2 Timoti 3 - Amazwi Yakwe Leza 2013

¹ Iusya ukuti mu manda akusyalikizya mulaya tusita tutale.

² Antu yalaitemwa, atemwisya impiya, yalaitumika, a cilumba, akanyati, yatalayela akwasi yao, yatalataizya, nupya yatalalonda vyauleza.

³ Yene yatalaya nu luse na mizu, yene yalaya akwakwa, alwete nupya akakate. Yalapata visuma.

⁴ Yalaya asomvi, azakantike nupya yalaya na mataki. Yene yalatemwa vyakuizanzya kuluta kutemwa Leza.

⁵ Yene yalailanga kuya apefi, lelo upefi wao utalaloleka uwa cumi. Fumako ku antu amusango uu.

⁶ Yamwi munoyali yakaya mu mang'anda ya antu nu kutumpika aya mwenemo pakuti yongole anaci atonte yano anyomelwa na maifyo yao nga nu kutungululwa ni vilondwa vya nsuna zya misango yonsi.

⁷ Anaci yaa, yakaezya lyonsi kusambilila cimwi cipya lelo yatangamanya cumi.

⁸ Wakwe vino Yanesi na Yambulesi yalwisyanga Mose, vivyo kwene antu yaa yakalwisya cumi. Antu yaa a myenzo yaukakasi nu utailo wao usi uwa mpomvu.

⁹ Lelo uwelewele wao utalayafisya kutali pano umuntu wensi alalola vino yatumpa. Vikwene avino cacitikile Yanesi na Yambulesi.

¹⁰ Lelo wemo walondela usambilizyo wane, kuteeka mwenzo kwane, kutemwa kwane, kuposya kwane,

¹¹ kuzunyiwa kuno nazunyiwe, nga na macuzi yane. Wamanya vyonsi vino vyancitikile mu Antioki, mu Ikoniamu, nga nu ku Lisitala, kuzunyiwa ukwipisye kuno naposizye! Lelo Mwene wankulwile kuli vii vyonsi.

¹² Muntu wensi wakwe Klistu wino akalonda kwikala umi wakucita vyawololoke pa manso yakwe Leza wene alazunyiwa,

¹³ nga antu aipe, nupya asomvi yene yalipisya kuluta, yala yakusomba antu yauze nga na isikulu kwene.

¹⁴ Lelo wemo twalilila sile kuya uwakutailwa mu cumi consi cino wasambiliziwe nupya cino wataila. Wamanya yano ali yakasambilizya yako,

¹⁵ nupya ukaiusya ukuti kufuma lino wali mwana munono, wemo wamanya Malembelo Amuzilo, yano yangakupeela mano akukutungulula ku kukwata utailo muli Klistu Yesu kuti akutuule.

¹⁶ Mazwi yonsi amu malembelo yene yafuma kuli Leza nupya yakaomviwa mu kusambilizya cumi, kukanya kuluvyanya, kulungika kuluvyanya, nga nu kupeela utunguluzi ku antu pa kucita vyawololoke.

¹⁷ Cii cikacitika pakuti umuntu wino akatumikila Leza angalingana nupya angaiteyanya kucita misango yonsi ya vicitwa visuma.