2 Yamwene 23 - Amazwi Yakwe Leza 2013

Umwene Yosiya watamola incende zyakupepela mwenemo utuluwi

¹ Umwene Yosiya wakonganike intunguluzi zyonsi zyamu Yuda nu mu Yelusalemu.

² Yonsi pamwi ali pakuya ku Ng'anda ikulu yakwe Yawe, kumwi na yasimapepo na yakasema, na antu yonsi aku Yuda na amu Yelusalemu, akama na apina kwene. Yosiya ali pakuwelengela antu amazwi yonsi amu Lupapulo lwa upangano, luno yazanyile mu Ng'anda ikulu yakwe Yawe.

³ Lilyo ale Yosiya aimilile mu lucesi luno yasimapepo yimililanga mwenemo. Ali pakucita upangano uwa kutontela Yawe, nu kuyela amasunde ni vyeo vyakwe, nu mwenzo wakwe onsi, na mano yakwe yonsi, na maka yakwe yonsi. Alino nu kwika vyonsi umu vicitwa ndi vino calembwa mu lupapulo kwene lulwa. Antu yonsi nayo ali pakuzumilizya ukulondela upangano uwa.

⁴ Nga lyene Yosiya anena Simapepo Mukulu Hilikiya, na yasimapepo alondelela penepo, na yakalinda ya pa mulyango wa Ng'anda ikulu yakwe Yawe, yao ali apa ncito kuti yangafumya iviya vyonsi umu Ng'anda ikulu yakwe Yawe, ivyaomviwanga apa kupepa Baali, na Asyela, ni ntanda. Yosiya ali pakuvisenda vyonsi nu kuyavyocela ukunzi ya musumba umu pipi ni Cifoloma ca Kiduloni. Alino atoola itwi lyonsi pyu, nga alitwala uku musumba wa Betele.

⁵ Yosiya azinga pali usimapepo, yasimapepo yonsi yano yamwene aku Yuda yasonsile, yao aocelanga ubani pa tuvuwa umu ncende zyakupepela mwenemo utuluwi izyayelile mu misumba yaku Yuda kumwi ni zyali umu ncende izingulwike Yelusalemu. Fwandi tungati aya simapepo yonsi aocelanga Baali ubani, na yao kwene aocelanga ilanzi ubani, pamwi nu kocela mwezi, ni vintu vyuze ivya mulwelele, pamwi ni ntanda.

⁶ Yosiya afumya nu lucesi lucindamisye umu Ng'anda ikulu yakwe Yawe, luno yapepanga apa kucindika Asyela. Nalo kwene alusenda ukunzi ya musumba nu kulutwala uku Cifoloma ca Kiduloni, akuno yaya yalocela. Ni itwi alisansantila apapela ya malindi kuno yakazika umuntu ali wensi.

⁷ Atamola ni miputule iyali mu Ng'anda ikulu yakwe Yawe, muno mwikalanga aonsi acende na anaci yacizelele. Umu miputule iyo kwene amuno anaci yapikwilanga imingila ino yaomvyanga apa kupepa Asyela.

⁸ Yosiya ali pakuswilizya yasimapepo umu Yelusalemu, yao yonsi yano yali umu misumba yamu Yuda. Alino atamola ivintamba vyonsi ivyali umu ncende zya kupepela mwenemo utuluwi, ukutandikila ku Geba mpaka ukufika nu ku Belisyeba, kuko kuno yasimapepo yocelanga ubani. Atamola nu tuvuwa pano yocelanga imbuzi uku tuluwi, tuno twali umu pipi na pa wingililo wa mpongolo yakwe Yoswa, ino umulasi wa musumba wakuuzile, izyayelile lwa kwimani ya mpongolo ikalamba ya wingililo wa musumba.

⁹ Yasimapepo yayo yatakweti insambu iya kuomba umu Ng'anda ikulu yakwe Yawe mu Yelusalemu. Lelo kwene insambu ya kulya imikate yaulamo citutumusi yakweti, kuli yasimapepo yauze.

¹⁰ Umwene Yosiya watamozile ni ncende yaku Tofeti. Yali incende iyayelile uku Cifoloma ca Beni Hinomu. Wacisile vivyo pakuti kutakatale nupya kukaye umuntu uwakocela umwana kaci nanti kalume wa mpolelwa kuli ka leza kaluwi ka Moleki.

