2 Yamwene 16 - Amazwi Yakwe Leza 2013

Umwene Aazi uwaku Yuda

¹ Mu mwaka walenga ikumi na cinimbali uwa kuteeka kwakwe Peka umwana wakwe Lemaliya, Aazi umwana umonsi wakwe Yotamu umwene waku Yuda watandike ukuteeka.

² Aazi wali ni myaka yakuvyalwa amakumi yaili apa nsita ino watandike ukuteeka, nga wateesile mu Yelusalemu imyaka ikumi na mutanda. Wene atacitanga ivisuma pa manso yakwe Yawe ndi vino Davidi, icikolwe cakwe, wacitanga.

³ Wene wacitanga ivintu iviipe kwati sile ivyacitanga yamwene aku Izlaeli. Aazi wiyo wapile umwana wakwe umonsi wa mpolelwa yakoca, umu kulondela imisango iipe iya nko zino Yawe wazinzile umu mpanga ilya lino aina Izlaeli yingile mwenemo.

⁴ Apa ncende zino yakapepela mwenemo utuluwi, apa myamba nu mwisika lya vimiti ivikulu ivya matesi, Aazi wapelelanga penepo impolelwa nu kocela penepo ubani.

⁵ Lyene Lezini umwene waku Asilya na Peka umwana umonsi wakwe Lemaliya umwene waku Izlaeli yakatwike nu kuyalwisya umusumba wa Yelusalemu nga yazanza nu kuuzinguluka, lelo yatacimvizye Aazi.

⁶ Apa nsita kwene ilya, Lezini umwene waku Asilya apoka umusumba wa Eloti nu kuzinga Ayuda aikalanga mwenemo. Aina Edomu ayano lyene yakukila mwenemo. Ali vino yikala mwenemo ukufika na pilelo kwene.

⁷ Aazi atuma inkombe kuti zikanene Tigilati Pilesa umwene wa ina Asilya ziti, “Nene muomvi wako, umwanako. Si angala uwize untuule ku mwene waku Asilya nu mwene waku Izlaeli, yao ati yanzunya muno.”

⁸ Alino Aazi atoola siluva na zaabu, vino vyazanyilwe mu Ng'anda ikulu yakwe Yawe, nu mu vipao vyakwi sano, nga avituma wa wila ku mwene wa mpanga ya Asilya.

⁹ Umwene wa ina Asilya nawe amuuvwa. Akatuka aya azanza umusumba wa Damasiko nu kuupoka. Asenda antu aikalanga mwenemo wa afungwa, ayatwala uku Kili nga akoma na Lezini.

¹⁰ Lyene Aazi aya uku Damasiko uku kukomenkanya Tigilati Pilesa umwene waku Asilya. Alino atumila simapepo Uliya icipimo ca kavuwa wa cilangililo cakwe cico cino caya vivi kwene sile ndi muno kakuulilwa.

¹¹ Uliya nawe ali pakukuula kavuwa wakwe kaka kwene nu kukamalila zuwazuwa lino umwene Aazi atacili afike, ukulingana nu wanziko uno umwene Aazi wamupile ukufuma ku Damasiko.

¹² Lino Aazi wawelulwike ukufuma ku Damasiko, wiza walolekesya kavuwa ukuti katikasila.

¹³ Fwandi lyene nawe ukwaula ukusumba ni nsita apelela penepo uwila wakoca nu wila wa mbezu, nu kupongolwela penepo uwila wa vyakumwa, nga akanyila penepo nu wazi wa wila wa utandano.

¹⁴ Kavuwa akapangilwe Yawe, kene kali aka mukuwa, nga kayelile ulunga na pa manso yakwe Yawe, nako akafumya apa nkolelo ya Ng'anda ikulu yakwe Yawe. Alino akapalamika umupipi na kavuwa nupya uku lusansa lwi kasa limani.

¹⁵ Alino Aazi apeela simapepo Uliya icipope ati, “Apa kavuwa kakalamba apano umaocelanga uwila wakoca akatondo pamwi nu wila wa mbezu amanguzi. Ukwika penepo nu wila wakoca uwa mwene pamwi nu wila wakwe uwa mbezu, nga nu wila wakoca uwa antu yonsi amu mpanga ilya, nu wila wao uwa mbezu nu wa vyakumwa. Lyene usanse uwazi apa kavuwa uwa wila wakoca nu wa mpolelwa. Lelo kavuwa ka mukuwa kene ungampaatwila nenga, apano tumaombelanga ivyakupendola.”

¹⁶ Uliya atali umukanyi, nga acita vyonsi ndi muno umwene Aazi wamunenyile.

¹⁷ Aazi pali pakupangulula ingolofwani zya mukuwa zino zikaombela mu Ng'anda ikulu yakwe Yawe nu kusezya utubeseni utwali apapela. Alino atoola ni tanki lya mukuwa, ilyali apapela ya matundu ya ng'ombe ikumi na ziili izyapanzilwe ni cela ca mukuwa kwene, aika apa mufula wiwe.

¹⁸ Alino apakusansamusya umwene waku Asilya, Aazi afumya icintamba camu Ng'anda ikulu yakwe Yawe, cino yapanzile wa cilimba ca wene, pamwi nu mulyango uwa kufumila ukunzi (uku cimbusu)

¹⁹ Ivintu vyuze vyonsi vino Aazi wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Yuda.

²⁰ Aazi asuka afwa, nga yamuzika mu musumba wakwe Davidi ku nzisi ya vikolwe vyakwe. Lyene Hezekiya umwana wakwe umonsi amupyana pa cilimba ca wene.