2 Timoti 1 - Amazwi Yakwe Leza 2013

¹ Kalata kufuma kuli ne Paulo, mutumwa wakwe Klistu Yesu, ne muno nasolwilwe na Leza. Wene uwantumile ku kukosola umi uno watulaya muli Klistu Yesu.

² Kuli Timoti, mwanane mukundwe mu utailo. Leza Tata nu Mwene witu Klistu Yesu aye ni cikuku na mizu kunuli, akupeele nu mutende.

Kutaizya nu kukomeleziwa

³ Nkataizya Leza, wino nkatumikila nu mwenzo uswepe, wakwe vino vikolwe vyane vyacisile. Nemo nkataizya Leza lyonsi kwaula kwilila wewe lino nkupepa, usiku nu musanya.

⁴ Nemo nkaiusya kulila kwako, nupya nkulondesya kukulola pakuti nzangisye.

⁵ Nkaiusya utailo uwa mpomvu uno wakwata, nupya uno nyokokulu Loisi pamwi na nyoko Yunisi yakweti. Nkusininkizya ukuti nawe kwene ukweti.

⁶ Pamulandu kwene uu nkukwiusya kuomvya wila uno Leza wakupile lilyo lino nisile makasa yane panuli.

⁷ Pano Mupasi uno Leza watupeela wene usyatulenga kuya antete. Lelo Mupasi wakwe wene ukatupela maka, kutemwa nga nu kuikanya.

⁸ Acino lyene utuvwa insonyi izya kupeela umboni pamulandu wa Mwene witu. Nupya utuvwa insonyi pamulandu wane, ne munyepwe pamulandu wakwe Klistu. Lelo wakumako ku kuculila Ilandwe Lisuma, lino Leza akukupeela maka akucita cii.

⁹ Wene watutuula nupya watwama kuti tuye antu yakwe, asi pamulandu wa vintu vino twacita. Lelo apamulandu wi pange ni cikuku cakwe. Wene wali ni cikuku kwene cii kunotuli muli Klistu Yesu lino kutali kuye kutandika kwa nsita.

¹⁰ Lelo ndakai Leza wasokolola cikuku kupitila muli Katuula witu Klistu Yesu. Klistu wene wacimvya maka ya mfwa nga mwi Landwe Lisuma amuno wasokolola paswe umi uwa kuntafwa.

¹¹ Leza wansolola kuti inje kakosola, mutumwa na kasambilizya wi Landwe Lisuma.

¹² Acino pamulandu kwene uu, nemo nkucula. Lelo nsi na nsonyi pano indi nu upaalilo cuze, pano manyile wiyo wino nataila. Nupya nkusininkizya ukuti wene akweti maka akucingilila cico cino wandasika, kufika na pa Wanda wa mpelelekezyo.

¹³ Komeleka umu kuyela usambilizyo wa cumi uno nakupile, uye icilangililo kunuli kuti avino wasambilizya. Twalilila mu utailo nu kutemwa kwakwe Klistu Yesu.

¹⁴ Mu maka yakwe Mupasi Wamuzilo, wino akaikala munotuli, nakunena ukuti wacingilila vintu visuma vino walasikwa.

¹⁵ Wamanya ukuti cila muntu mu muputule wa mpanga ya Asiya wansoloka, maka maka Figelo na Hemogenesi.

¹⁶ Mwene aye na mizu ku amu ng'anda yakwe Onesifolasi, pano wene wansansamusyanga maila aingi. Wene atali ni nsonyi pamulandu wakuti nemo nali mu ng'anda yaminyololo.

¹⁷ Lelo zuwazuwa lino wafisile mu Loma, wene watandike kundonda suka anzana.

¹⁸ Mwene ace aye na mizu kuli Onesifolasi pa Wanda wa upinguzi! Nupya wamanya ningo ukwazwa kuno wancitile mu Efeso.