¹¹ Yosiya afumya ni mfwalasi zino yamwene aku Yuda yatuzile apa kupepa ilanzi nu koca amaceleta yano yaomvyanga. Vyonsi vivyo, vyasungilwanga umu musolo wa Ng'anda ikulu yakwe Yawe, pipi ni ng'anda yakwe Natani Meleki, umwi apa nkombe zikalamba.

¹² Utuvuwa tuno yamwene aku Yuda yakuuzile apapela yi sano lya mwene Aazi, Yosiya wene watutamozile. Atamola kumwi na vino Manase wakuuzile, umu misolo yoili kwene yaku Ng'anda ikulu yakwe Yawe. Atamola utuvuwa nga aya asumbila iviunguluwe uku Cifoloma ca Kiduloni.

¹³ Yosiya aomola incende zyaku pepela mwenemo utuluwi utwayelile lwaku ufumondaka wa musumba wa Yelusalemu lwaku kaeya ka mwamba ukaamwa ukuti Mwamba wa Miolivi, muno yapepelanga utuluwi twawinyi utuli wakwe Asyitaloti, kaleza kanaci aka ku Sidoni, Kemosyi, kaleza kaku Moabu, na Moleki, kaleza ka ina Amoni.

¹⁴ Umwene Yosiya nupya atamola nu lucesi lwa mawe luno yimike nu kukomola ulucesi lwa unkolanya wakwe Asyela luno lwali ulucindame sana, nu kukolana lwakoline nu mwanaci. Aluno yapepanga pa kumucindika wakwe Leza wao. Na payelile ivintu vivyo, Yosiya aimika penepo amafupa ya antu.

¹⁵ Yosiya wononyile ni ncende ya kupepela mwenemo utuluwi, iyayelile mu musumba wa Betele, ino Yeloboamu umwana wakwe Nebati wakuuzile. Yeloboamu wiyo uwalenzile ukuti aina Izlaeli yonsi nayo yaifya. Yosiya atamola utuvuwa tonsi, kumwi namawe kwene yano yakuulile ayasyunola nu kuyasyunola. Nupya ayoca kumwi nu lucesi ulu cindame sana luno yaomvyanga apa kupepa Asyela.

¹⁶ Lino Yosiya wacelecensya amanso, alola amalindi yamwi pa mwamba. Ali pakutuma antu akuyasenda amafupa, apakuti yize yocele pamwi apa kavuwa kaka. Fwandi ali vino yacisile apa kukowezya kavuwa kaka. Wene acita kwati avino kasema umwi wasemile mpiti, lino kwali uwanda ukulu umwi, ale umwene Yolamu aimilile umupipi na kavuwa. Nupya kwene lino Yosiya wacelecensya amanso, alola ilindi lyakwe umwi uwali kasema uwasemile amazwi kwene yayo.

¹⁷ Yosiya ali pa kuuzya ati, “Uzye ilindi lii, ilyakwe weni?” Aina Betele nayo yaasuka yati, “Ilindi lyakwe kasema umwi uwaku Yuda, wiyo uwasesime vino wewe kwene watucita uku kavuwa kaa.”

¹⁸ Yosiya nawe ali pakuyanena ati, “Fwandi lekini lyalilili, mutacilemako nu ku mafupa yakwe.” Nayo ali vino yakanyile ukulema ku mafupa yakwe, na mafupa yakwe kasema wilya uwafumile ku Samaliya.

¹⁹ Umu misumba yonsi iyamu mpanga ya Izlaeli, Yosiya aonona incende zyonsi zino antu atamanya Yawe yakapepela mwenemo utuluwi, zizyo zino yamwene amu Izlaeli yakuuzile mu misumba yamu Samaliya, izyalenzile nu kuti Yawe asoke. Utuvuwa tonsi tuno yapanzile, apakupepa nu kupeelela penepo impolelwa, Yosiya wavicisile sile icili conga kwene, wakwe vino wacisile uku Betele.

²⁰ Yosiya akoma na yasimapepo yonsi apa tuvuwa apa ncende kwene zizi izyakupepela mwenemo utuluwi. Alino aoca na mafupa yao apa tuvuwa kwene tuto. Nga lyene aswilila ku Yelusalemu.

Yosiya wazevya Cimulo ca Ucilo

²¹ Umwene Yosiya apeela ilamulo ku antu yonsi ati, “Zevini Cimulo ca Ucilo apakucindika Yawe Leza winu, wakwe vino calembwa mu Lupapulo lwa Upangano.”

²² Kutatazile ikuya ukuzevya ukwa musango uu ukwa Cimulo ca Ucilo mu manda yakwe yakapingula atesile umu Izlaeli, nanti umu manda yonsi yakwe yamwene amu Izlaeli nanti amu Yuda kwene.

