2 Samueli 3 - Amazwi Yakwe Leza 2013

¹ Ulwi pakasi ka vita vyakwe Saulo ni vita vyakwe Davidi watwalilile pa nsita ntali. Lino Davidi watwalilila ku komeleka, amulwisyanga nayo iyatwalilila ukutonta.

Ana aonsi yakwe Davidi

² Yaa, ali ana aonsi mutanda avilwe kuli Davidi ku Hebuloni: Iyeli lyakwe wali a Amunoni wino nyina wali a Ainoamu, uwaku Yezileele.

³ Wakwe ciili wali a Kileabu, wino nyina wali a Abigelo, uwatwitwe ku muyazi Nabali, uwaku Kalimeli. Wakwe citatu wali a Abusalomu wino nyina wali a Maaka umwana umwanaci uwa mwene Talimai umwene waku Gesyuli.

⁴ Uwalenga yani a Adoniya, wino nyina wali a Hagiti. Uwalenga yasano wali a Syefatiya, wino nyina wali a Abitali.

⁵ Uwalenga mutanda a Itileamu, wino nyina wali a Egila, umuci wakwe Davidi. Ana yaa, aonsi yonsi kwene yavyalilwe ku Hebuloni.

Abineli uminkana pamwi na Davidi

⁶ Lino ulwi watwalilila apakasi ka vita vyakwe Davidi nga ni vita ivyatontelile akazi kakwe Saulo, Abineli alunduluka ku kwata amaka pakasi kakwe yao alondelelanga Saulo.

⁷ Uwanda umwi Isyibosyeti umwana umonsi wakwe Saulo apeela Abineli umulandu wa kulongozya na Lizipa, umuci namuze wakwe Saulo. Lizipa wali umwana umwanaci wakwe Aiya.

⁸ Abineli asoka wakwe cimwi pa mazwi yano Isyibosyeti wavwanzile, nga avwanga ati, “Uzye ukwelenganya ukuti ningakoopa Saulo? Uzye ukwelenganya ukuti mucumi nemo inkutumikila Yuda? Ukufuma sile pa nkolelo nene wacuvwilo ku mulimo wakwe so Saulo, na ina yakwe, na yacuza yakwe. Nga nkakwazwilizya kuti Davidi atakucimvya. Lelo wemo ilelo wampeela umulandu pa mwanaci wii.

⁹ Lelo ndakai, nkuti we Leza ungazwe, namacita consi cino ningacita kuti mfikilizye vino Yawe walavile nu mulapo ukucitila Davidi.

¹⁰ Namapokolola uwene kuli Saulo na amu mupanda wakwe nu kuleka Davidi aye umwene wa Izlaeli na Yuda kwene ukutandikila sile ku Dani mpaka ukufika nu ku Belisyeba kwene.”

¹¹ Isyibosyeti aoopa Abineli cakuti atakweti icakuvwanga.

¹² Lyene Abineli atuma inkombe kuti zikamuuzizye kuli Davidi ziti, “Uzye aweni amateekanga impanga ii? Leka tupangane, nga nani namakwazwilizya kuti aina Izlaeli yonsi yawile ku lusansa lwako.”

¹³ Davidi nawe aasuka ati, “Icisuma! Namapangana nawe pa cintu cii conga sile: ukuti lino uliza ukwizandola, wemo ulinzile ukundetela Mikala, umwana umwanaci wakwe Saulo.”

¹⁴ Nga Davidi nawe kwene atuma inkombe kuli Isyibosyeti ku kumunena ziti, “Mbwezyezini Mikala umuci wane. Nemo nalifile inkanda izimbi lyonga izya ina Filisti izya usilamu pakuti imusake.”

¹⁵ Acino Isyibosyeti apeela ilamulo kuti yakamupokolole kuli iya, Palitieli umwana umonsi wakwe Laisyi.

¹⁶ Palitieli nawe alondela umuci nzila yonsi ukufika nu ku musumba wa Baulimu, ale akulila lino akuya. Lyene Abineli amunena ati, “Swilila ukwako!” Acino nawe aswilila.

¹⁷ Abineli aya ku ntunguluzi zya ina Izlaeli nga azinena ati, “Pa nsita ntali mukalonda kuti Davidi aye umwene winu.

¹⁸ Lyene fwandi citini vivyo kwene. Iusyini ukuti Yawe wavwanga wati, ‘Ndaomvya umuomvi wane Davidi kuti atuule antu yane aina Izlaeli ku ina Filisti nu ku anisi yao yauze yonsi.’”

¹⁹ Abineli avwanga nu ku aina Benjamini kwene nga aya ku Hebuloni ku kunena Davidi vino antu yakwe Benjamini na ina Izlaeli yazumilizyanyizye ukucita.

²⁰ Lino Abineli wiza kuli Davidi ku Hebuloni pali pamwi na antu yakwe amakumi yaili, Davidi ayimula.

