2 Yamwene 14 - Amazwi Yakwe Leza 2013

Amaziya umwene waku Yuda

¹ Mu mwaka wakwe ciili uwa kuteeka kwakwe Yeoasyi umwana wakwe Yeowazi umwene waku Izlaeli, ali lino Amaziya umwana wakwe Yoasyi watandike ukuteeka impanga ya Yuda.

² Wene wali ni myaka yakuvyalwa amakumi yaili na isano apa nsita ino watandike ukuteeka, nga wateesile mu Yelusalemu imyaka amakumi yaili na fundimbali. Nyina wali a Yeoadani, nupya wafumile umu Yelusalemu kwene.

³ Amaziya wacitanga ivintu visuma pa manso yakwe Yawe. Lelo kwene atali wakwe Davidi icikolwe cakwe. Wene walondile mu lwazo lwakwe isi Yoasyi vino wacisile.

⁴ Ata ongolwile incende zino yakapepela mwenemo. Na antu nayo yatwalilile sile vivi kwene ukupeelela penepo impolelwa nu kocela ubani ku ncende zizi kwene.

⁵ Pacisila lino Amaziya wizile aya apa wene, nu wene wakwe wakoma, wene wakomile ivilolo ivyakomile isi Yoasyi.

⁶ Lelo ana yao yene atayakomile foo, apa kulondela isunde ilya lembwa mu lupapulo lwa Masunde yakwe Mose mumo muno Yawe akuti, “Yaisi ya ana yatalinzile kukomwa pa maifyo ya ana yao, nanti ana nayo yatalinzile kukomwa pa maifyo yakwe yaisi. Cila muntu alinzile wafwa apa maifyo yakwe umwisikulu.”

⁷ Lyene Amaziya akoma na ina Edomu amazimbi ikumi, umu Cifoloma ca Musilya. Lino yalwanga, Amaziya apokolola umusumba wa Sela, autemela ni zina lyakwe Yokotele, ndi vino ukaamwa na pilelo kwene.

⁸ Alino Amaziya umwene waku Yuda atuma inkombe kuli Yeoasyi umwana wakwe Yeowazi, nupya umwizikulu wakwe Yeu umwene waku Izlaeli, amunena kuti amusosye apa kuvwanga ati, “Iza kuno tupezyanye nawe.”

⁹ Lelo Yeoasyi awezya amazwi kuli Amaziya umwene waku Yuda, ati, “Pali kalai, apa mwamba waku Lebanoni pali icipupa ca myunga cico icatumile intumi uku mukelide uutali sana umu Lebanoni amazwi iciti, ‘Twalizya umwana wako kaci ku mwanane umulumendo.’ Lelo lino icilyanyi caku Lebanoni cikupita, icisya calyatola icipupa cico ica myunga.

¹⁰ Ali cino wemo we Amaziya, wewe wacilumba apamulandu wakucimvya kuno wacimvizye aina Edomu. Ale fwandi yame walukuyuvwa vivyo kwene mu kucimvya kwako. Nupya nkukunena wemo uwikala sile ukwako kuko kwene. Uzye pacani cino ungasonsomba ulwete ulwakuti ukailetelele sile, umu kutaila sile umu antu yako aina Yuda?”

¹¹ Nanti cali vivyo Amaziya wene wakanyile ukuvwa umwene Yeoasyi pamwi na antu yakwe ali pakukatuka nu kuya ku kulwa na Amaziya umwene waku Yuda. Amaumba yonsi a vita yakomenkine ku Beti Syemesyi umu mpanga yakwe Yuda.

¹² Ivita vyakwe Amaziya iyavicimvya ku vita vya ina Izlaeli, nga ivyutukila nu kumwao.

¹³ Yeoasyi alema na Amaziya umwene waku Yuda, umwana wakwe Yoasyi, umwana wakwe Aaziya nu kumutwala ku Yelusalemu. Alino Yeoasyi aya aomola ni linga ilyacingilile umusumba wa Beti Syemesyi, lino mu uutali lyali amamita imyanda iili, ukutandikila apa mpongolo yakwe Efulemu ukuyafika apa mpongolo ya cinkonci.

¹⁴ Alino asenda icuma cakwe siluva na zaabu wino wazanyile kumwi ni viombelo vyamu Ng'anda ikulu yakwe Yawe, ni vyaku cipao ca kwisano. Wene wasenzile na antu ali umu uzya nga aswilila ku Samaliya.

