2 Yamwene 22 - Amazwi Yakwe Leza 2013

Yosiya umwene waku Yuda

¹ Yosiya wali ni myaka yakuvyalwa cinani apa nsita ino watandike ukuteeka, nga wateesile umu Yelusalemu imyaka amakumi yatatu na onga. Nyina wali a Yedida umwana wakwe Adaya. Wene wali uwaku Bozikati.

² Yosiya wacitanga ivintu ivisuma pa manso yakwe Yawe, ndi vino Davidi icikolwe cakwe, wacitanga. Walondelanga amasunde yakwe Yawe nu mwenzo wakwe onsi.

Lupapulo lwa masunde yakwe Yawe lwazanwa

³ Mu mwaka walenga ikumi na cinani, uwakuteeka kwakwe, umwene Yosiya atuma kalemba, Syafani umwana wakwe Azaliya, umwana wakwe Mesyulamu, uku Ng'anda ikulu yakwe Yawe. Amunena ati,

⁴ “Yanga kuli Simapepo Mukulu Hilikiya umuzye ulupiya luno lulipo apa mpiya zino yasimapepo yakasanguzya apa mulyango.

⁵ Alino umwene atoole impiya kwene zizyo azipeele kuli yakangalila ya mulimo waku Ng'anda ikulu yakwe Yawe.

⁶ Nayo yalipile yakapala ya mbao, na yakakuula, na yakaconga ya mawe. Nupya ali pano yatole ni zya kukalila imbao na mawe akuzifizya uku Ng'anda ikulu yakwe Yawe.

⁷ Lelo antu yaya yakakuula, yene yali antu yamwi afumaluke sana. Ali cino fwandi yatalinzile ukuyuzya umusango uno impiya zikusumbilwamo.”

⁸ Mukwai Syafani kalemba ali pakuyanena Hilikiya amazwi afumile ku mwene Yosiya. Hilikiya nawe anena Syafani ati, “Nemo ninzana ulupapulo lwa masunde muno kwene mu Ng'anda ikulu yakwe Yawe.” Alino Hilikiya atoola ulupapulo lulu nga alupeela kuli Syafani nga nawe awelenga nu kuwelenga.

⁹ Alino lyene Syafani aswilila ku mwene Yosiya, nu kuyamunena ati, “Mukwai aomvi inu yatiyatola impiya izyali mu Ng'anda ikulu yakwe Yawe, nu kuzipela ku antu akaangalila umulimo wakuzifya Ng'anda ikulu yakwe Yawe.”

¹⁰ Nupya Syafani alunda na mazwi ati, “Ulupapulo aelu luno simapepo Hilikiya waliwampela.” Nga Syafani awelengela umwene ivyali mu lupapulo lulu, ale akupundisya.

Hulida kasema umwanaci

¹¹ Walanga umwene Yosiya uvwa vino wamuwelengile mu lupapulo lwa masunde, alepola ivyakuzwala vino wazwite apa kulanga ulanda.

¹² Alino apeela ilamulo kuli simapepo Hilikiya, na Aiikamu umwana wakwe Syafani, na Akiboli umwana umonsi wakwe Mikaya, na Syafani kalemba, na Asaiya kalinda wa mwene ati,

¹³ “Pitangini mukanguzizye kuli Yawe, muzizye na aikazi amu Yuda yonsi apamulandu na masunde yano yali umu lupapulo luu. Icumi kwene Yawe watusokela sana apamulandu wakuti ivikolwe vitu vino vyatukolelela vitacitanga ivikalondekwa ukulingana ndi vino twazana umu lupapulo luu.”

¹⁴ Alino simapepo Hilikiya pamwi na Aiikamu, Akiboli, Syafani na Asaiya iyaya yuzya Hulida, kasema wilya umwanaci, uwali umuci wakwe Syalumu umwana wakwe Tikiva, umwana umonsi wakwe Haliasi. Syalumu kwene wali ali kasunga wa vyakuzwala vyakwe yasimapepo ivyali umu Ng'anda ikulu yakwe Yawe. Antu yayo fwandi ali pakulandila Hulida umulandu. Umwanaci wi wikalanga umu Yelusalemu, mwi pamba lyakwe ciili.

¹⁵ Nawe ayanena ati, “Yawe, Leza wa ina Izlaeli wavwanga ati swililini mukanene umwene uwali wamutuma kuno, muti,

¹⁶ ne Yawe navwanga nati, ndapezya Yelusalemu kumwi na ikazi ya mwenemo, wakwe vino calembwa mu lupapulo luno umwene waku Yuda watawelenga.

¹⁷ Nemo yansangukila nupya yakupeela ni mpolelwa ku tuluwi. Akuli kuti yene yansosya umwenzo apa vicitwa vyao iviipe. Nasokela aikazi amu Yelusalemu, nupya ntalatala mbwezye umwenzo.

¹⁸ Lelo umwene waku Yuda uwamutumile kuti mukuuzye Yawe, mukamunene muti Yawe, Leza wa ina Izlaeli akuti ukuuvwa watuuvwa umucumi amazwi yayo.

¹⁹ Pano wemo wazenzuka, waicefya nu kuicefya apa manso yane. Walepola ni vyakuzwala vyako, walila nu kulila. Uvwa vino napangiile umusumba wa Yelusalemu kumwi na ikazi aikala mwenemo. Ala nemo ndaleka incende iya ice iye iyakuzungusya antu. Nupya ali ncende ino yalatipwilila antu. Ukuya kwene nemo natinuvwa ipepo lyako. Ivyalanda ne Yawe.

²⁰ Ukuvunukwa kwa aikazi amu Yelusalemu kutalacitika lino ucili nu umi. Ntalazumilizya iviipe kuti vicitike kunuli mpaka lino ulafwa.” Alino antu yaya iyaswilila ku mwene Yosiya nga yamunena amazwi yaa.