2 Yamwene 18 - Amazwi Yakwe Leza 2013

Hezekiya umwene waku Yuda

¹ Mu mwaka wakwe citatu uwa kuteeka kwakwe Hosyea umwana umonsi wakwe Elaa, Hezekiya umwana umonsi wakwe Aazi umwene waku Yuda watandike ukuteeka.

² Wene wali sile ni myaka yakuvyalwa amakumi yaili na isano apa nsita ino watandike ukuteeka, nga wateesile umu Yelusalemu imyaka amakumi yaili na fundimbali. Nyina wali a Abiya umwana wakwe Zakaliya.

³ Hezekiya wacitanga ivintu ivisuma pa manso yakwe Yawe, ndi vino Davidi icikolwe cakwe wacitanga.

⁴ Watamozile incende zyonsi izyakupepela mwenemo tuleza tuluwi. Watamozile na mawe yano yimikanga nu konona amaunkolanya yonsi yakwe kaleza kanaci ka Asyela. Alino watamile ni nzoka ya cela ino Mose wimikemo, pasi pano ukufika na pa nsita kwene ilya aina Izlaeli yatwalilile ukuyocela ubani. Inzoka kwene iyo apakuicindika yayamanga iyati Neusyitani, iyo ino ukufika na pa kasita kako aina Izlaeli yocelanga ubani.

⁵ Hezekiya watailanga muli Yawe, Leza wa ina Izlaeli. Kutali umwene nanti wenga uwakoline na aliwe mu ene yonsi aku Yuda, yao amulondelile apacisila kumwi na amukolelile kwene.

⁶ Na cico cali umukuti aliwe wenga sile wasakamalanga Yawe ukwaula ukumusangukila. Wene wayelanga amasunde yano Yawe wapile Mose.

⁷ Fwandi Yawe nawe ali pakuya nawe. Nu kusyuka ali cino wasyukanga muli vyonsi vino wacitanga. Wasusile wasangukila umwene waku Asilya, wata nu kumucindika.

⁸ Ali wino wakomozile na ina Filisti, nu kucimvya ivifulo vyao ukufika nu ku Gaza, nu konona impanga yao, ukutandikila sile pa cimpinda cao ukufika nu ku misumba inono mu mpanga yao yonsi iyayazinguluka.

Samaliya waongoloka

⁹ Mu mwaka wakwe cini wakuteeka kwakwe Hezekiya, ali mwaka kwene uwalenga cinimbali wakwe Hosyea umwana wakwe Elaa umwene waku Izlaeli. Syalimaneseli walwisizye umusumba wa Samaliya nu kuuzinguluka.

¹⁰ Alino ipapita penepo imyaka itatu, iyaupoka. Mu mwaka uwalenga mutanda uwa kuteeka kwakwe Hezekiya, uli mwaka kwene uwalenga fundimbali uwa kuteeka kwakwe Hosyea umwene waku Izlaeli. Ali muno umusumba wa Samaliya waposilwe.

¹¹ Umwene waku Asilya muno wasenzile aina Izlaeli ku Asilya wa yafungwa, nu kwika yamwi umu Halaa nu mu Haboli, yamwi umupipi nu luzi ulwaya uku muzi wa Gozani nu mu misumba yaku Medi.

¹² Nupya umulandu wakuti yatuvwilanga Yawe Leza wao nu konona umu kucita vivyo, yene yononyile isunde lyakwe, wakwe muno Mose umuomvi wakwe Yawe wayapile ilamulo. Fwandi tungati yatamuvwile nupya yatakonsile iceo cakwe nanti conga.

Senakelibu umwene waku Asilya watensya Yelusalemu

¹³ Mu mwaka walenga ikumi na ini wakuteeka kwakwe Hezekiya, Senakelibu umwene waku Asilya walwisya imisumba yonsi iyakweti amalinga mu mpanga yakwe Yuda nu kuipoka.

¹⁴ Nga alino lyene Hezekiya umwene waku Yuda watumile umwene waku Asilya, lino umwene wii ali ku Lakisyi, amazwi akuti, “Kwene natinifya. Icumi napapata, taa ukunzanza, nupya ningakulipa consi cino unganena.” Uwasuko uwafumile kuli Senakelibu wali uwakuti cazipa amutumile amakilogalamu amazimbi yatatu yakwe siluva na makilogalamu izimbi lyonga yakwe zaabu.

¹⁵ Hezekiya atali umukanyi, ali pakutumila Senakelibu siluva wensi uwali mu cipao ca Ng'anda ikulu yakwe Yawe ni camu cipao ca kwisano ica mwene.

¹⁶ Apa nsita kwene ilya Hezekiya umwene waku Yuda afumya zaabu wensi pyu wino wapomile ku visasa nu ku meema zyaku Ng'anda ikulu yakwe Yawe, nga apeela umwene waku Asilya.

¹⁷ Umwene waku Asilya nawe ali pakutuma ivita vii: musika mukulu uwa vita, na cilolo wakwe umukalamba, nu mukalamba wa vita ukwika penepo ni mpuka ikulu iya vita, ukufuma ku Lakisyi ukuya zanza Hezekiya uku Yelusalemu. Lino yafisile kweneko uku Yelusalemu, yaile yimilila umu museo, umwayela yakapanga ya nsalu, umu pipi nu mufolo ukaleta amanzi ukufuma umu ciziya icayela apapela.

