2 Yamwene 13 - Amazwi Yakwe Leza 2013

Yeowazi umwene waku Izlaeli

¹ Umu mwaka walenga amakumi yaili na itatu wa kuteeka kwakwe Yoasyi umwana wakwe Aaziya umwene waku Yuda, Yeowazi umwana umonsi wakwe Yeu walasikwe pa cilimba ca wene waku Izlaeli mu Samaliya, nga wateesile imyaka ikumi na cinimbali.

² Wene wifyanga pa manso yakwe Yawe. Atatiile iviipe vino Yeloboamu umwana wakwe Nebati wacitanga, nupya walenzile na ina Izlaeli kwene ukwifya mu musango uli umwi kwene.

³ Yawe nawe ali pakusokela aina Izlaeli icakuti aleka nu kuti Hazaeli umwene waku Asilya, pamwi na Beni Hadadi umwanakwe lyonsi yacimvya aina Izlaeli.

⁴ Lyene Yeowazi walenzile uwelelo kuli Yawe, nga Yawe nawe auvwa ukupapata kwakwe apakulola vino aina Asilya yazunya muno aina Izlaeli.

⁵ Alino Yawe atumila aina Izlaeli intunguluzi iyo iyaile iyakulula uku uzunyo wa ina Asilya. Ukufuma papa ali lino aina Izlaeli yatandike ukwikala umutende mu mang'anda yao, ndi vino yikalanga mpiti.

⁶ Lelo kwene aina Izlaeli yatatile ukucita ivintu iviipe vino umwene Yeloboamu wasile wayakomelezya. Iyatwalilila nu kupeela intaizyo kuli ka Asyela. Nga nu unkolanya wakwe Asyela nao wasile mumu kwene mu Samaliya.

⁷ Apa nsita iyo Yeowazi atakweti ivita ivingi. Walanga pasyala sile ivita ukufika nu kumpendwa ya makumi yasano, yao aomvyanga imfwalasi, alino amaceleta ikumi lyonga nga alino ni vita vyapansi navyo amazimbi ikumi. Icalenzile vivyo vyonsi umulandu wakuti umwene waku Asilya walanga wakoma ivita nyanya nu kulavilyatola ungati akulyatola ulukungu.

⁸ Ivintu vyuze vyonsi vino Yeowazi wacisile, ni milimo yakwe yonsi, na vino watukwite, vyalembwa mu lupapulo lwa Milandu yakwe Yamwene aku Izlaeli.

⁹ Na lino Yeowazi wizile afwa, yamuzisile mu musumba uwamu Samaliya. Yeoasyi umwana wakwe amupyana pa cilimba ca wene.

Yeoasyi umwene waku Izlaeli

¹⁰ Mu mwaka walenga amakumi yatatu na cinimbali uwa kuteeka kwakwe Yeowazi umwene waku Yuda, ali mwaka uno Yeoasyi umwana wakwe Yeowazi watandike nawe ukuteeka aina Izlaeli mu Samaliya. Nu kuteeka wateesile umu musumba wa Samaliya pa myaka ikumi na mutanda.

¹¹ Wene wifyanga pa manso yakwe Yawe nupya atatiile ukucita iviipe vino Yeloboamu umwana wakwe Nebati wacitanga, vivi kwene vino walenzile aina Izlaeli ukwifya.

¹² Ivintu vyuze vyonsi vino Yeoasyi wacisile, ni milimo yakwe yonsi, na vino watukwite, nga nu kulwisya kuno walwisizye Amaziya umwene waku Yuda, vyalembwa mu lupapulo lwa Milandu yakwe Yamwene aku Izlaeli.

¹³ Yeoasyi afwa, nga yamuzika mu musumba wakwe Davidi ku nzisi ya vikole vyakwe. Yeloboamu umwana wakwe umonsi aliwe wamupyanyile apa wene. Yeoasyi yamuzisile ku nzisi zino yazikangako yamwene amu Izlaeli mu musumba wa Samaliya.

Imfwa yakwe Elisya

¹⁴ Kasema Elisya walwile indwala yakumulya. Lino wasikilanga, Yeoasyi umwene waku Izlaeli waile ku kumufwilizya. Alino alila nu kulila ati, “Owe tata we! Tata we! Awewe waali kacingilila wamaka uwa ina Izlaeli!”

¹⁵ Nga lelo Elisya wene anena Yeoasyi ati, “Wemo ungala utoole sile ulapwa ni nceto.” Yeoasyi nawe atola.

¹⁶ Elisya ali vino wanenyile umwene wilya kuti atinte ulapwa. Umwene na we ali vino wacisile, nga zuwazuwa Elisya amulema api kasa.

¹⁷ Nga lyene umwene ayula inzota wakwe muno Elisya wamunenyile. Wene wayuzile iwindo ilya yelile ulunga ni mpanga yaku Asilya. Alino Elisya amunena ati, “Ali kuno lasa uluceto.” Lino umwene walasa kweneko uluceto, Elisya ati nu kuti, “We luceto lwakwe Yawe luno alacimvizya kweneko aina Asilya. Ulalwisya aina Asilya umu musumba wakwe Afeki, nu kuyacimvya ulayacimvya.”

¹⁸ Alino Elisya anena umwene ati, “Tola inceto nazyuze.” Nga umwene Yoasyi atola. Alino Elisya anena umwene waku Izlaeli wilya ati, “Lasa pansi inceto zizyo.” Alino umwene Yeoasyi afiika inceto amaila yatatu, ata nu kuta.

¹⁹ Lyene kasema Elisya ali pakukalipila umwene wilya ati, “Ufiika amaila yasano nanti mutanda, lyene ngano wacimvya aina Asilya. Lelo apakufiika amaila yatatu sile, ulayacimvya vivyo kwene sile amaila yatatu.”

²⁰ Pacisila cakulanda vii, vivyo kwene Elisya ali mifwile, nga iyamuzika nu kumuzika. Imyaka sile yonsi amaumba ya ina Moabu yizanga uku kuzanza impanga ya ina Izlaeli.

²¹ Apa nsita imwi lino aina Izlaeli yamwi yazikanga umuntu umwi, kuno yati, iyalola iumba lya ina Moabu! Lilyo kwene iyasya yasumba icala ca muntu wilya mwi lindi lino yazisilemo Elisya, nga iyapuuka. Lino icala caya caponela apa mafupa yakwe Elisya, umuntu wiyo uwafwile atutuluka, azyuka, akatuka nga aimilila.

Inkondo iya ina Izlaeli na ina Asilya

²² Umwene Hazaeli uwaku Asilya wazunyizye aina Izlaeli sana apa myaka yonsi ino Yeowazi wali apa wene.

²³ Lelo Yawe lyonsi kwene wayanga na mizu apa ina Izlaeli. Wene atalondanga ukuyakoma. Lyonsi wayatuulanga pamulandu sile wa cipangano cino wapangine na Abulaamu, na Isaki, na Yakobo. Wene atatala watazyela antu yakwe foo!

²⁴ Lino Hazaeli umwene waku Asilya wafwa, Beni Hadadi umwana wakwe amupyana pa cilimba ca wene.

²⁵ Yeoasyi umwana wakwe Yeowazi nawe amaila yatatu ali pakucimvya Beni Hadadi, umwana wakwe Yeowazi. Apokolola ni misumba ino Beni Hadadi umwana umosi wakwe Hazaeli walanga wapoka pa nsita imwi lino Yeowazi isi wakwe Yeoasyi wali apa wene.