2 Timoti 2 - Amazwi Yakwe Leza 2013

¹ Timoti, we mwanane mu utailo. Komeleka mu cikuku cino twakwata muli Klistu Yesu.

² Maila aingi ukauvwa nkusambilizya pa manso yakwe yakambone aingi. Lyene ndakai nkulonda kuti wemo ulasike mulimo uu ku antu atailwe, yano angasambilizya antu yauze.

³ Toola imbali yako mu kucula wa musilika uwakutailwa wakwe Klistu Yesu.

⁴ Musilika wino ali pa mulimo wene akalonda kuzanzya musika mukulu. Caleka wene asyaitumpa mu vicitwa visi vya asilika.

⁵ Kusi umwi angacimvya mu cila ca kucimvyanya, suka wene atale ayele malamulo.

⁶ Mulimi wino akaombesya alinzile kuya wankolelo ukwankanyiwa vyati vizombolwa.

⁷ Elenganya pali vino nkulanda pano Mwene akweti maka akukulenga kwiluka vyonsi.

⁸ Iusya Yesu Klistu, wino uwazyukwike kufuma ku mfwa, nupya uwali uwamu mupanda wakwe Davidi, ndi vino cikasambiliziwa mwi Landwe Lisuma lino nkakosola.

⁹ Pamulandu wa kukosola Ilandwe Lisuma, nemo nkacula nu kunyepwa mu minyololo kwati nene cipondo. Lelo mazwi yakwe Leza yene yatanganyepwa mu minyololo.

¹⁰ Acino nemo nkaposya muli vyonsi pamulandu wa antu asololwe yakwe Leza. Nemo nkacita cii kuti nao kwene Klistu Yesu ayatuule nu kupokelela lulumbi lwa manda pe.

¹¹ Muvwango uwa cumi ukati, “Ndi twafwa pamwi nawe, ale lyene nupya tulaya aumi pamwi nawe,

¹² Ndi twatwalilila kuposya, ale lyene tulateeka pamwi nawe. Ndi twamukana, ale nawe kwene alatukana.

¹³ Ndi tusi akutailwa, wene amatwalilila kuya uwakutailwa pano wene atangaisomba.”

Muomvi musuma

¹⁴ Iusya antu yako cintu cii, nga nu kuyasoka pa manso yakwe Leza, kuti yataya ni vikanza. Vikanza visyacita cisuma nanti cimwi, lelo vyene vikaonona sile antu yano yakuvwako.

¹⁵ Cita cino ungacita kufikapo pakuti uvwangilwe visuma pa manso yakwe Leza, wa muomvi wino asi ni nsonyi pa mulimo wakwe, nupya wino akasambilizya ningo ilandwe lya cumi cakwe Leza.

¹⁶ Fumako kukulazyanya kukowele nupya ukwa uwelewele kuno kukafumya antu kuli Leza.

¹⁷ Kusambilizya kwa musango uu, kukoline wa mpofya itangapoziwa. Antu yaili yano akasambilizya vintu vya musango uu a Himenaesi na Filetusi.

¹⁸ Yene yasya inzila ya cumi nupya yakavulunganya utailo wakwe yao ataila apa kulanda ukuti kuzyukuka kwa afwe kwacitika mpiti.

¹⁹ Lelo mufula ukome uno Leza wika wene utangatensiwa. Nupya pa mufula kwene uwo palembwa mazwi yano yakati, “Mwene wamanya antu yakwe” nupya yakati, “Wino wensi akaitaka ukuti wene umuntu wa Mwene alinzile kuzenzuka ku kuluvyanya konsi.”

²⁰ Mu ng'anda ikulu mwaya iviya vya misango ipusanepusane. Vimwi vyapangilwa na siluva nga na vimwi na zaabu, vyuze navyo vyapangilwa ni mbao nga ni ivu. Vimwi vikaomviwa pa mulimo ucindame, nga vimwi navyo pa mulimo uwasilesile.

²¹ Muntu umwi ndi waisangulula ku vintu viipe vyonsi, wene alaomviwa mu mulimo ucindame, pano wene waipelesya kuya uwa mulimo ukulu ku musambazi wakwe. Wene waiteyanya kucita visuma vyonsi.

²² Fumako ku matunko yano ance yakaponelamo, nupya uwalwisya kucita vyawololoke, kuya nu utailo, kutemwa, nga nu mutende. Wacita cii pamwi na yao aswepa myenzo, nupya yano akalenga Mwene kuti ayazwe.

²³ Lelo wemo fumako ku vikanza vyauwelewele nupya vyaututu. Wamanya ukuti vikanza kwene vii vikaleta kulemanila.

²⁴ Muomvi wa Mwene atalinzile kulemanila. Wene alinzile kuya uwa luse kuli onsi, nupya aye kasambilizya musuma akateeka mwenzo.

²⁵ Uye mufuke lino ukulungika yao akukulwisya, pano limwi Leza angayapeela insita yakuzenzuka nu kumanya cumi.

²⁶ Alino lyene yalaelenganya ningo nga yalatuulwa ku citeyo cakwe Ciwa, wino uwayalema nu kuleka kuti yayela kulonda kwakwe.