2 Samueli 20 - Amazwi Yakwe Leza 2013

Syeba wasangukila umwene

¹ Kwali kweneko kacita wa mpanzela wino yatemile izina iyati a Syeba, umwana wakwe Bikili, uwamu luko lwakwe Benjamini. Wene alizya intandala apunda ati, “Tusi ku lusansa lwakwe Davidi! Nupya tutakulondela umwana wakwe Yese! Mwe ina Izlaeli, si tuini tuswilile kumwitu!”

² Acino aina Izlaeli iyasoloka Davidi iyapita na Syeba umwana wakwe Bikili. Lelo antu yakwe Yuda yali ku lusansa lwakwe Davidi nga iyamulondela ukufuma ku Yodani mpaka nu ku Yelusalemu.

³ Lino Davidi wafika ukwi sano lyakwe umu Yelusalemu, atoola aci yakwe yauze ikumi lyonga yano wasile ukwi sano kuti yalisunga, nga ayayalila mu muputule wa ng'anda, yala yakulindwa. Wene ayapeela vyonsi vino yalondanga, lelo atalambalile nu kumanyana nayo. Yene yayalilwe mumu kwene amanda ya umi wao yonsi, yala yakwikala wakwe yamukamfwilwa.

⁴ Lyene umwene anena Amasa ati, “Ngamile aonsi amu Yuda uyakonganike pali pamwi nga yace yize kunondi pa wanda ulalondelela mutondo. Nawe kwene uce wize.”

⁵ Amasa aya ku kwama aonsi amu Yuda, lelo atawezile pa nsita ino umwene wamunenyile.

⁶ Acino Davidi anena Abisyai ati, “Syeba amatuletela intazi izingi ukuluta zino Abusalomu watuletile. Toola yakalinda yane akwi sano nga umulondelele pipi pipi pano limwi angaya akikale mu misumba iyakulililwa amalinga nga tumupanye.”

⁷ Icaleka ivita vyakwe Yoabu pamwi na yakalinda yakwi sano aina Keleti na ina Peleti nga na asilika yauze asyala iyafuma umu Yelusalemu ala yakutungululwa na Abisyai, nga iyalondelelela Syeba, umwana umonsi wakwe Bikili.

⁸ Lino yafika pa ciliwe icikulu umu Gibyoni, Amasa ayakomenkanya. Yoabu ala watazwala ivyakuzwala vya nkondo, nu lupanga ala luli mu cituwo caluko icinyepelelwe ku musipi wakweco. Nga lino akuya pa nkolelo, ulupanga ilusomoka lupona.

⁹ Yoabu anena Amasa ati, “Mwinane, mupozile!” Alino Yoabu alema ivilezu vyakwe Amasa ukwi kasa lyakwe ilya kwilunji kuti amutonsole.

¹⁰ Amasa ataiwasile ku lupanga luno Yoabu wakweti umu minwe, nga Yoabu amutota nalo umunda, nga na mala iyafumfumuka pansi. Amasa afwa papo kwene ukwaula kuti yamutote lili. Lyene Yoabu na Abisyai umwina wakwe iyacocovya Syeba umwana umonsi wakwe Bikili.

¹¹ Wenga pa antu yakwe Yoabu aimilila pipi na Amasa nga avwanga ati, “Londelini Yoabu, mwensi mwemuno muli ku lusansa lwakwe Yoabu na Davidi!”

¹² Icala cakwe Amasa cila cilambalile umu wazi wakwe apakasi ka museo. Umuntu wakwe Yoabu alola ukuti ivita vyonsi vikwiza vikwimilila papa. Acino akwetela icala cici umu calo nga acivimba ni nsalu.

¹³ Pacisila cakufumya icala cici umu museo, cila muntu alondela Yoabu ku kucocovya Syeba umwana umonsi wakwe Bikili.

¹⁴ Syeba apita umu mitundu yonsi iya ina Izlaeli mpaka afika ku Abeli Beti Maaka nga nu mpanga yonsi iya ina Beliti, yao akongine pamwi iyamulondela mu musumba.

¹⁵ Ivita vyonsi ivyali pamwi na Yoabu ivyuvwa ukuti Syeba ali kweneko. Acino iviza vizinguluka umusumba wa Abeli Beti Maaka. Alino iyakuula iciimbili icifika papeela yi linga, nga iyatandika ukwimba umwisika yi linga kuti yaliponye pansi.

¹⁶ Mu musumba ulya mwali umwanaci umwi uwamano. Wene apunda ala ali papela yi linga ati, “Uvwini kuno! Uvwini kuno! Nenini Yoabu aize kuno kuti imvwange nawe.”

¹⁷ Alino Yoabu aya kweneko, nga nawe amuuzya ati, “Uzye wewe uli Yoabu?” Yoabu aasuka ati, “Ee, anene kwene.” Nawe amunena ati, “Uvwa kunondi, we musambazi.” Yoabu aasuka ati, “Nkuuvwa.”

¹⁸ Nawe amunena ati, “Ku mpiti antu yalandanga yati, ‘Pitini mukaasukwe mu musumba wa Abeli. Na vivyo avili vino yacitanga.’

¹⁹ Umusumba witu ukulu, onga pa misumba ya ina Izlaeli umwaya umutende nu kuyela sana. Uzye pacani cino ukulonda uwonone? Uzye ukulonda ukonona icintu cakwe Yawe?”

²⁰ Yoabu aasuka ati, “Cipelele ukutali! Nemo ntalatala nonone nanti ukuongolola umusumba winu!

²¹ Lilyo lisi ipange litu, awe. Umonsi umwi wino yatemela izina yati a Syeba umwana wakwe Bikili, uwaku mpanga yakwe Efulemu, impanga ya myamba, uwatandike ukusangukila umwene Davidi. Tupelini umuntu wi wenga, nga naswe tumafuntuka ku musumba.” Umwanaci wilya anena Yoabu ati, “Tumasumbila umutwe wakwe pansi ukufuma api linga.”

²² Lyene umwanaci wilya aya ku antu yonsi amu musumba ulya nga ayanena umpandamano wakwe. Alino nayo iyaputula umutwe wakwe Syeba umwana wakwe Bikili nga iyausumbila apali Yoabu, ukucilusya ilinga. Alino Yoabu alizya intandala kuti ciye icimanyililo ku antu yakwe kuti yafuntuke ku musumba ulya, nga nayo iyaswilila kumwao. Yoabu nawe aswilila ku Yelusalemu ku mwene.

Inkombe zyakwe Davidi

²³ Yoabu wali akatungulula wa vita vya ina Izlaeli. Benaya umwana umonsi wakwe Yeoyada wali a kangalila wakwe yakalinda yakwe Davidi.

²⁴ Adolamu wali a kangalila wa milimo ya uzya. Yeosafati umwana umonsi wakwe Ailudi wali akangalila wa vyalembwa.

²⁵ Syeva wali a kalemba wamwi tengo. Zadoki na Abyata yali a yasimapepo.

²⁶ Na Ila kwene uwaku Yaili wali a wenga uwamuli yasimapepo yakwe Davidi.