2 Yamwene 17 - Amazwi Yakwe Leza 2013

Umwene Hosyea waku Izlaeli

¹ Mu mwaka walenga ikumi na iili wakuteeka kwakwe Aazi umwene waku Yuda, Hosyea umwana wakwe Elaa nawe ali lino watandike ukuteeka aina Izlaeli. Wene wateesile mu musumba wa Samaliya apa myaka fundimbali.

² Wene waifizye apa manso yakwe Yawe, lelo kwene citaya wakwe yamwene amukolelile ukuteeka mu Izlaeli.

³ Lino Syalimaneseli, umwene waku Asilya, wizile amulwisya, umwene Hosyea wene wizile acimba kunoli, amupeela nu musonko cila mwaka.

⁴ Lelo uwanda umwi Hosyea umwene waku Asilya atuma inkombe kuli So, umwene waku Eguputo, ukuuzya uwazwilizyo, nu kuta ukusonka umusonko wa cila mwaka ku mwene waku Asilya. Lino Syalimaneseli wamanya cico, walanzile ukuti Hosyea alinzile ukulemwa nu kusumbilwa mu ng'anda yaminyololo.

Umusumba wa Samaliya wapokwa

⁵ Alino lyene umwene Syalimaneseli uwaku Asilya wizile azanza impanga ya Izlaeli yonsi, nu kulizizya umusumba ukalamba wa Samaliya. Umu mwaka wakwe citatu pano yaulizizye,

⁶ uo uwali ali mwaka uwalenga fundimbali uwa utesi wakwe Hosyea, umwene waku Asilya apoka Samaliya nu kusenda aina Izlaeli uku Asilya wa yanyepwe. Yamwi yayatwazile umu musumba wa Halaa, mu pipi nu ku luzi lwa Haboli mwi boma lyaku Gozani. Alino yamwi umu misumba yaku Medi.

⁷ Icalenzile ukuti Samaliya awe, umulandu ni mpulupulu zya ina Izlaeli izyakwifya kuli Yawe umwene wao, uwayakulwile ku mwene waku Eguputo, nupya ayatungululula nu kuyawaka ukuti yafume mu Eguputo. Nayo iyatandika ukupepa tuleza tuze, ni nsonyi foo.

⁸ Iyalondela ni misango ya antu yano Yawe wapusizye umu mpanga ilya pakuti yingile mwenemo. Aino iyatola imisango iyalesilwe na ene ya ina Izlaeli.

⁹ Aina Izlaeli yacitanga ivintu vino Yawe Leza wao asilonda. Iyakuula utuvwa twakupepela nu kutuulila tuleza tuluwi umu misumba yao yonsi, ukutandika sile ku kamuzi akanono ukufika sile nu ku musumba ukalamba.

¹⁰ Apapela ya milundu yonsi nu mwisika lya vimiti ivikulu ivya matesi, monsi iyakuula utuvuwa twa mawe nu unkolanya wakwe kaleza kanaci ka Asyela.

¹¹ Alino nu kocela ubani apa tuvuwa tonsi twakwe tuleza tuluwi, umu konkelezya intambi zya antu yano Yawe wapusizye umu mpanga. Iyaleka icipyu cakwe Yawe cakatuka uku vicitwa vyao iviipe.

¹² Ukwika penepo nu kutalamila isunde lyakwe Yawe, ilyakuntapepa tuleza tuze, utuluwi.

¹³ Yawe watumile inkombe zyakwe uku kuyasoka aina Izlaeli na ina Yuda, pamwi na yakasema ati, “Zenzukini, nu kulondela amasunde yane, aakazanwa mu vipope vino napiile ivikolwe vino na vino namulandile ukupitila muli yakasema yane.”

¹⁴ Nga lelo yatali akuti yuvwe, yali sile wa vikolwe vyao uku utalami, yao atataile muli Yawe Leza wao.

¹⁵ Yene yakanyile ukulondela utunguluzi wakwe, yakana nu upangano uno wene wapangine ni vikolwe vyao, nu kusula ukusopwa kwakwe. Yapepanga tuleza twaciwelewele, utuluwi nga lyene aisikulu iyasanguka awelewele. Yene yalondelile imisango ya mitundu iyayazingulwike, yatalamila amasunde yakwe Yawe nu kukana yalondela.

¹⁶ Yonona amasunde yakwe Yawe Leza wao yonsi, yapanga ivimumbwa vya ng'ombe, yacipambasi yaili avyela, avino yamafukamila nu kupeela ntaizyo kuno vili. Yapanga nu unkolanya wakwe kaleza kanaci ka Asyela, nu kupepa intanda nu kuombela Baali.

¹⁷ Yocanga wa mpolelwa ana yao aonsi na akazyana ku mileza yankandawa. Yasapolanga nu kupendola kuli yakalola na yakamucape. Alino yaipelesyanga wensi pyu, umu kucita iviipe pa manso yakwe Yawe, iyamulenga ukusoka.

¹⁸ Acino Yawe asokela sana aina Izlaeli nu kuyasisya uku cinso cakwe, nu kusya sile amu mutundu wakwe Yuda.

¹⁹ Nga lelo nanti amu mutundu wakwe Yuda, nayo kwene yatalondile ivyeo vyakwe Yawe Leza wao. Yalondelile imisango ya kukopa ku ina Izlaeli.

