2 Samueli 9 - Amazwi Yakwe Leza 2013

Davidi na Mefibosyeti

¹ Uwanda umwi Davidi auzya ati, “Uzye kuli umwi asile uwamu luko lwakwe Saulo? Nkasi kuti imucitile uluse pamulandu wakwe Yonatani.”

² Lyene kwali umuntu umwi umuomvi wakwe Saulo wino yamanga yati Ziba, nga iyamunena kuti akalolane na Davidi. Alino Davidi amuuzya ati, “Uzye wewe uli Ziba?” Nawe aasuka ati, “Musambazi, apanondi ne muomvi wako.”

³ Umwene nawe amuuzya ati, “Uzye kusi umwi asile uwamu luko lwakwe Saulo wino ningacitila uluse luno Leza akalonda?” Ziba nawe aasuka umwene ati, “Kusile wenga umwana umonsi wakwe Yonatani. Wene walemala amakulu yoili kwene.”

⁴ Umwene nawe amuuzya ati, “Uzye ali kwi?” Ziba nawe aasuka umwene ati, “Wene ali ku ng'anda yakwe Makili umwana umonsi wakwe Amiyeli ku Lodebali.”

⁵ Acino umwene Davidi atuma akuyamutola ukufuma ku Lodebali, ku ng'anda yakwe Makili umwana umonsi wakwe Amiyeli.

⁶ Lino Mefibosyeti umwana umonsi wakwe Yonatani, nupya umwizikulu wakwe Saulo wafika, akontama pansi inkolelo yakwe Davidi kuti alange umucinzi. Davidi amwama ati, “We Mefibosyeti!” Nawe aasuka ati, “Musambazi, apanondi ne muomvi wako.”

⁷ Davidi nawe amunena ati, “Utuvwa intete, pano namakucitila uluse pamulandu wakwe so Yonatani. Namakuwezezya impanga yonsi iyali yakwe sokulu Saulo, nupya ulaimulwa api tebulo lyane lyonsi kwene.”

⁸ Mefibosyeti akontama pansi nga avwanga ati, “Musambazi, nemo ntacindime ukuluta simbwa mufwe! Uzye pacani cino wansakamala?”

⁹ Lyene umwene aama Ziba, umuomvi wakwe Saulo nga amunena ati, “Natimpeela umwizikulu wa musambazi wako vyonsi ivyali vyakwe Saulo na aluko lwakwe.

¹⁰ Wewe apali pamwi na ana yako aonsi nga na aomvi yako mulinzile mwamulimila impanga nu kukoozya ivyakulya, pakuti umwizikulu wa musambazi wako asungwa ningo. Lelo Mefibosyeti, umwizikulu wa musambazi wako, amaimulwanga api tebulo lyane lyonsi kwene.” (Ziba wakweti ana aonsi ikumi na yasano.)

¹¹ Lyene Ziba anena umwene ati, “Ne muomvi wako namacitanga vyonsi vino we mwene wampeela ilamulo kuti ncite.” Acino Mefibosyeti walyanga api tebulo lya mwene Davidi wa mwana wenga pa ana ya mwene.

¹² Mefibosyeti wakweti umwana umonsi wino watemile izina ati a Mika. Aluko lwakwe Ziba yonsi kwene yali aomvi yakwe Mefibosyeti.

¹³ Avino Mefibosyeti watenzi umu Yelusalemu, ala akwimulwa lyonsi kwene api tebulo lya mwene.