2 Samueli 4 - Amazwi Yakwe Leza 2013

Isyibosyeti yamukoma

¹ Lino Isyibosyeti umwana umonsi wakwe Saulo uvwa ukuti Abineli yatiyamukoma umu Hebuloni, auvwa intete nga aina Izlaeli yonsi kwene iyaya umu cimvulunganya.

² Isyibosyeti wakweti aomvi yaili yano yali intunguluzi zya vita ivyazanzanga. Wenga wali a Baana nu muze wali a Lekabu, ana aonsi yakwe Limoni umwina Beeloti, uwamu mutundu wakwe Benjamini. Beeloti nawe kwene yamwelenganya ukuya uwamu mutundu wakwe Benjamini,

³ Pamulandu wakuti aina Beeloti yutukile ku Gitaimu nga yikala kweneko wa inamasi ukufika na pilelo kwene.

⁴ Uwamu mupanda wakwe Saulo namuze wali a Mefibosyeti umwana umonsi wakwe Yonatani, uwali ni myaka isano iyakuvyalwa pa nsita ino Saulo na Yonatani yakomilwe. Lino impwelo yapa mfwa yao yuvwika ukufuma umu Yezileele, umulezi wakwe amutola nga autuka. Lelo umu kupamviwa kwakwe asuka amuponya nu kulenga ukumulemalika amakulu.

⁵ Lyene Lekabu na Baana, ana yakwe Limoni umwina Beeloti, iyatenuka iyaya ku ng'anda kwakwe Isyibosyeti. Lino yafika iyamuzana ala watalambalala akupuza, ala ilanzi lili pa mutwe papela.

⁶ Umwanaci kalinda wapa mulyango, uwapondanga ingano, nawe ala watakasula utulo. Acino Lekabu na Baana iyasokelela umu ng'anda.

⁷ Lino yingila, iyaya ku muputule ukwaizi Isyibosyeti pa musanzi wakwe, nga iyamukoma. Alino iyaputula umutwe nga iyausenda, iyapita usiku onsi umu Cifoloma ca Yodani.

⁸ Iyatwala umutwe wakwe Isyibosyeti ku mwene Davidi ku Hebuloni nga iyamunena yati, “Uu, uli mutwe wa mwanisi wako Isyibosyeti, umwana umonsi wakwe Saulo, uwezizye ku kukoma. We mwene wane, ilelo Yawe wakulandwila kweneko Saulo na amu mupanda wakwe.”

⁹ Davidi aasuka Lekabu na Baana, ana aonsi yakwe Limoni umwina Beeloti ati, “Nalapa umwi zina lyakwe Yawe waumi, wino wantuula umu ntazi zyonsi, ukuti

¹⁰ nalemile umuntu wenga uwizile ku kunjikwila imfwa yakwe Saulo. Wene welenginye ukuti aizile ku kunena icintu icisuma. Lelo nemo namulemile nu kumukoma umu Zikilagi kwene. Cili cilambu cino namupiile apakwiza nena umulandu wa mfwa!

¹¹ Nga lyene fwandi pa vipondo ivyativikoma umuntu uwakaele lino aizi sile pa musanzi umu ng'anda umwakwe, nemo namalusya ukucita cilanduzi! Namamulandwila pa kumukoma kuno mwamukomile. Mwemo namamulovya pano pansi.”

¹² Davidi apeela ilamulo ku vita vyakwe, nga ivikoma Lekabu na Baana nu kuyaputula ivizanza na makulu nga iviyanyinyinzya apapela pipi ni ciziya camu Hebuloni. Lelo ivisenda umutwe wakwe Isyibosyeti nga viya viuzika mwi cele lyakwe Abineli ku Hebuloni.