2 Yamwene 11 - Amazwi Yakwe Leza 2013

Ataliya namwene waku Yuda

¹ Walanga Ataliya nyina wakwe Aaziya walola ukuti umwana watafwa, nawe ali pakupeela ilamulo lyakukoma antu yonsi akazi ka mwene.

² Kwapuswike sile Yoasyi. Nupya nawe kwene kwasile sile kwempe, ngano yamukomile pamwi nauze. Uwamupuswisye sile a Yeosyeba nyinasenge. Yeosyeba wiyo wali umwana wakwe Yolamu nupya wali a kaci wakwe Aaziya. Yeosyeba wapuswisye Yoasyi mwi umba lya ana ya mwene yao yano yakomolwanga, nga aya amufisa pamwi nu mulezi, mu muputule wa kulala mwenemo. Umuputule uo wayelile mu ng'anda yaku pepela mwenemo, mumo muno Ataliya atange amulole nu kumukoma.

³ Pa myaka mutanda ino Ataliya wateesile impanga, Yoasyi wasungwanga sile nu mulezi wakwe mumu kwene muno yamufisile mu ng'anda yaku pepela mwenemo.

⁴ Lelo mu mwaka wakwe cinimbali simapepo Yeoyada atuma akuya ama yamusika akalamba ya vita alindanga namwene alino na yakalinda ya kwisano. Nayo ali pakwiza ku ng'anda ya kupepela mwenemo. Alino Yeoyada apangana nayo upangano ayanena na kuti yalape pa manso yakwe Yawe uku Ng'anda ikulu yakwe Yawe. Lyene ali pakuyalanga Yoasyi umwana wa mwene wino wafisile.

⁵ Ayapeela ni lamulo ati, “Lilyo lyonsi lino mwiza ku kuomba imilimo ya luti lwinu pa Sabata, iumba linu lyonga lilinzile lyalonda ukwi sano.

⁶ Iumba linu lyuze nalyo lilinzile ukulonda pa mpongolo ya Suli. Alino iumba lyuze lyakwe citatu nalyo lilinzile kwimilila kunzi yakwe yakalinda kwene yayo.

⁷ Alino lyene amaumba yaili asiomba uluti lwa pa Sabata nayo yalinzile ukulonda pa Ng'anda ikulu yakwe Yawe, kuti yacingilile umwene.

⁸ Mulinzile ukwimilila apipi sana nu mwene, na cila muntu ala watazunzula ulupanga lwakwe. Wiyo wensi wino cala camukumba wapalama umwene, mwemo ukumukoma sile. Mwasopa umwene ukuli konsi kuno akuya.”

⁹ Fwandi yamusika ya vita yaya yonsi ali pakulondela ilamulo lino Yeoyada wayapile. Alino yamuletela na antu amaumba ndi muno wavwangile, akwinuka alino na akuya pa ncito pa wanda wi Sabata. Yonsi kwene yaya kuli Yeoyada simapepo.

¹⁰ Yeoyada nawe apeela yamusika akulu ya vita amasumo ni visyangu vino vyali ivya mwene Davidi, ivyasunzilwe mu Ng'anda ikulu yakwe Yawe.

¹¹ Ukwika penepo na antu akuti yalinda nu kucingilila umwene uku nkolelo ya Ng'anda ikulu yakwe Yawe.

¹² Yeoyada ali pakufumizya Yoasyi umwana wa mwene apanzi, nga amuzwika ni ngala ya wene, amupeela nu lupapulo lwa masunde ya pa cilimba ca wene. Fwandi ali vino lyene yamupasile amafuta nu kumulasika apa wene. Antu yonsi ali pakukomela amakufi nga yapunda yati, “Si kawala we mwene!”

¹³ Walanga namwene Ataliya uvwa icongo cakwe yakalinda ni ca antu, aya ku Ng'anda ikulu yakwe Yawe.

¹⁴ Kuku akuno alola umwene mupya aimilile lwamu lucesi, lwapa wingililo wa Ng'anda ikulu yakwe Yawe ndi muno lutambi lwayelile. Lilyo ala yamusika ya vita na yakalizya ya ntandala yaimi pipi nu mwene wiyo, nga antu yonsi amu mpanga ilya ala yakuzanga nu kulizya intandala. Lyene Ataliya pakulola vivyo alepula vyakuzwala vyakwe nga apunda ati, “Wansangukila! Wansangukila!”

¹⁵ Lyene simapepo Yeoyada apeela ilamulo kuli yamusika akulu ya vita yaya ati, “Mufumizini kunzi pakasi ka milongo yakwe yakalinda, nu kukomola wensi akwezya uku mupususya.” Pasi pano simapepo wavwanzile ati, “Mutamukomela mu Ng'anda ikulu yakwe Yawe.”

¹⁶ Acino antu yalya yalema Ataliya wilya, iyamutwala kwi sano nga lino yafika kuku, yamukoma pa mpongolo ikaamwa ukuti Mpongolo ya Mfwalasi.

Yeoyada wazifya imipepele

¹⁷ Lyene Yeoyada acita upangano pakasi kakwe Yawe nu mwene na antu yakwe, ukuti yene yamaya antu kololo yakwe Yawe. Wene wacisile nu upangano pakasi ka mwene na antu.

¹⁸ Antu yonsi amu mpanga ilya yaya ku ng'anda ikulu yakwe Baali nga yaitamola. Yavungola tuvuwa nu tuluwi nga yakoma Matani simapepo wilya wakwe Baali apa nkolelo ya tuvuwa kwene tuto. Lyene simapepo Yeoyada aika yamalonda ku Ng'anda ikulu yakwe Yawe, akulonda kweneko.

¹⁹ Alino lyene aliwe pamwi na yamusika akulu ya vita, na yakalinda yamwene, na yakalinda ya kwisano, na antu yonsi yasukilila umwene. Yafuma ku Ng'anda ikulu yakwe Yawe, mpaka yamufisya ukwisano, yingilila mu mpongolo yakwe yakalinda. Alino Yoasyi aikala pa cilimba ca wene,

²⁰ na antu yonsi amu mpanga ilya yazanga. Lyene mu musumba ulya mwali cele, pamulandu wakuti Ataliya watakomwa ku lupanga kwisano.

²¹ Yoasyi wali ni myaka cinimbali lino watandike ukuteeka.