2 Yamwene 19 - Amazwi Yakwe Leza 2013

Kasema Ezaya wapanda umwene Hezekiya amano

¹ Walanga umwene Hezekiya uvwa umulandu, ali pakulepola ivyakuzwala vyakwe apakulanga ulanda. Alino azwala ivyakuzwala vya ndosya, aya nu mu Ng'anda ikulu yakwe Yawe.

² Alino atoola Eliakimu kangalila wakwisano, Syebina kalemba waku cilye ca milandu alino ni nkonkotela muli yasimapepo, ala yatiyazwala ni vyakuzwala vya ndosya. Iyaya na kuli kasema Ezaya umwana wakwe Amozi.

³ Hezekiya wayatumile amazwi akuyanena Ezaya ati, “Uwanda wilelo, uwanda wamalanda, uwakucula, uwakusimangwa, nu kuuvwa insonyi. Swemo tuli sile wa mwanaci atakweti amaka akupapila apa nsita yakupapa lino yatimufikila.

⁴ Umwene waku Asilya watatuma umukalamba wa vita ku kwiza tukananga intusi kuli Yawe Leza waumi. Fwandi Yawe Leza wako anguvwa intusi zizya apakuti apezye antu yaya yakatukana. Wemo lenganga sile Yawe apakuti angapususya antu itu yano yasyala penepo.”

⁵ Walanga Ezaya nawe wapokelela amazwi yano yafumile kuli Hezekiya,

⁶ nawe aswilizya amazwi yauze ati, “Kanenini umusambazi winu ukuti, Yawe wavwanga wati, ‘Mutazakaza nanti panono apa mazwi ya ina Asilya yano yatiyantukola ne Yawe.’

⁷ Nene kwene ne Yawe namaleka ukuti umwene waku Asilya auvwe vimwivimwi, vivyo avino ndaleka kuti aswilile uku mpanga yakumwao akuno yaye yakamukomele nu kumukomela.”

Aina Asilya yaswilizya ingofyo zyakwe ciili

⁸ Umukalamba wa vita uwaku Asilya uvwile ukuti umwene waku Asilya watafuma umu musumba waku Lakisyi nu kuyazanza umusumba wa Libina, umu pipi na kuno wayelile. Fwandi nawe ali pakuya kweneko apakuti yakuvwane nawe.

⁹ Amazwi yasuka yafika kuli Senakelibu, umwene waku Asilya, akuti, “Tiliaka umwene waku Kusyi akwiza ni vita vyaku Eguputo uku kuyalwisya.” Lino umwene waku Asilya uvwa vivyo, atumila Hezekiya umwene amazwi akuti,

¹⁰ “Utaleka Leza wako wiyo wino wataila, akutumpike ati Yelusalemu atalapeelwa mu makasa yane ne mwene waku Asilya.

¹¹ Wayuvwila wemwisikulu vino nene ne mwene waku Asilya nkacitila impanga zyonsi, na vino nkalonda uku zyonona. Nga fwandi wemo ulafyonsezya pi?

¹² Ivikolwe vyane, ali vino vyononyile uwaku Gozani, uwaku Halani nu ku Lezefu. Vyononyile na antu aku Betiedeni, aikalanga umu musumba wa Telasala. Uzye ukunena ukuti utuluwi, tuleza twao twatazile ituyatuula?

¹³ Uzye umwene uwaku Hamati, nanti uwaku Alipadi, nanti uwaku Sefalavaimu, nanti uwaku Hena, nanti uwaku Iva ali kwi?”

Ipepo lyakwe Hezekiya

¹⁴ Umwene Hezekiya waile apokelela kalata wiyo nu kuwelenga penepo. Ali pakuya uku Ng'anda ikulu yakwe Yawe. Atoola kalata, amusapatula nga aika mumu kwene umu Ng'anda ikulu yakwe Yawe, apa manso yakwe Yawe.

¹⁵ Lyene Hezekiya apepa kuli Yawe ati, “Iye, we Yawe, Leza waku Izlaeli, wemuno watekwa apapela yakwe yakelubi apa cilimba cako ica wene. Awewe sile wenga, wewe uli Leza nupya awewe sile wateeka insi yonsi nu wene onsi uwa pano nsi. Awewe waumba iyulu ni nsi.

¹⁶ Icaleka fwandi we Yawe, lolekesya ivintu uwingi ivikutuponela. Uvwa na mazwi yonsi yano Senakelibu akulanda, akusausya wewe, we Leza waumi.

¹⁷ “We Yawe, icumi twamanya vino yamwene aku Asilya yonona antu amu mitundu na pansi pazuka, na vino yonona impanga zyao ziya wa lwanga.

¹⁸ Ukwika penepo nu koca utuluwi tuleza twao, ututaya a tuleza twacumi. Twene twapangwa sile uku antu wa unkolanya sile, ukufuma ku vimiti na mawe.

¹⁹ Ali cino fwandi we Yawe Leza witu, tupususye kweneko uku ina Asilya, apakuti antu amu mitundu yuze iya pano nsi yamanye ukuti awewe sile uli Leza, nga kutaya namuze.”