²¹ Abineli anena Davidi ati, “Namapita likwene nkalenge aina Izlaeli yonsi yawile ku lusansa lwako we mwene wakwisaci. Yene yalakuzumila ukuya umwene wao, nga lyene ulakwata cino ukalonda nga ulateeka impanga ilya yonsi.” Davidi pali pakuta Abineli kuti apite umutende.

Yoabu wakoma Abineli

²² Pacisila cakwe vivyo, Yoabu pali pamwi na aomvi yakwe Davidi iyaweluluka ku kuzanza, ala yasenzile ivintu nyanya vino yasamfile. Lelo Abineli yatamuzanyile pamwi na Davidi umu Hebuloni, pamulandu wakuti walanga Davidi watamuta kuti apite umutende.

²³ Lino Yoabu na antu yano wali nao yafika, iyamunena yati Abineli umwana wakwe Neli walaizile ku mwene Davidi nga nawe watamuta kuti apite umutende.

²⁴ Acino Yoabu pali pakuya ku mwene nga amunena ati, “Musambazi, uzye icani cino wacitila icamusango uu? Abineli wizile kunuli, nga fwandi pacani cino walesile kuti apite?

²⁵ Ala Abineli umwana umonsi wakwe Neli, wizile ku kutumpika, nu kulondelezya vyonsi vino ukacita na konsi kuno ukaya. Icumi kwene umanyile cico!”

²⁶ Lyene Yoabu afuma kuli Davidi, nga atuma inkombe izya kuyawezya Abineli. Nga nazyo izimuleta ukufuma ku Cifula ca Silaa. Lelo Davidi atamanyile nanti cimwi pali cii.

²⁷ Lino Abineli wafika umu Hebuloni, Yoabu amusenda pa mbali lwapa mpongolo, kwati akulonda ukulanda nawe umu nkama. Kuku kwene akuno amutota umu lunda. Avino Abineli yamukomile pamulandu wakuti wene wakomile Asaeli umwina wakwe Yoabu.

²⁸ Lino Davidi uvwa impwelo pali cii, avwanga ati, “Yawe amanyile ukuti nene pali pamwi na antu yano nkateeka sweswe yakaele ku utazi uu uwakatwe kakwe Abineli umwana umonsi wakwe Neli.

²⁹ Si uvunuko uu uwa utazi wa katwe uye pali Yoabu na aluko lwakwe! Si nupya insita yonsi umu aluko lwakwe muce mwaya aonsi aula uwonsi, na kuti yace yafwila umu nkondo, nanti muye akasu atakweti ivyakulya.”

³⁰ Fwandi vivyo avili vino cali lino Yoabu pali pamwi nu mwina Abisyai yakomile Abineli, pamulandu wakuti yene yakomile Asaeli umu ulwi uwayelile ku Gibyoni.

Yazika Abineli

³¹ Davidi pali pakunena Yoabu na antu yakwe yonsi ukulepola ivyakuzwala vyao nu kuzwala amasaka pa kulosya Abineli. Alino pa ndosya kwene iyo, umwene Davidi umwisikulu walondelanga pacisila ca cala.

³² Abineli iyamuzika ku Hebuloni. Umwene Davidi wapunzile impoma sana pa kumulosya, cakuti na antu yonsi nayo kwene iyalila nu kupooma sana pa kumulosya.

³³ Umwene Davidi pa kulosya Abineli amulosezya umu lwimbo lwa ulanda ati, “Uzye pacani cino Abineli wafwila wa ciwelewele?

³⁴ Amakasa yakwe yatanyefilwe, na makulu yakwe yatanyefilwe mu vikonkoli. Nga lelo wene wafwile sile ungati umuntu wino ivipondo vyazanza!” Na antu yonsi yamulosya nupya.

³⁵ Uwanda uwa onsi antu yonsi yizanga kuli Davidi iyamupapata kuti alye icakulya. Lelo Davidi walavile nu mulapo ati, “Si Leza andye, ndi cakuti nemo nalya cimwi lino ilanzi litali liwe!”

³⁶ Fwandi antu yonsi apakulola vyonsi vino umwene wacita pasi pakuzanga.

³⁷ Acino pa wanda ulya antu yonsi na ina Izlaeli yonsi kwene yamanyile ukuti umwene atakumileko ku utazi wa katwe kuli Abineli umwana umonsi wakwe Neli.

³⁸ Lyene umwene anena antu yakwe ati, “Uzye mwatimulooka ukuti wi afwile umu mpanga ya Izlaeli intunguluzi ya maka?

³⁹ Nanti angala nene indi mwene umusololwe, umwi lelo pasi vino namacita. Ana yaa aonsi yakwe Zeluya akakasi sana. Yene yatiyampezya amano. Si Yawe ale alandule pali vino antu yaa yatiyacita.”