2 Samueli 21 - Amazwi Yakwe Leza 2013

Amu mupanda wakwe Saulo yakomwa

¹ Lino Davidi wateekanga, kwali icipowe icikulu icasenzile imyaka itatu iyalondekine. Acino Davidi auzya Yawe kuti amupanzye amano pali cii, nga nawe amwaasuka ati, “Saulo na aluko lwakwe yali nu mulandu wa utazi wa katwe. Wene wakoma aina Gibyoni.”

² Aina Gibyoni yatali aina Izlaeli. Yene yali akaliumba akanono ka ina Amoli kano aina Izlaeli yalavile nu mulapo ukuti yamayacingililanga. Lelo Saulo alonda kuyakoma, pamulandu wa muzonda uno wakwatile aina Izlaeli na ina Yuda.

³ Acino Davidi aama aina Gibyoni nga ayanena ati, “Uzye icani cino namamucitila? Nkasi kuti inzifye imilandu ino yacisilwe kunomuli, pakuti namwe mungapolelela antu yakwe Yawe.”

⁴ Aina Gibyoni yamwasuka yati, “Ukulemanila ukuli pakasi kitu na aluko lwakwe Saulo kutange kuputulwe na malipilo yakwe siluva nanti zaabu. Nanti uzye tukweti insambu ya kukoma umuntu ali wensi umu mpanga ya Izlaeli?” Davidi nawe auzya ati, “Uzye lyene icani cino mukwelenganya ukuti ningamucitila?”

⁵ Nayo yaasuka umwene yati, “Saulo walondanga ukutukoma ukwaula kusya umwi umupuma apali ponsi mu mpanga ya Izlaeli.

⁶ Acino utupeele aonsi cinimbali amu mupanda wakwe, nga naswe tumayanyonga pa manso yakwe Yawe ku Gibeya, umusumba wakwe Saulo, umwene wino Yawe wasolwile.” Umwene nawe aasuka ati, “Namayapeela kunuli.”

⁷ Lelo pamulandu wa ulayo uno wene yalaine na Yonatani, pa manso yakwe Yawe, wene atakomile Mefibosyeti umwana wakwe Yonatani, nupya umwizikulu wakwe Saulo.

⁸ Lelo nanti cali vivyo umwene atoola Alimoni na Mefibosyeti, ana yaili aonsi yano Lizipa umwana umwanaci wakwe Aiya wavyalile Saulo. Alino atoola na ana aonsi yasano yano Melabi umwana umwanaci wakwe Saulo waviile. Isi wao wali a Adilyeli umwana umonsi wakwe Balizilai uwaku Meolaa.

⁹ Lyene ayapeela ku ina Gibyoni, nga nayo yayanyonga pa mwamba ulya pa manso yakwe Yawe. Nga yonsi kwene cinimbali yafwa pali pamwi. Yonsi kwene yakomilwe pa mwela mu manda yakutandika ukuzombola imbezu zyakwe baale.

¹⁰ Lyene Lizipa umuci namuze wakwe Saulo, nupya umwana umwanaci wakwe Aiya, aomvya amasaka pakuipangila umwakuuwa pa mawe apali ivyala vivya, nga aikala kweneko ukufuma sile pakutandika kwa uzombozi mpaka na lino icisiku catandika. Umu nsita zya musanya ala akuzila ivyunyi pa vyala vivi, nga usiku nalyo avicingilila ku nyama zya mpanga.

¹¹ Lino Davidi uvwa ivyativicita Lizipa umwana wakwe Aiya, nupya umuci namuze wakwe Saulo,

¹² aya atoola amafupa yakwe Saulo na yakwe Yonatani umwana wakwe umonsi ukufuma ku ina Yabesyi umu mpanga ya Gileadi. Antu yaya walanga yiya ivyala pa ncende yakukonganilapo mu musumba wa Beti Syani, kuko kuno aina Filisti yanyinyinzye ivyala pa wanda uno yakomile Saulo pa Mwamba wa Giliboa.

¹³ Davidi pali pakutoola amafupa yakwe Saulo na Yonatani nga na mafupa ya antu yaya aonsi cinimbali yano yanyonzilwe.

¹⁴ Alino iyaya yazika amafupa yakwe Saulo na yakwe Yonatani umwi lindi lyakwe isi wakwe Kisyi uwali isi wakwe Saulo, mu musumba wa Zela umu mpanga yakwe Benjamini, iyacita vyonsi ukulingana ni lamulo lya mwene. Nga pacisila cakwe cico, Leza aasuka amapepo yao yano yapepelile impanga.

Ukulwisya aina Filisti amapaka

¹⁵ Lyene kwakatwike inkondo nayuze pakasi ka ina Izlaeli na ina Filisti. Nga umu ulwi umwi Davidi asuka atonta.

¹⁶ Nga cililumba cimwi cino yamanga yati Isyibibonebu, wenga uwamu mupanda wakwe Lafa, icasenzile isumo ilyakweti icilimi ca mukuwa icanyomile ukulingana na makilogalamu yatatu na citika nupya icanyinyinyinzye ulupanga ulupya mu musana wakweco, icelenganya ukuti cingakoma Davidi.

¹⁷ Lelo Abisyai umwana wakwe Zeluya aiza atuula Davidi. Azanza umwina Filisti wilya nu kumukoma. Lyene antu yakwe Davidi aonsi iyaleka kuti Davidi alaye nu mulapo ukuti atalatala aye nayo nupya ku ulwi. Yavwanga yati, “Wewe uli upaalilo wa ina Izlaeli, nupya tutakasi ku kuponzya.”

¹⁸ Pacisila ca nsita imwi, kwakatwike ulwi nauze uwakulwisyanya na ina Filisti, ku Gobi. Pa nsita ilya Sibekai uwafumile ku Husya akoma ipaka lino yatemile izina yati a Safu, wenga uwamu mupanda wakwe Lafa.

¹⁹ Kwakatwike ulwi na uze uwakulwisyanya na ina Filisti ku Gobi, nga Elianani umwana umonsi wakwe Yaale Olegimu uwaku Betelemu akoma Golyati umwina Giti, wino wakweti isumo ilyakweti umusako utimbe wa mulongoti wakwe kapikula.

²⁰ Lyene umu ulwi uze uwacitike ku Gati, kwali ipaka ilyatemilwe ukulwa. Lyali ni minwe mutanda ukwi kasa lilunji na mutanda ukwi kasa limani. Vivyo kwene lyali ni vikando mutanda ku lwazo lwakwe ndilo nu lwimani kwene. Nawe kwene wali uwamu mupanda wakwe Lafa.

²¹ Ipaka lii ilisausya aina Izlaeli, nga Yonatani umwana umonsi wakwe Syimea, umwina wakwe Davidi, alikoma.

²² Amapaka yaa yani yali amu mupanda wakwe Lafa uwaku Gati, nga uwayakomile a Davidi na antu yakwe.