2 Yamwene 21 - Amazwi Yakwe Leza 2013

Manase umwene waku Yuda

¹ Manase wali sile ni myaka yakuvyalwa ikumi na iili apa nsita ino watandike ukuteeka, nga wateesile mu Yelusalemu imyaka amakumi yasano na isano. Nyina wali a Hepeziba.

² Manase wifyanga apa manso yakwe Yawe. Wene wacitanga ivintu ivyawinyi vino ainamasi yacitanga, amu nko zyuze zino Yawe wazinzile umu mpanga yao apakuti aina Izlaeli yikale mwenemo.

³ Wene wakuululwile incende zyakupepela mwenemo utuluwi, zino isi Hezekiya wasile watamola. Wakuulile Baali kavuwa nu kupangila Asyela ulucesi, wakwe vivi kwene vino Aabu, umwene waku Izlaeli wacisile. Manase wapepanga ni ntanda kwene.

⁴ Wene wakuuzile nu tuvuwa umu Ng'anda ikulu yakwe Yawe, apa ncende ino Yawe wavwanzile ukuti ali pano yali nu kumupepela penepo insita zyonsi.

⁵ Umu misolo yoili kwene iyayelile umu Ng'anda ikulu yakwe Yawe, namo akuula mwenemo utuvuwa twakupeelelapo impolelwa ku ntanda.

⁶ Manase atoola nu mwana wakwe wenga umonsi, amupeela wa mpolelwa yakoca. Alino atandika na uncimya nu kusapola nga nu kuuzya ku antu ya malele na yasing'anga pamwi na yasikangulu kwene. Fwandi wene waifizye sana kuli Yawe amusosya wakwe cimwi.

⁷ Lyene Manase atoola iciluwi cico icakolana nu mwanaci nga aya aciika mu Ng'anda ikulu yakwe Yawe, mu cifulo cino Yawe wavwanzile kuli Davidi nu mwana wakwe Solomoni ati, “Mukwene umu Yelusalemu, umu Ng'anda ikulu kwene ii, umu ncende ino nemo nasolola ukufuma mu mpanga yonsi ya mitundu yakwe Izlaeli, ali muno yalampepela amanda pe.

⁸ Aina Izlaeli ndi yaca yamalondela amasunde yane yonsi, yalondela na masunde yano Mose umuomvi wane wayapile, lyene ale ntalayafumya umu mpanga ino napiile ivikolwe vyao.”

⁹ Lelo aikazi amu Yuda yatatontelanga Yawe foo. Manase walenzile nu kuti yacita ivintu iviipe, ivilusile na pali vino inko zino Yawe wononyile zyacitanga, lino aina Izlaeli yayanga mwenemo.

¹⁰ Yawe ali pakuvwanga ku antu ukupitila muli yakasema aomvi yakwe, ati,

¹¹ “Manase umwene waku Yuda watacita ivintu vii iviipe ivilusile vino aina Amoli yacita, yayo amukolelile. Nupya aliwe kwene uwalenga kuti aikazi amu Yuda yaifya apa kupepa utuluwi twakwe.

¹² Icaleka nani ne Yawe, Leza wa ina Izlaeli, ndaletela aina Izlaeli na aikazi amu Yuda isyamo, nu muntu wensi wiyo aluvwa kweneko, wene aluvwa amiiku.

¹³ Ndapezya aina Yelusalemu wakwe vino cali ku ina Samaliya lino nafulwile Aabu na ana yakwe. Ndalovya aikazi amu Yelusalemu yonsi pyu. Umu Yelusalemu mulakola imbale ino antu yafula umukasi, alino yawela yaikupika nu kuikupika.

¹⁴ Antu aalapusunsuka mwenemo, ndayatazyela icakuti anisi yao yalayacuzya wakwe cimwi. Yalacimviwa nu kupokwa impanga yao.

¹⁵ Fwandi ali vino indi nu kucitila antu yane pakunjifya kuno yanjifwa. Nupya yakansomba nu kunsosya umwenzo, ukutandikila sile uku vikolwe vyao, lino navifumizye mu Eguputo ukufika na pilelo kwene.”

¹⁶ Antu aula umulandu, yano Manase wakomile, yali anyanya umwi, icakuti uwazi wao wakonkolokanga umu tumiseo twamu Yelusalemu. Icintu cico calunzile sile pali vino wene walesile kuti aikazi amu Yuda yapepa utuluwi nu kucita ivintu vyawinyi vyuze apa manso yakwe Yawe.

¹⁷ Ivintu vyuze vyonsi vino Manase wacisile, ni milimo yakwe yonsi, kumwi na maifyo yano wene wacisile, vyalembwa mu lupapulo lwa Milandu yakwe Yamwene aku Yuda.

¹⁸ Lyene Manase asuka afwa, nga yamuzika mu calo ca kwi sano, cakwe Uza. Alino Amoni umwana wakwe umonsi amupyana pa cilimba ca wene.

Amoni umwene waku Yuda

¹⁹ Amoni wali ni myaka yakuvyalwa amakumi yaili na iili apa nsita ino watandike ukuteeka, nga wateesile mu Yelusalemu imyaka iili. Nyina wali a Mesyulemeti umwana wakwe Haluzi. Wene wali uwaku Yotiba.

²⁰ Amoni nawe kwene wacitanga iviipe pa manso yakwe Yawe, ndi vino isi Manase wacitanga.

²¹ Wene walondelelanga imisango yonsi iipe yakwe isi. Wapepanga utuluwi tuno isi wapepanga.

²² Wasuzile Yawe Leza wa vikolwe vyakwe, nupya atalondelanga amasunde yakwe foo.

²³ Aomvi yakwe kwene, inkombe ziili zyamukatukile, nu kumukomela umwi sano lyakwe kwene.

²⁴ Alino lyene aikazi ya mpanga ya Yuda nayo ali pakukoma aomvi yaya, yano yakomile Amoni. Nga iyatola Yosiya umwana wakwe umonsi, awino yapyanika apa wene.

²⁵ Ivintu vyuze vyonsi vino Amoni wacisile, ni milimo yakwe yonsi, vyalembwa mu lupapulo lwakwe Yamwene aku Yuda.

²⁶ Amoni yamuzisile umwi lindi lyamwi cele ilyali mu calo cakwe Uza. Alino Yosiya umwana wakwe umonsi amupyana pa cilimba ca wene.