²³ Ali cino umu mwaka walenga ikumi na cinani wakuteeka kwakwe Yosiya, kwali ukuzevya Cimulo ca Ucilo, apa kucindikilamo Yawe uku Yelusalemu.

Ivintu navyuze vino Yosiya wasenwile

²⁴ Mu manda kwene yayo Yosiya wazinzile antu yonsi auzyanga uku mipasi ya antu afwe na asapolanga umu mpanga yaku Yuda nu mu Yelusalemu kwene. Wafumizye nu tuluwi tuno yapepanga wakwe tuleza, tuto tonsi utwali umu ng'anda pamwi ni vintu vyonsi vino antu atamanya Yawe yaomvyanga apa kupepa. Wene wacisile cii apa kufikilizya amasunde amu lupapulo luno Simapepo Mukulu Hilikiya wazanyile umu Ng'anda ikulu yakwe Yawe.

²⁵ Pali yamwene yonsi atandikile penepo ukuteeka, patali nanti wenga wino tungalinganya na Yosiya, pano wene watumikilanga Yawe nu mwenzo wakwe onsi, na mano yakwe yonsi, na maka yakwe yonsi. Walondelanga na masunde yakwe Mose yonsi, nupya kutatala kwaya umwene angalingana na Yosiya.

²⁶ Nga lelo walanga Yawe wasokela mpiti antu amu Yuda pali vino umwene Manase wacisile. Pali cico cene Yawe atatazile atonte uku mwenzo foo.

²⁷ Yawe ali pakuvwanga ati, “Nenini antu aku Yuda, pasi pano nasya njacite vino nacisile aina Izlaeli. Nasya njatazyele nu kutazyela Yelusalemu, umusumba uno ne mweneco naisolwela, kumwi ni Ng'anda kwene ii ikulu. Mumo muno natiile amuno antu yalampepela mwenemo.”

Umwene Yosiya wafwa

²⁸ Ivintu vyuze vyonsi vino Yosiya wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Yuda.

²⁹ Lino Yosiya wali apa wene, Falao Neko umwene waku Eguputo waile ni vita vyakwe uku nkondo, uku Luzi lwa Yufulate uku kuya azwilizya umwene waku Asilya. Umwene Yosiya alonda ukulesya ivita vyaku Eguputo apa Megido. Na lino yacili yakulwa, ali vino yakomile Yosiya.

³⁰ Inkombe zyakwe ali pakwika icala cakwe umwi celeta nu kuciswilizya uku Yelusalemu. Akuno yaya yamuzika, uku nzisi zino yazikanga mwenemo yamwene aku Yuda. Antu amu Yuda ali pakutoola Yeowazi, umwana wakwe Yosiya kwene awino iyasonta apa wene.

Yeowazi umwene waku Yuda

³¹ Yeowazi wali ni myaka yakuvyalwa amakumi yaili na itatu apa nsita ino watandike ukuteeka, nga wateesile mu Yelusalemu imyezi itatu. Nyina wali a Hamutali umwana wakwe Yelemiya. Wene wali uwaku Libina.

³² Wene wifyanga apa manso yakwe Yawe, ndi vino ivikolwe vyakwe vyaifyanga.

³³ Lyene uteko wakwe wasilile pano Falao Neko wamusenzile uzya uku Libula, umu mpanga ya Hamati. Nga asonkisya aikazi amu Yuda amakilogalamu yakwe siluva ukulingana 3,400, na yakwe zaabu 34.

³⁴ Alino Falao Neko asonta Eliakimu, umwana umonsi wa mwene Yosiya, kuti aye umwene uwamu Yuda. Nga asenula izina lyakwe ati a Yeoyakimu. Lelo Neko asenda Yeowazi uku Eguputo, akuno asuka afwila.

Yeoyakimu umwene waku Yuda

³⁵ Lyene Yeoyakimu nawe asonkisya antu siluva na zaabu, wa musonko wakukumanizya pa vyuma vino Falao Neko wamunenyile ukulipa, nga amutwalila.

³⁶ Yeoyakimu wali ni myaka yakuvyalwa amakumi yaili na isano apa nsita ino watandike ukuteeka, nga wateesile mu Yelusalemu imyaka ikumi na onga. Nyina wali a Zebida umwana wakwe Pedaiya, uwaku Lumaa.

³⁷ Yeoyakimu wifyanga pa manso yakwe Yawe, ndi vino ivikolwe vyakwe vyaifyanga.