¹⁵ Ivintu vyuze vyonsi vino Yeoasyi wacisile, ni milimo yakwe yonsi, na vino watukwite, ukwika penepo ni nkondo ino walwisizye Amaziya umwene waku Yuda, vyalembwa mu lupapulo lwa Milandu yakwe Yamwene aku Izlaeli.

¹⁶ Yeoasyi afwa nga yamuzika ku nzisi zino yazikangako yamwene aku Izlaeli, uku Samaliya. Lyene Yeloboamu, umwana wakwe umonsi amupyana pa cilimba ca wene.

Imfwa yakwe Amaziya umwene waku Yuda

¹⁷ Amaziya umwana umonsi wakwe Yoasyi umwene waku Yuda watenzi imyaka ikumi na isano apacisila ca mfwa yakwe Yeowazi umwene waku Izlaeli.

¹⁸ Ivintu vyuze vyonsi vino Amaziya wacisile, vyalembwa mu lupapulo lwa Milandu yakwe Yamwene aku Yuda.

¹⁹ Antu yamwi amu Yelusalemu yakatukilanga Amaziya, nu kulonda uku mukoma. Fwandi nawe ali pakupuukila uku musumba wa Lakisyi. Lelo nako kwene anisi yakwe yatuma antu yamulondelela nga kuku kwene akuno yamukoma.

²⁰ Apa kumuwezya ku Yelusalemu yamusendile pa mfwalasi, nu kwiza muzika ku nzisi ukwazisilwe ivikolwe vyakwe, mu musumba wakwe Davidi.

²¹ Lyene aikazi amu Yuda yonsi ali pakwikala pansi nu kusonta Azaliya ukuya umwene mu cifulo cakwe isi Amaziya. Pa nsita ilya Azaliya wali ni myaka ikumi na mutanda yakuvyalwa.

²² Walanga isi wafwa, Azaliya apokolola umusumba wa Eloti, aukuululula nga auwezezya ku ikazi yamu mpanga yakwe Yuda.

Umwene Yeloboamu wakwe ciili waku Izlaeli

²³ Mu mwaka walenga ikumi na isano uwa kuteeka kwakwe Amaziya umwana wakwe Yoasyi umwene wa mpanga yakwe Yuda, Yeloboamu umwana umonsi wakwe Yeoasyi umwene waku Izlaeli watandike ukuteeka mu Samaliya. Wene wateesile mu Samaliya imyaka amakumi yani na onga.

²⁴ Wene wifyanga pa manso yakwe Yawe nupya atatiile ukucita iviipe vino Yeloboamu umwana umonsi wakwe Nebati wacitanga, vivi kwene vino walenzile aina Izlaeli ukwifya.

²⁵ Yeloboamu umwana wakwe Yeowazi nawe wapokolwile impanga yonsi iyo iyali iya ina Izlaeli mpiti, ukutandikila sile uku nzila yaku Lebo Hamati lwaku katutu, ukufika na kuli Yemba wa Musilya. Ali vino Yawe, Leza wa ina Izlaeli walavile umuomvi wakwe, Yona umwana wakwe Amitai, kasema waku Gati Hefeli.

²⁶ Yawe Leza waweni vino aina Izlaeli yaculanga. Nupya kutali nanti wenga uwakuyatuula foo.

²⁷ Lelo Yawe wene atalondanga ukukoma aina Izlaeli yonsi foo. Icalenzile nu kuti ayakulule ukupitila umu mwene Yeloboamu umwana wakwe Yeoasyi.

²⁸ Ivintu vyuze vyonsi vino Yeloboamu wacisile, ni milimo yakwe yonsi, na vino watukwite ivya vita, ukwika penepo na vino wapokolwile nu kuwezezya aina Izlaeli umusumba wa Damasiko nu wa Hamati, iyali iyakwe Yaudi, vyalembwa mu lupapulo lwa Milandu yakwe Yamwene aku Izlaeli.

²⁹ Yeloboamu afwa, nga yamuzika uku nzisi ya vikolwe vyakwe, aali yamwene aku Izlaeli. Alino Zakaliya umwana wakwe umonsi amupyana pa cilimba ca wene.