2 Samueli 8 - Amazwi Yakwe Leza 2013

Ululumbi lwakwe Davidi

¹ Pa cisila ca nsita imwi, Davidi azanza aina Filisti, nga ayacimvya nu kuyapoka amaka akuteeka impanga.

² Lyene acimvya na ina Moabu. Anena anyepwe kuti yalambalale pansi nga akoma yaili muli cila umba lya asilika yatatu. Acino aina Moabu iyateekwa na aliwe nga iyamupeela ni misonko.

³ Davidi acimvya nu mwene kwene uwa mpanga iya Asilya ino ikaamwa ukuti Zoba. Nga acimvya na Hadadezeli umwana umonsi wakwe Leobu lino wali pa ulendo kuti aswilile pa wene wa mpanga yonsi iyalondelela Luzi lwa Yufulate.

⁴ Davidi amupokolola ni vita vyakwe ivyali izimbi lyonga ni myanda cinimbali, yao alwanga inkondo ale yali pa mfwalasi. Alino asilika ya pa ngazo yano wene wapokolwile yali amazimbi amakumi yaili. Lyene alemalika imfwalasi zyonsi asya sile imfwalasi umwanda onga zyakuti zyatinta amaceleta.

⁵ Lino aina Asilya aku Damasiko yatuma ivita ivyakuti vikazwilizye Hadadezeli umwene waku Zoba, Davidi avizanza nu kukoma antu amazimbi amakumi yaili na yaili.

⁶ Lyene Davidi akuula insakwe zya nkondo mu Damasiko nu kulasika asilika akwikala mwenemo nu kumuteekela impanga ilya iya Asilya. Aina Asilya iyatandika ukuteekwa na Davidi nga iyalipa ni misonko kunoli. Yawe alenga kuti Davidi acimvye konsi konsi.

⁷ Davidi apokolola ni visyangu vyakwe zaabu vino aomvi yakwe Hadadezeli yasendanga nga avitwala ku Yelusalemu.

⁸ Wene watozile ni cipimo icikulu sana ca mukuwa ukufuma ku Teba nu ku Belotai, imisumba ino Hadadezeli wateekanga.

⁹ Umwene Tou uwaku Hamati auvwa ukuti Davidi watacimvya ivita vyonsi vyakwe Hadadezeli.

¹⁰ Acino atuma Yolamu umwana wakwe umonsi ku kuzengela umwene Davidi nu kumutaizya sana pa kucimvya Hadadezeli wino Tou walwisizye amaila avule. Yolamu atwalila Davidi amawila apangilwa na zaabu, na siluva, nu mukuwa.

¹¹ Alino umwene Davidi apaatwila Yawe amawila yao kuti yaomviwa umu mapepo pamwi na mawila yauze yano wapokolwile ku nko zino wacimvizye izili nga

¹² Edomu, Moabu, Amoni, Filisti na Amaleke, ukwikapo ni visampwe vino wapokolwile kuli Hadadezeli umwana umonsi wakwe Leobu, umwene waku Zoba.

¹³ Davidi alumbuka wakwe cimwi lino wawelulwike ku kukoma aina Edomu amazimbi ikumi na cinani umu Cifoloma ca Musilya.

¹⁴ Wene akuula insakwe zya nkondo umu mpanga yonsi ya Edomu nu kulasika asilika akwikala mwenemo kuti yamuteekela impanga iyo. Nga atandika ukuteeka antu ya kweneko. Yawe alenga kuti Davidi acimvye konsi konsi.

¹⁵ Davidi ateeka impanga yonsi iya Izlaeli ala akucitila antu yakwe ivya ulungami ukwaula ulufyengo.

¹⁶ Yoabu, wino nyina wali a Zeluya, wali a musika mukulu uwa vita. Yeosafati umwana umonsi wakwe Ailudi wali a kalemba wa vicitwa.

¹⁷ Zadoki, umwana umonsi wakwe Aitubi, pamwi na Aimeleki umwana umonsi wakwe Abyata yali a yasimapepo. Selaya wali a kalemba uwamu cilye ica milandu.

¹⁸ Benaya umwana umonsi wakwe Yeoyada wali a kangalila wa ina Keleti na ina Peleti. Nga ana aonsi yakwe Davidi yali a yasimapepo.