2 Tesalonika 3 - Amazwi Yakwe Leza 2013

¹ Mukusyalikizya, mwe inane, mwatupepelako. Cii cilazwilizya kusalanganya zuwa Ilandwe lya Mwene nga nayauze nao yalipokelele nu mucinzi. Wakwe vino mwemo mwacita.

² Pepini kuti Leza atutuule ku antu ankota na aipe pano asi yonsi akataila Ilandwe.

³ Lelo Mwene wene uwa kutailwa, nupya alamukomelezya nu kumucingilila ku Mwipe wilya.

⁴ Mwene akatulenga kuntatwisika mwemwe. Mwemo mucili mukucita nupya mukatwalilila kucita vino tukamunena.

⁵ Nkulenga ku Mwene kuti wene amutungulule mu kutemwa ndi vino akacita nga nu mukuposya kuno Klistu akapela.

Kusokwa pamulandu wa ukasu

⁶ Mwe ina itu, swemo tukumupeela ilamulo mwi zina lya Mwene witu Yesu Klistu kuti muleuke ku ina inu yonsi akasu nupya yano asyalondela utunguluzi uno twayapile.

⁷ Mweisikulu mumanyile ningo ukuti mulinzile kukolana naswe mu micitile. Swemo tutali akasu lino twali namwe.

⁸ Tutalyanga cakulya caula kukala kufuma ku muntu ali wensi. Lelo twaombanga cuze nupya twatwalilile kuomba musanya nu usiku kuti tutaya wa cisendo kuli wensi uwa munomuli.

⁹ Swemo twacisile cii asi kuti tutakweti nsambu zyakutwazwa. Twacisile cii kuti tumupele cilangililo cakuti namwe mwalondela.

¹⁰ Lino twali pamwi namwe twamunenanga mazwi akuti, “Wino wensi akukana kuomba, nu kulya kwene atalya.”

¹¹ Twalanda cii pamulandu wakuti tukuvwa ukuti munomuli, muli antu yamwi akasu asyaomba cimwi, suka sile kuikumika ku vintu vya antu yauze.

¹² Mwi zina lya Mwene Yesu Klistu tukupeela ilamulo ku antu yaa nu kuyasoka kuti yaikala umi uwa mpomvu nu kuomba kuti yazanilemo uwikazi.

¹³ Lelo mwemo, inane, mutalinzile kunenuka kucita visuma.

¹⁴ Umwi uwa munomuli ndi wakana kuyela mazwi yano twamulembela muli kalata wii, muwakini nupya cenjelini nawe kuti aye ni nsonyi.

¹⁵ Mutamucita wa mwanisi. Lelo mulinzile kumusoka wa mwina kunomuli.

Mazwi yakusyalikizya

¹⁶ Mwene wino ali intulo ya mutende umwisikulu amupeela mutende nsita zyonsi mu musango uli onsi. Mwene aye namwe mwensi.

¹⁷ Ne Paulo, nalemba kalata wi ni kasa lyane uwa kumulamuka. Vii avino nkalemba lyonsi.

¹⁸ Cikuku ca Mwene witu Yesu Klistu ciye namwe mwensi.