2 Samueli 24 - Amazwi Yakwe Leza 2013

Davidi wapenda antu

¹ Yawe asokela aina Izlaeli nupya kwene, nga alenga kuti Davidi alete intazi panoyali. Yawe amunena ati, “Pitanga ukapende aina Izlaeli na ina Yuda.”

² Acino Davidi apeela ilamulo kuli Yoabu, musika mukalamba uwa vita vyakwe ati, “Pita na aomvi yako ku mitundu yonsi ya ina Izlaeli ukufuma ku mpanga yakwe Dani ukufika nu ku Belisyeba kwene, nga upende antu. Nkasi ukumanya impendwa ya antu ali mwenemo.”

³ Lelo Yoabu aasuka umwene ati, “We mwene wakwisaci, si Yawe asandulule antu aina Izlaeli amaila umwanda ukuluta vino yaya. Nawe uye nu umi usuke ukailolele vino cili. Lelo pacani cino we mwene wakwisaci ukasi ukucita icintu cii?”

⁴ Lelo umwene aleka Yoabu na yamusika akalamba ya vita kuti yayele ilamulo lyakwe. Lyene Yoabu na yamusika yaya iyafuma pano wali iyaya ku kupenda aina Izlaeli.

⁵ Iyalamba Yodani nu kukuula insakwe ku kaeya ka Aloeli, umusumba uwaya pakasi ka cifoloma, umu mpanga yakwe Gadi. Lino yafuma kuku iyaya lwaku katutu ku Yazeli,

⁶ nga iyatwalilila ulendo wao iyaya ku Gileadi nu ku Kadesyi, umu mpanga ya ina Hiti. Lyene iyaya ku Dani, nga lino yafuma ku Dani iyaya lwaku uwondaka ku Sidoni.

⁷ Lyene iyaya lwaku kaeya ku Tuli, umusumba wi linga, nga nu ku misumba yonsi iya ina Hivi na ina Kenani, nga nu mukusyalikizya iyaya ku Belisyeba, lwaku kaeya ka mpanga yakwe Yuda.

⁸ Acino pacisila ca myezi fundimbali na manda amakumi yaili iyaswilila ku Yelusalemu, pacisila ca lwendo lwao mu mpanga ilya yonsi.

⁹ Iyanena umwene impendwa yonsi iya onsi alingine ukulwa inkondo. Apenzilwe umu mpanga ya Izlaeli yali 800,000 nga amu mpanga ya Yuda yali 500,000.

¹⁰ Lelo pacisila lino Davidi wamala ukupenda antu, kampingu wakwe atandika ukucululuka, nga anena Yawe ati, “Natincita iifyo ilipisye apakucita icintu cii! Napapata unjelele. Nemo natincita icauwelewele.”

¹¹ Yawe pali pakunena Gadi, kasema wakwe Davidi, ati,

¹² “Pita kanene Davidi uti, ‘Yawe wavwanga wati, Nakupeela ivintu vitatu kuti usolole penepo conga. Nani indacita cico cino wemo umasolola.’ ” Uwanda uwalondelela, pacisila lino Davidi wazyuka,

¹³ Gadi aya kuli Davidi, amunena amazwi yakwe Yawe, nga amuuzya ati, “Uzye icili kwi cino watusolola, pa vintu vitatu? Umu mpanga yako muye icipowe pa myaka itatu, nanti mwautuka anisi inu pa myezi itatu, nanti umu mpanga yako mupone impungo pa manda yatatu? Lyene elenganya ningo we mwene kuti ungasuke ivyakuyanena Yawe.”

¹⁴ Davidi nawe aasuka Gadi ati, “Ntamanyile ivyakucita! Lelo ntakasi ukuvunukwa na antu. Si Yawe umwisikulu ale atuvunuke, pano wene uwa mizu.”

¹⁵ Acino Yawe atuma impungo pa mpanga ya Izlaeli ukutandika sile umu katondo kaka ukufika na pampela ya nsita iyasonsilwe. Ukutandikila sile ku Dani ukufika nu ku Belisyeba antu afwile yali amazimbi amakumi cinimbali.

¹⁶ Lino umungeli wakwe Yawe wali pipi nu konona Yelusalemu, Yawe awezya umwenzo kuti atavunuka antu nga anena umungeli uwayakomanga ati, “Ta, caticilingana!” Umungeli wi waimi apipi na pa lwano lwa kupuulila lwakwe Alauna, umwina Yebusi.

¹⁷ Lino Davidi walola umungeli uwakomanga antu, anena Yawe ati, “Nene ndi nu mulandu, nupya nene natinifya. Uzye antu yaa apelelwe yacita cani? Ulinzile ukuvunuka nene sile pamwi na aluko lwane.”

¹⁸ Pa wanda ulya Gadi aya kuli Davidi nga amunena ati, “Tumbela uye ku lwano lwa kupuulila lwakwe Alauna umwina Yebusi ukakuulile Yawe kavuwa.”

¹⁹ Acino Davidi ayela ilamulo lyakwe Yawe, nga atumbela ndi muno Gadi wamunenyile.

²⁰ Lino Alauna walolekesya ukwisika, alola umwene na aomvi yakwe yakutumbela kunoli. Alino Alauna apona pansi afupime inkolelo yakwe Davidi.

²¹ Nga amuuzya ati, “Mwene wakwisaci, uzye pacani cino wizila kuno?” Davidi nawe aasuka ati, “Nizile kala ulwano lwako lwa kupuulila pakuti nkuulile Yawe kavuwa, kuti impungo ite.”

²² Alauna anena Davidi ati, “Mwene wakwisaci, si ule utoole sile, nga upeele kuli Yawe consi icingakuzipila. Yamasaye akupeela uwila wakoca pa kavuwa aeya pano. Ivyakupuulila na mayoko akuomvya wa nkwi aevi.”

²³ Alauna apeela consi ku mwene nga ati, “Si Yawe Leza wako ale akuzumile.”

²⁴ Lelo umwene aasuka Alauna ati, “Awe, nemo namakala kunuli. Nemo ntalapeela kuli Yawe Leza wane amawila yakoca yonsi yano ntaculila.” Acino Davidi akala ulwano lwa kupuulila nga na yamasaye pa mpiya amakumi yasano zyakwe siluva.

²⁵ Davidi akuulila Yawe kavuwa kuku nga apeela amawila yakoca na mawila ya utandano. Alino Yawe aasuka ipepo lyakwe lino wapepelile impanga, nga ni mpungo iyaponile impanga ya Izlaeli ita.