2 Yamwene 12 - Amazwi Yakwe Leza 2013

Yoasyi umwene waku Yuda

¹ Mu mwaka walenga cinimbali wa kuteeka kwakwe Yeu, Yoasyi walasikwe pa cilimba ca wene, nga wene wateesile mu Yelusalemu imyaka amakumi yani. Nyina wali a Zibiya ukufuma ku musumba wa Belisyeba.

² Umu umi wakwe onsi, Yoasyi wacitanga ivisuma ivyakuzanzya Yawe, nu wamusundanga vyonsi vii asimapepo Yeoyada.

³ Lelo kwene incende zino yakapepela mwenemo yatazyononyile foo. Na antu nayo yatwalilile ukupeelela penepo impolelwa nu kocela ubani ku ncende zizi kwene.

⁴ Mu nsita kwene ilya Yoasyi ali pakupeela ilamulo kuli yasimapepo ati, “Ulupiya ulumafumanga mu wila uo uno yakupeela ku Ng'anda ikulu yakwe Yawe, luno yapimila cila muntu ukuleta, na zino cila muntu akaipingula ukupeela pa utailo wakwe,

⁵ cila simapepo angazipoka ku antu yano yakalolekesya penepo. Alino ulupiya lulo yangaluomvya kuli yasimapepo kwene, uku kuzifya nu kulungisya ivyononeke uku Ng'anda ikulu yakwe Yawe, wakwe muno cingalondekwa.”

⁶ Nga lelo walanga papita imyaka amakumi yaili na itatu ukufuma pano Yoasyi watandikile ukuteeka, yasimapepo yayo kutali nanti cimwi cino yatazile iyalungisya ku Ng'anda ikulu yakwe Yawe.

⁷ Ali cino umwene Yoasyi aama simapepo Yeoyada pamwi na yasimapepo yauze nga ayuzya ati, “Uzye cino musizifizya ivyononeka ku Ng'anda ikulu yakwe Yawe icani? Ukufuma ilelo kwene mumata ukusunga ulupiya luno mukapoka. Lyene mulinzile ukulutwala ku kuzifya sile Ng'anda ikulu yakwe Yawe.”

⁸ Yasimapepo nayo yatali akanyi, yazumilizya cico. Alino yazumilizye ukuti yene yatakuzifyanga ivyononeka ku Ng'anda ikulu yakwe Yawe, suka sile antu yauze.

⁹ Alino Yeoyada apanga imbokosi, nga atulula ni cipongo apapela. Alino atoola imbokosi iyo aika pa mbali ya kavuwa, lwa kwilunji ukwayelile uwingililo wakwe cila muntu akwingila mukasi ka Ng'anda ikulu ilya. Simapepo wensi uwali paluti wasumbilangamo impiya zyonsi zino apefi yatuulanga.

¹⁰ Ulupiya nga lwavula sana umu mbokosi, kalemba uwakwisano pamwi na Simapepo Mukulu, yayanga kweneko nu kusungulula siluva alino yamupima pakuti yamanye icipimo vino wanyoma.

¹¹ Ndi yamala umulimo wa kupima nu kumanya vino zili, alino yazipeela kuli yao aangalilanga umulimo wakuzifya Ng'anda ikulu yakwe Yawe. Nayo lyene ali vino yalipilanga yakapala ya mbao, na yakakuula aombanga mu Ng'anda ikulu yakwe Yawe.

¹² Alino yalipila yakaconga ya mawe na yakalepula ya mawe, nu kukala imbao na mawe pamwi na tonsi utwalondekwanga uku kuzifya Ng'anda ikulu yakwe Yawe.

¹³ Kutali ulupiya ulwasumbwangwa uku kukala amabeseni yakwe siluva, nanti ingeso zyakukanyizizya, ni ntandala nanti iciviya icili consi cakwe zaabu nanti siluva icalesilwe ku Ng'anda ikulu yakwe Yawe.

¹⁴ Impiya zyapeelwanga zyonsi ku yaomvi, nayo yaziomvyanga ku kuzifya Ng'anda ikulu yakwe Yawe.

¹⁵ Alino nanti ukusakamikwa yatasakamikwe foo, pano antu yano yapiile umulimo wakulolekesya pali vii yali acumi nupya afumaluke.

¹⁶ Ulupiya ulwapelwanga uku kulipa ku milandu nanti uku kuzifya vino vyativivulungana, lwene yatalutwalanga ku Ng'anda ikulu yakwe Yawe. Lelo lwayanga sile kuli yasimapepo.

¹⁷ Apa nsita kwene iyo, Hazaeli umwene waku Asilya waile azanza umusumba wa Gaati nu kuupoka. Nupya ala akupanga nu kuzanza Yelusalemu.

¹⁸ Lelo Yoasyi umwene waku Yuda watozile vyawila vyonsi vyamuzilo vino amukolelile yatuuzile. Akuli kuti vino Yeosafati, Yeolamu na Aaziya yasile yavituula kuli Yawe. Alunda penepo uwila wakwe na zaabu wensi uwali mu vipao vya Ng'anda ikulu yakwe Yawe nu kwisano kwene. Lyene avituma ku mwene Hazaeli wa wila wakwe. Alino nawe Hazaeli umwene waku Asilya ali pakufuma mu Yelusalemu pamwi ni vita vyakwe.

¹⁹ Ivintu vyuze vyonsi vino Yoasyi wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Yuda.

²⁰ Ukuya kwene yamusika ya vita vyakwe yamusangukile nu kumupangila sana. Yakomile Yoasyi uku Beti Milo, umu museo uno yakatentemukila ukuya ku Sila.

²¹ Yamusika amukomile yali a Yozabadi umwana umonsi wakwe Syimeati, na Yeozabadi umwana umonsi wakwe Syomeli. Yoasyi yamuzisile ku musumba wakwe Davidi ku nzisi ya vikolwe vyakwe. Nga Amaziya umwana wakwe umonsi amupyana pa cilimba ca wene.