2 Yamwene 2 - Amazwi Yakwe Leza 2013

Kasema Eliya wasendwa ukwiyulu ni celeta

¹ Lyene insita ifika yakuti Yawe asende Eliya ukwiyulu muli nkungulupya. Uwanda kwene uo ali uno Eliya na Elisya yali pa ulendo wao wakuya ku Giligali.

² Eliya anena Elisya ati, “We Elisya, cazipa wikale pano, pasi pano Yawe watantuma kuti mpite ku Betele.” Lelo Elisya avwanga ati, “Nalapa umwi zina lyakwe Yawe waumi, nga na pali wewe ukuti ntalakusya.” Acino yoili kwene iyatentemukila ku Betele.

³ Iumba lyakwe yakasema aikalanga ku Betele yiza kuli Elisya nga yamuzya yati, “Uzye umanyile ukuti ilelo Yawe aizile senda umusambazi wako ukufuma kunuli?” Elisya nawe aasuka ati, “Mukwai, manyile. Lelo mutalanda pali cii.”

⁴ Alino Eliya amunena ati, “We Elisya, cazipa wikale pano, pasi pano Yawe watantuma kuti mpite ku Yeliko.” Lelo Elisya aasuka ati, “Nalapa umwi zina lyakwe Yawe waumi, nga na pali wewe ukuti ntalakusya.” Acino yoili kwene iyatwalilila nu ulendo wao wakuya ku Yeliko.

⁵ Iumba lyakwe yakasema aikalanga ku Yeliko yiza kuli Elisya nga yamuzya yati, “Uzye umanyile ukuti ilelo Yawe aizile senda umusambazi wako ukufuma kunuli?” Elisya nawe aasuka ati, “Mukwai, manyile. Lelo mutalanda pali cii.”

⁶ Lyene Eliya amunena ati, “We Elisya, cazipa wikale pano, pasi pano Yawe watantuma kuti mpite ku Yodani.” Lelo Elisya avwanga ati, “Nalapa umwi zina lyakwe Yawe waumi, nga na pali wewe ukuti ntalakusya.” Acino yoili kwene iyatwalilila nu ulendo wao.

⁷ Antu amakumi yasano amwi umba lyakwe yakasema yaya yimilila katalamukila, yalozya amanso pa ncende ino Eliya na Elisya yaile yimilila pa cituntu ca luzi lwa Yodani.

⁸ Alino Eliya atoola ikoti lyakwe, alikonza nga auma pa manzi ni koti kwene lilyo. Amanzi yalepuka pakasi, yamwi yaya kwilunji na yamwi kwimani, mpaka yakasema yayo yoili yalamba pa musili uume.

⁹ Lino yalamba, Eliya anena Elisya ati, “Unene, uzye icani cino ningakucitila lino ntali nsendwe ukufuma kunuli?” Elisya nawe aasuka ati, “Umpeele amaka yamwi akuti inje vino waya.”

¹⁰ Eliya nawe aasuka ati, “Icintu cino walenga icitale sana. Lelo kwene uli nu kuyakwata, cikulu sile uce ulole kuno yakunsenda. Ndi cakuti utaweni kweneko, lyene utalayakwata.”

¹¹ Lino yakupita ala yafumile yakulanda, lilyo kwene iceleta lya moto iliiza lino imfwalasi zyamoto zyazusile zikutinta. Alino lisenda Eliya umwiyulu muli nkungulupya.

¹² Elisya lino walola kweneko, atandika ukupuunda ati, “Iye mwe tata wane mwe! Tata wane mwe! Kakulula wa ina Izlaeli we! Fwandi wapita, icumi!” Ali vino Elisya atatazile alola Eliya nupya. Elisya ali pakulepula ikoti lyakwe ulanda ulanda.

¹³ Alino asola ikoti lyakwe Eliya lino wasile waponya, nga aswilila mwenemo, aya aimilila apa cituntu ca luzi lwa Yodani.

¹⁴ Lyene atoola ikoti lyakwe Eliya nga auma pa manzi nalyo, auzya ati, “Uzye Yawe, Leza wakwe Eliya ali kwi?” Lino uma pa manzi, amanzi yalepuka paili, yamwi yaya kwilunji na yamwi kwimani, nga Elisya alamba.

¹⁵ Iumba lyakwe yakasema afumile ku Yeliko yalola kuno Elisya akulamba, nga yavwanga yati, “Amaka yakwe Eliya yingila muli Elisya.” Alino yaya ku kumukomanya, nga yakontamika ivinso vyao inkolelo yakwe Elisya.

¹⁶ Alino yavwanga yati, “Lola, swe aomvi yako tukweti antu amakumi yasano, aonsi yamaka sana. Leka tufume tukulonda ukuli Eliya umusambazi wako, pano limwi Umupasi wakwe Yawe watiumutwala kumwi kuno ungaya ukamusye papela ya mwamba umwi nanti mu cifoloma cimwi.” Elisya nawe aasuka ati, “Awe mutaya kweneko.”

¹⁷ Lelo yakasema yayo yene yakoma sile penepo, asuka Elisya ayazumilizya kuti yangapita. Yakasema yayo yonsi amakumi yasano ali pakukatuka, iyafuma yakulonda Eliya mu myamba nu mu vifoloma. Iyamala amanda yatatu, lelo ukwaula ukumulola.

¹⁸ Alino lyene iyawela kuli Elisya, ku musumba waku Yeliko kuno walolelanga. Elisya ali pakuyanena ati, “Ale lyene, uzye asi ali vino namunenyile nati mutaya kweneko?”

Ivizungusyo vino Elisya wacisile

¹⁹ Uwanda umwi aonsi yamwi amu musumba wa Yeliko yaya kuli Elisya nga yamunena yati, “We musambazi, si lola vino umusumba uu wakulwa apasuma. Lelo amanzi aya mwenemo yasi yasuma sana, nupya yakalenga nu kuti iviya kuli yayo anyomelile vyononeke.”

²⁰ Elisya nawe ayanena ati, “Ndetelini kweneko ulweso ulupya, mwikemo nu musilya umu manzi.” Antu yayo nayo yamuletela umusilya mu lweso.

²¹ Lyene Elisya aya ku kafukoka ka manzi, nga asumbila umusilya mu kafukoka kako, avwanga ati, “Yawe wavwanga wati, ‘Natinsangulula amanzi ya. Ukufuma pali ndakai ukufika mu manda akwiza, mu manzi ya mutalaya icintu icingakoma umuntu nanti ukonona iciviya.’ ”

²² Nga amanzi yaya yacili asangululwe ukufika ni lelo kwene, ndi muno Elisya wavwangile.

²³ Lino wafuma kuku Elisya aya ku Betele. Nga lino akupita mu museo, alumendo yamwi yafuma mu musumba uo nga yamusoweka yati, “Fuma pano, cilipala we! Fuma pano, cilipala we!”

²⁴ Alino Elisya asenuka, alola alumendo yayo, nga ayatipwila mwi zina lyakwe Yawe. Lyene ivilyanyi viili ivyakaci, vya mwata wakwe cuuli vifuma mu mutengo, nga viza vikoma alumendo yaya amakumi yani na yaili.

²⁵ Lino wafuma kuku, Elisya atumbela aya ku Mwamba wa Kalimeli, nga apa kufuma kuku aswilila ku Samaliya.