Kasema Ezaya watumila umwene Hezekiya amazwi

²⁰ Lyene Ezaya umwana wakwe Amozi watumile amazwi ku mwene Hezekiya, aku munena ndi vino ipepo lyakwe lyatilyasukwa kuli Yawe, Leza wa ina Izlaeli, ilya pamulandu na Senakelibu umwene waku Asilya.

²¹ Yawe wataasuka ati, “Wewe Senakelibu mwana wamusuula we! Umusumba wa Yelusalemu watiukuseka nu kukusuula watiukusuula wakwe cimwi.

²² Uzye watumanya wino ukutuka nu kusaalula? Uzye aweni wino ukusaalula? Uzye asi nene ne Wamuzilo uwa ina Izlaeli.

²³ Wewe watutuma inkombe zyako kuti zintukoole ne Yawe. Wemo ukuyuvwa nu kuyuvwa uti, ‘Ne Senakelibu nakwata amaceleta yane, anene naile nu kuyacimvya uku myamba ntali, ukufika sile na pa ntonje ya mwamba wa Lebanoni. Nupya naya nakoma imikelide italimpisye, kumwi ni myovu iya kwene isuma sana. Nupya nafika mpaka nu ku mpela, ku mitengo isuma wakwe cimwi.

²⁴ Nemo niimba ni vifula umu mpanga zya inamasi nu kumwamo amanzi kweneko. Lyene ivita vyane vyasuka vyakamya uluzi lwa Nailo muno yakalukulyatola ni ngazo zyao.’”

²⁵ Yawe atwalilila ukuvwanga ati, “Uzye utatala uvwa ukuti ne Yawe nateyanya vii vyonsi mpitimpiti? Anene kwene nafikilizya na pali ndakai kwene. Anene nakupeela amaka akulwisya imisumba yonsi iya malinga apakuti isyale sile imitumba ya vitantala.

²⁶ Antu ali mwenemo yatakweti amaka foo, yali ni ntete nu kutonta zuwa. Yali wi sote lyamu mpanga nanti wi sote ilikamela apapela yi paala, ilikafooka lino litatala lyakula.

²⁷ Nemo namanya mpiti imisango yako yonsi, na vino we Senakelibu ukacita navimanya vyonsi. Namanya mpiti nakuno ukalungama. Namanya ukuti wemo wansokela sana.

²⁸ Fwandi apakuzana ukuti wemo wansokela, nani namanya mpiti kuno icilumba cako cikukutwala. Lyene namaika iswelo mu mpuno zyako na napengele mu kanwa kako, alino nkuswilizye kuno wafumile, umu nzila kwene ino wizile mwenemo.”

²⁹ Alino kasema Ezaya anena umwene Hezekiya ati, “Cico ali cimanyililo ca vintu ivili nu kucitika. Umu mwaka ukwene nu mu mwaka ukwiza mumalyanga sile mambuka. Alino mu mwaka wakwe citatu, mulatovya imbezu zinu nu kusinza mukasinze. Mulalema imitingi nu kulyako amatingi.

³⁰ Amu mupanda wakwe Yuda alasyala penepo, yene yalaya nu longo nu kuyemba wa miti iyatwalisya imisisi pansi, iyo ikaseekesya iviseekwa.

³¹ Umu Yelusalemu mulasyala mwenemo antu apuma. Alino na papela ya Mwamba wa Zioni kwene, kulafuma antu alapusuka. Yawe Leza Wamaka yonsi uwapanga kuti cii cicitike.

³² “Caleka Yawe akuvwangila apamulandu wa mwene waku Asilya ati, ukuti wene asikwingila mu musumba uu nanti ukulasa mwenemo uluceto longa. Pasikutala paloleke icita nanti conga icili ni cisyangu, icimaezya ukupalamila ku musumba, nanti ukuzyolela imitumba ya musili, apa kuulilizya.

³³ Apa kuswilila mwenemo, amalondela sile inzila iya kwene ino wizile mwenemo. Kuno musumba kwene asikutala aingile mwenemo. Cacumi anene ne Yawe navwanga.

³⁴ Nene nkusunga nu kucingilila umusumba uno apakuti njilange ucindami wane, nu upangano uno napangine nu muomvi wane Davidi.”

³⁵ Uwanda kwene uwo, umu nsita ya usiku, umungeli wakwe Yawe aya mu nsakwe zya ina Asilya, nga akoma ivita amazimbi umwanda onga na makumi cinani na yasano. Lino waca akatondo antu iyalola kuno ivyala vyati visankawala monsi monsi!

³⁶ Acino Senakelibu apakulola vivyo acimba, nga aswilila nu ku musumba wa Ninive, akuno aikala.

³⁷ Uwanda umwi lino Senakelibu wapepanga umu ng'anda ikulu yakwe Nisiloki, kaleza kaluwi akakwakwe, ana yakwe yaili, Adilameleki na Syalezeli, yamukomile mumu kwene ni mpanga zyao, nga afwa nu kufwa. Nayo ali pakupuukila uku mpanga ya Alalati. Alino Esalaadoni umwana wakwe umonsi amupyana pa cilimba ca wene.