¹⁸ Ali lino lyene yatumile ukuti umwene angiza. Nga lino aomvi yatatu, amazina yao a Eliakimu umwana wakwe Hilikiya kangalila wakwisano, na Syebina kalemba waku cilye ca milandu, na Yowa umwana wakwe Asafu, kasunga wa milandu, ali pakufumila apanzi ku kuyakomenkanya.

¹⁹ Alino umukalamba wa vita wenga wakwe Senakelibu ayanena ati, “Umwene Senakelibu, umwene mukulu uwaku Asilya akuuzya ati, ‘We Hezekiya, uzye ukupama kwako kusintilile muli cani?

²⁰ Uzye ukwelenganya ukuti amazwi yatupu sile ali mano na maka angalwa inkondo? Aweni wino watailamo apakuti unsangukile? Na alakwazwa aweni apakulwa na ina Asilya?

²¹ Limwi watutaila aina Eguputo ukuti yalakwazwa. Owe! Nga awiyo wene icili cimwi kwene nu kuomvya itete kwati ali ntuwa, ilingavunika nu kupandukila mwi kufi lya muntu alilemile limutote! Vivyo avino swe ina Asilya tungakolanya Falao, umwene waku Eguputo, ku muntu wensi uwa mutaila.’ ”

²² Aina Asilya iyatwalilila na mazwi iyati, “Limwi mukulonda mutunene ukuti mukutaila muli Yawe Leza winu. Nga awiyo wene umutupu watamozile incende zyakupepela mwenemo utuluwi kumwi nu tuvuwa, zino Hezekiya wakuuzile nu kunena antu aku Yuda na amu Yelusalemu ati, ‘Mwapepela apa kavuwa kaa, kaku Yelusalemu.’

²³ Fwandi nkukulenga ukuti mwize mupangane nu mwene waku Asilya. Namamupeela imfwalasi amazimbi yaili, cikulu sile mukwate angaziomvya nu kuzikwela!

²⁴ Mwemo nkumunena mutange mwezye ukuzingana nu musilika wenga, wiya kwene uwaciwelewele umu asilika. Ale fwandi ungataila uli mu ina Eguputo ukuti angakutumila imfwalasi na maceleta yao?

²⁵ Ali cino wemo utelenganya ukuti naitandike sile ukwiza kuno nu kwiza onona incende ii apaula iceo cakwe Yawe. Ala nemo Yawe aliwe wanenyile ati, ‘Yanga ukazanze incende ilya nu kuyonona.’ ”

²⁶ Alino Eliakimu kangalila wakwisano, umwana wakwe Hilikiya na Syebina nga na Yowa, iyanena umukalamba wa vita vyao iyati, “Si nena antu yako umu lulimi lwa Cialamu, luno naswe kwene tukauvwa. Utaavwanga umu Ciyebulai pano limwi antu akwezile apapela yi linga yanguvwa kweneko.”

²⁷ Nga musika mukulu ayanena ati, “Uzye mukwelenganya ukuti umusambazi wane watantuma sile uku musambazi wako na kuli wewe sile? Awe foo! Inkulanda vii vyonsi na kuli yao kwene ali api linga, aalalya ufila wao nu kumwa amatunzi yao, wakwe vino nawe kwene ulacita.”

²⁸ Musika mukulu uwa vita ali pakuinyunza nu kupunda umu Ciyebulai ati, “Mwe! Uvwini vino umwene mukulu waku Asilya akumunena!

²⁹ Akumusopesya ukukana leka Hezekiya amusombe! Hezekiya atange amutuule.

³⁰ Nupya mutaleka Hezekiya amulyombeleke ukutaila muli Yawe. Mutelenganya ukuti Yawe alamupususya, nanti ukulesya ivita vyaku Asilya ukumulema nu kuzinguluka umusumba winu.

³¹ “Mutauvwa kuli Hezekiya. Umwene waku Asilya wamupeela iceo ica kufuma mu musumba nu kucimba. Mulazumiliziwa mwensi ukulya iviseekwa vya vilimwa vinu umu vyalo vinu, na masuku aku miti inu nu kumwa amanzi mu vifula vinu,

³² Mpaka umwene waku Asilya akamufisye ningo umu mpanga inu, mumo umwaya indya nu kumwa ivyakumwa ivisuma. Impanga iya miolivi nu uci, muno mulapita ulongo ukwaula ukufwafwa. Mutuvwa kuli Hezekiya pano akumusomba sile, lino akuti Yawe alamutuula.

³³ Uzye mwatazile imulola impanga imwi ino leza umwi wapuswisye umu makasa ya ina Asilya?

³⁴ Ale yali kwi pali ndakai? Yaleza aku Hamati nu ku Alipadi? Yali kwi yaleza aku Sefalavaimu, Hena nu ku Iva? Uzye kuli uwatazile atuula aina Samaliya?

³⁵ Uzye alilaci fwandi lino tuleza utwa mpanga zyonsi zii twatazile itutuula impanga yao imwi uku mwene witu? Ale fwandi icani calenga kuti mwelenganye ukuti Yawe a Leza angatuula Yelusalemu?”

³⁶ Antu yonsi apakuvwa vivyo iyaya sile zii, pamwi nu mwene Hezekiya kwene, ndi muno wayanenyile. Yikala sile kututu.

³⁷ Lyene Eliakimu umwana umonsi wakwe Hilikiya kangalila wakwisano, na Syebina kalemba na Yowa umwana umonsi wakwe Asafu, kasunga wa milandu, yene iyaya kuli Hezekiya, ala yatiyalepola ivyakuzwala vyao umu ulanda, nu kuyanena umwene wao vino umukalamba wa vita vya ina Asilya avwanzile.