2 Yamwene 1 - Amazwi Yakwe Leza 2013

Ukulanda pali Aaziya na Eliya

¹ Pacisila ca mfwa ya mwene Aabu, aina Moabu yasangukila aina Izlaeli.

² Uwanda umwi umwene Aaziya waponyile apipaala lipapatale li sano lyakwe, mu musumba wa Samaliya. Wene waicisile sana. Aaziya ali pakutuma inkombe zimwi kuli Baali Zebubi, kaleza ka antu aku Ekiloni, kuti yakasapole pakumanya ndi cakuti amapola nanti foo.

³ Lelo umungeli wakwe Yawe anena Eliya umwina Tisyibe ati, “Katuka yanga ukakomenkanye inkombe zya mwene waku Samaliya nga uzyuzye uti, ‘Uzye icani icalenga kuti uye ku kusapola kuli Baali Zebubi, kaleza ka antu aku Ekiloni? Uzye mukwelenganya ukuti mu mpanga ya Izlaeli mutaya Leza, vwile?’

⁴ Acino muye mukanene umwene muti Yawe wavwanga wati, ‘Wemo casila usikupola, lelo icumi kwene umafwa!’ ” Alino Eliya apita.

⁵ Inkombe nazyo ali pakuswilila ku mwene Aaziya nawe azyuzya ati, “Uzye icani calenga kuti muweluluke zuwa?”

⁶ Inkombe zizi nazyo zyasuka ziti, “Twalitwakomenkana nu muntu umwi, ali wino watunena ukuti tuwele twize tukunene tuti, ‘Yawe wavwanga ukuti uzye icani icalenga kuti uye ku kusapola kuli Baali Zebubi, kaleza ka antu aku Ekiloni? Uzye mukwelenganya ukuti mu mpanga ya Izlaeli mutaya Leza, vwile? Wemo casila usikupola, lelo icumi kwene umafwa!’ ”

⁷ Lyene umwene auzya inkombe zizya ati, “Uzye umuntu kwene wiyo wino mwalimwakomenkanya walakuloleka uli?”

⁸ Nazyo zyaasuka ziti, “Muntu wiyo walazwite umwingila uwapangilwa ni mpapa ya nyama, azwite nu musipi wa mpapa.” Aaziya nawe avwanga ati, “Iye! A Eliya umwina Tisyibe!”

⁹ Alino umwene atuma mukalamba wa vita wenga pamwi ni vita amakumi yasano, kuti vikasende Eliya. Mukalamba wa vita wilya ali pakuyazana Eliya ala ali pa mwamba papela. Ali pakumunena ati, “We muntu wakwe Leza, umwene akuti ika.”

¹⁰ Eliya nawe aasuka musika mukulu ati, “Ndi cakuti nene muntu wakwe Yawe, umoto kawike likwene ukufuma kwiyulu wize ukoce, ufwe pamwi na antu yako ya amakumi yasano!” Lilyo kwene umoto ufuma kwiyulu nga iwoca umukalamba wa vita pamwi na antu yakwe yalya amakumi yasano.

¹¹ Lyene umwene atuma musika mukulu uwa vita pamwi na antu yakwe ali amakumi yasano. Musika mukulu uwa vita wilya pali pakumunena ati, “We muntu wakwe Leza, umwene akuti ika likwene!”

¹² Lelo Eliya aasuka ati, “Ndi cakuti nene muntu wakwe Leza, su moto upone ukufuma umwiyulu nga woce wewe pamwi na antu yako amakumi yasano!” Lyene umoto wakwe Leza iupona ukufuma umwiyulu nu koca aliwe pamwi na antu yakwe yaya amakumi yasano.

¹³ Acino umwene wilya atuma musika mukulu uwa vita namuze pamwi na antu yakwe amakumi yasano. Lelo musika uwa vita wii wakwe citatu atumbela nga aya afukama pa ngazo zyakwe Eliya. Alino amupapata ati, “We muntu wakwe Leza, napapata utangonona pamwi na antu yane yaa amakumi yasano.

¹⁴ Lola, inkolelo umoto waponyile ukufuma umwiyulu nu koca yamusika yanji yaya kumwi na antu yao yonsi. Acino tukulenga uye nu luse kunotuli, mutatonona.”

¹⁵ Lyene umungeli wakwe Yawe anena Eliya ati, “Tentemuka upite nawe. Utamoopa foo.” Acino Eliya akatuka nga atentemuka apita nawe ku mwene.

¹⁶ Alino Eliya anena umwene ati, “Yawe wavwanga wati, ‘Pamulandu wakuti wali watuma inkombe kuti zikuuzye kuli Baali Zebubi, kaleza ka antu aku Ekiloni, kwati limwi mu Izlaeli mutaya Leza wakuti unguzya, fwandi wemo lyene utakupola awe. Lelo umafwa.’ ”

¹⁷ Acino Aaziya afwa wakwe muno Yawe wavwangile muli kasema Eliya. Pamulandu wakuti Aaziya atakweti umwana umonsi, Yolamu amupyana pa cilimba ca wene. Cii cacitike mu mwaka wakwe ciili uwa kuteeka kwakwe Yolamu umwana umonsi wakwe Yeosafati umwene waku Yuda.

¹⁸ Ivintu vyuze vyonsi vino Aaziya wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Izlaeli.