2 Timoti 4 - Amazwi Yakwe Leza 2013

¹ Pa manso yakwe Leza nga na Klistu Yesu, wino alapingula antu aumi na afwe, nga nu kwiza ku kuteeka, nkukupeela ilamulo nu kukupapata cuze,

² nkuti kosola ilandwe, komaila penepo mu nsita ino antu yatakulonda na ino yakulonda. Nupya lino ukusambilizya wasinila, wanenola, wakomelezya lelo wacita vii vyonsi mu kuteeka mwenzo.

³ Insita iliiza lino antu yatalauvwa ku usambilizyo wa cumi. Lelo yene yalalondela vilondwa vyao aisikulu, nupya yalalonda yakasambilizya aingi yano alayazanzya pa kuyanena sile vintu vino yene yakulondesya kuuvwa.

⁴ Yene yalafumako ku kuuvwa cumi nu kusumba mano ku tulai.

⁵ Lelo wemo ulinzile kuisunga muli vyonsi. Uwaposya mu macuzi yonsi. Omba mulimo uwakukosola Ilandwe Lisuma nga nu kuomba ncito yako yonsi wa muomvi wakwe Leza.

⁶ Ndakai insita yatifika yakuti nkomwe wa mpolelwa. Nsita yatifika yakuti nemo insye umi uu.

⁷ Nemo nalwisya ningo mu kusimula, nupya nene wakutailwa.

⁸ Acino cilambu ca kucimvya kwane cino cikundolela, ingala ya wololoke ino Mwene kapingula mololoke alampeela pa Wanda ulya. Nupya atalapeela sile nene, lelo alapeela na yao amutemwa, yano akalolela kwiza kwakwe nupya.

Mazwi yakwe Paulo umwisikulu

⁹ Ezya na maka kwiza kunondi zuwa.

¹⁰ Demasi wene watemwa ivyamu nsi nupya wamfutatila, waya ku Tesalonika. Klesensi wene wapita ku Galatiya, Tito nawe ku Dalamatiya.

¹¹ Suka sile Luka uwasyala nani. Toola Mako mwize nawe kuno, pano wene angangazwilizya mu mulimo.

¹² Natuma Tikikasi ku Efeso.

¹³ Lino uliza, uce undetele ikoti lyane lino nasile kuli Kapusi ku Tuloa. Uce undetele ni mpapulo kwene, maka maka zizyo izyapangwa ni mpapa.

¹⁴ Alekizanda kasula wa vyela wancitile viipe mu misango ingi. Mwene alamulambula kulingana na vino wacita.

¹⁵ Cenjela nu muntu wii, pano wene wakanyanga maka ilandwe lino twakosolanga.

¹⁶ Kusi umuntu nanti umwi uwali ku mbali yane nkolelo lino naipokolwile mu cilye. Onsi kwene yamfutatile. Nkupepa kuti Leza ayelele!

¹⁷ Lelo Leza wene atantazyezile, nupya wampile maka kuti nkosole ilandwe limalilike ku Akulukuwa yonsi kuti yuvwe. Nupya nakulwilwe ku upinguzi wa kufwa.

¹⁸ Mwene alankulula ku viipe vyonsi nga nu kunsenda mu Wene wakwe uwa mwiyulu. Aliwe kwene apelwe lulumbi manda pe! Ameni.

Kulamuka Kwakusyalikizya

¹⁹ Natuma kulamuka kwane kuli Pulisila na Akwila nga na amu ng'anda yakwe Onesifolasi.

²⁰ Elasita wene wasile mu Kolinto, lelo Tulofimo wene namusile mu Mileto, pano wene wali umulwale.

²¹ Ezya na maka kwiza lino mwela utali ufike. Yubulasi, Pudensi, Linusi, na Kuludiya yatuma kulamuka kwao, nga na ina itu yauze, aina Klistu.

²² Mwene asunge umi wako. Cikuku cakwe Leza ciye namwe mwensi.