²⁰ Yawe wakantwile aina Izlaeli yonsi, wayakana, nga ayapanika nu kuyapela umu makasa ya anisi yao akakate, suka apakupelelekezya wayakoma sana, nu kuyatalusya uku cino cakwe.

²¹ Pacisila cakwe Yawe ukupaalukanya aina Izlaeli na Ayuda, aina Izlaeli yasonsile Yeloboamu ukuya umwene wao. Yeloboamu wiyo uwalesile kuti yasye Yawe, nu kuyatwala umu nkota zimwi izikulu!

²² Aina Izlaeli yakonsile Yeloboamu vivyo kwene nu kutwalilila ukucita amaifyo yano umwisikulu wapanzile.

²³ Suka apakusyalikizya Yawe ayafuntusya uku cinso cakwe ndi muno walanga walandila ukupitila muli yakasema aomvi yakwe. Ali vino aina Izlaeli yasenzilwe ukunzi umu uzya uku Asilya kuno yacili yakaikala na ndakai kwene.

Aina Asilya yikala umu Izlaeli

²⁴ Pacisila cakwe vii umwene waku Asilya wasenzile antu ukufuma mu misumba ii: Babiloni, Kuta, Ava, Hamati, na Sefalavaimu. Ayaleta kuti yize yikale mu misumba yaku Samaliya, umwikalanga aina Izlaeli yano yasenda uzya. Yakukile umu misumba ilya amuno iyaikala.

²⁵ Lino yikazile mumu kwene, apakutandika yatapepanga Yawe. Acino Yawe nawe ali pakutuma yacisama alemile yamwi nu kuyakoma.

²⁶ Umwene waku Asilya wapokelile amazwi akuti antu yano yaya yikala umu Izlaeli, umu misumba yaku Samaliya yatamanyile amasunde yakwe Leza wa mpanga ilya. Leza wa mwenemo wayatumile yacisama, alemilepo yamwi nu kufwa yafwile.

²⁷ Umwene nawe watumile ati, “Tumini simapepo wenga pali yano twasenda ku Asilya wa yafungwa. Muleke aye akikale kuno yali pakuti akayasunda nu kuyasambilizya antu amasunde yakwe leza wakweneko.”

²⁸ Fwandi ali vino simapepo wenga umwina Izlaeli, uwasenzilwe ukufuma ku Samaliya waswilile nu kuyaikala uku Betele, kuko kuno waile asunda antu ivyakupepa Yawe.

²⁹ Lelo antu yaya aile yikala umu Samaliya, yatwalilile ukupanga utuluwi nu kutwika umu ng'anda zyao zyakupepela mwenemo, zino aina Izlaeli yalanga yapanga, mu misumba yonsi ino yikalanga mwenemo.

³⁰ Aina Babiloni nayo yaipangile utuluwi twakwe tuleza Sukoti Benoti. Aina Kuta nayo yapanga utuluwi twakwe tuleza Nelegali. Aina Hamati nayo yapanga kaluwi ka Asyima.

³¹ Aina Aavi nayo yapanga akaluwi kakwe tuleza Nibiazi na Talitaki. Alino antu aku Sefalavaimu yene yocelanga ana yao impolelwa kuli tuleza twao, Adilameleki na Anameleki.

³² Antu yaa apa kasita kali konga kwene, yapepanga Yawe nu kusolola yasolwile antu ukufuma munoyali angaomba wakwe yasimapepo akuombela apa tuvuwa twakwe tuleza twao nu kupeela impolelwa kunotuli apa ncende zino yakapepela mwenemo.

³³ Fwandi tuti yapepanga Yawe, nu kupepa tuleza twao ukulingana ni ntambi zya mpanga zyao muno yafuma.

³⁴ Ukufika na ndakai kwene yatasazya, yacili yakatwalilila ukulondela imisango yao iyampiti. Yasipepa Yawe foo, nanti ukulondela iceo cakwe Yawe cino wayapile ukupitila mu ana yakwe Yakobo, wino watemile izina lyakwe Izlaeli.

³⁵ Yawe wapangine nayo upangano nu kuyakomelezya ati, “Mutaezya ukupepa tuleza tuze, mutatufukamila nanti uku tutumikila nanti sile ukutupeela impolelwa.

³⁶ Muce mwauvwila sile ne Yawe, uwamufumizye mu Eguputo na maka akalamba nu ulamba. Kuli nene sile akuno mufwile ukufukama nu kupeela impolelwa.

³⁷ Lyonsi muce mwalondela ivyeo vyane na masunde yane yano namulembile. Mutakalondele tuleza tuze.

³⁸ Alino mutaca mukilile upangano uno twapangine namwe, nupya mutapepa tuleza tuze.

³⁹ Muce mwauvwila nene ne Yawe Leza winu, nani ndamutuula lyonsi uku anisi inu.”

⁴⁰ Lelo antu yayo yatali akuvwa. Yene yatwalilile sile ukulondela imisango yao iyampiti.

⁴¹ Fwandi antu yayo yene yapepanga Yawe. Nga lelo na pa kasita akali konga kwene, yatwalilile ukupepa utuluwi twao. Na ana yao ukufika na pilelo kwene, yacili yakacita icili cimwi kwene.