yuda

⁸ Yeoyakini wali ni myaka yakuvyalwa ikumi na cinani apa nsita ino watandike ukuteeka, nga wateesile mu Yelusalemu imyezi itatu. Nyina wali a Neusyita, umwana wakwe Elinatani. Nupya wafumile umu Yelusalemu kwene.

⁹ Yeoyakini wifyanga pa manso yakwe Yawe, ndi vino isi wacitanga.

¹⁰ Cali apa nsita ilya kwene iya uteko wakwe Yeoyakini lino Nebukadineza watungulwile ivita vya ina Babiloni ku kuzinguluka umusumba wa Yelusalemu nu ku uzanza.

¹¹ Lino ivita vyakwe vicizingulwike umusumba wa Yelusalemu, Nebukadineza umwisikulu ali pakwiza ku Yelusalemu.

¹² Alino lyene umwene Yeoyakini pamwi na nyina, na ana yakwe, ni nkombe zyakwe zya kwisano kwene, iyiza yacimba ku ina Babiloni. Mu mwaka wakwe cinani uwa kuteeka kwa mwene waku Babiloni, umwene Nebukadineza asenda Yeoyakini umu uzya.

¹³ Nebukadineza ali pakusenda ni vyuma vyonsi vyakwe zaabu ivyali umu Ng'anda ikulu yakwe Yawe vino Solomoni umwene waku Izlaeli wapanzile, ni vyali mwi sano kwene. Alino avitwala ku Babiloni.

¹⁴ Nebukadineza ali pakusenda na ikazi yamu Yelusalemu kwene, kuli kuti yacilolo yakwe na asilika yonsi, nga na yafundi ya milimo. Yonsi pamwi yafisile uku mpendwa ukulingana amazimbi ikumi. Wene wasendenkinye kumwi na antu yonsi alamoke, ali wakwe yakasula. Lelo asya sile apina yatupu umu mpanga yakwe Yuda.

¹⁵ Nebukadineza asenda na Yeoyakini kwene umu uzya uku Babiloni. Asenda na nyina uwa mwene, na aci yakwe, ni nkombe zyakwe, na antu amaka amu mpanga ilya.

¹⁶ Nebukadineza asenda na antu yacindame ku Babiloni. Yonsi pamwi iyafika uku mpendwa ukulingana amazimbi cinimbali, akome ku ulwi, ukwika penepo ni zimbi lyonga lyakwe yamfundi ya milimo ipusanepusane pamwi na yakasula ya vyela. Fwandi tuti iyasenda antu ya mpomvu yayo angalwa inkondo.

¹⁷ Nebukadineza asonta na Mataniya, umwina wakwe isi wakwe Yeoyakini ukuti awino aye umwene waku Yuda. Alino asenula ni zina lyakwe ati a Zedekiya.

Zedekiya umwene waku Yuda

¹⁸ Zedekiya wali ni myaka yakuvyalwa amakumi yaili na onga apa nsita ino watandike ukuteeka mu Yuda, nga wateesile mu Yelusalemu imyaka ikumi na onga. Nyina wali a Hamutali, umwana wakwe Yelemiya. Wene wali uwaku Libina.

¹⁹ Mwene Zedekiya waifizye kuli Yawe, ndi vino umwene Yeoyakimu wacisile.

²⁰ Yawe Leza wasokile antu amu Yelusalemu kumwi na yonsi amu Yuda, cakuti aleka kuti yataloleka uku manso yakwe. Lyene Zedekiya akatukila umwene waku Babiloni.