2 Samueli 19 - Amazwi Yakwe Leza 2013

¹ Antu yamwi iyanena Yoabu yati, “Umwene Davidi akulosya Abusalomu.”

² Acino pa wanda ulya uluzango lwa ucimvyo ilwaluka iluya ulanda ku vita vyakwe Davidi vyonsi, pamulandu wakuti vyuvwile ukuti umwene akulosya umwana wakwe umonsi

³ Alino iyaswilila cimyamya mu musumba kwati asilika ali ni nsonyi pamulandu wa kuutuka ulwi.

⁴ Umwene avimba pa manso nga alila akuuta ati, “Owe, we mwanane! We mwanane Abusalomu! Abusalomu, we mwanane!”

⁵ Yoabu aya ku ng'anda kwa mwene nga amunena ati, “Ilelo watuzewanya antu yako yano yakutuuzile nu kutuula ana yako aonsi na anaci, nga na aci yako yauze.

⁶ Wemo ukakanya yao akutemwa nupya ukawila ku lusansa lwakwe yao akupata! Walanga apaswe ukuti yamusika akalamba ya vita pali pamwi na antu yao yasi cimwi kunuli. Natindola ukuti wemo cingakuzanzya sana ndi cakuti Abusalomu wali umupuma nga lelo swensi ale twafwa.

⁷ Acino lyene pitanga ukakomelezye antu yako. Nalapa umwi zina lyakwe Yawe ukuti ndutangacita cico, ale mutondo akatondo yonsi kwene yalakusoloka. Cii, ciliipisya kunuli ukuluta imipamba yonsi iyakucitikile mu manda ya umi wako yonsi.”

⁸ Lyene umwene akatuka, nga aya aikala umu pipi ni mpongolo ya musumba. Antu yakwe yuvwa ukuti wene ali papa, nga iyakongana yonsi pamwi, iyamulizizya.

Davidi watandika kuswilila ku Yelusalemu

⁹ Umu mpanga ilya yonsi antu iyatandika ukulemanila aisikulu. Yavwanga yati, “Umwene Davidi watutuuzile ku anisi itu. Wene watutuuzile ku ina Filisti, lelo ndakai watautuka Abusalomu nu kusya impanga ii.

¹⁰ Sweswe twasolwile Abusalomu kuti aye umwene witu, lelo wene yamukoma umu ulwi. Acino fwandi pacani cino umwi atanga aezye kuwezya umwene Davidi?”

¹¹ Ilyasi lino aina Izlaeli yalandanga ilisuka lyuvwika ku mwene Davidi. Acino wene atuma yasimapepo yaa, Zadoki na Abyata kuti yakuuzye intunguluzi zyamu Yuda yati, “Uzye pacani cino mwemo mutangaya ankolelo ukuwezya umwene ukwisano lyakwe?

¹² Mwemwe akazi kane, antu yane kololo. Uzye pacani cino mutangaya ankolelo ukumbwezya?”

¹³ Davidi ayanena na mazwi kwene yaa kuti yanene Amasa yati, “Wewe wakazi kane. Ukutandika sile likwene, wemo nakulasika ukuya musika mukalamba uwa vita pa cifulo cakwe Yoabu. Si Leza andye, ndi cakuti ntacisile cii!”

¹⁴ Amazwi yakwe Davidi iyalenga kuti aonsi yonsi amu Yuda yamuyele, nga nayo iyatuma akuyamunena kuti aweluluke na aomvi yakwe yonsi.

¹⁵ Umu nzila lino akuswilila, umwene akomenkanya aonsi amu Yuda pa Luzi lwa Yodani, yano yizile ku Giligali ku kumusukilila ukumulamvya uluzi.

¹⁶ Pa nsita kwene ilya Syimei uwamu mutundu wakwe Benjamini nupya umwana umonsi wakwe Gela uwaku Baulimu, acincila aya ku Yodani ku kukomenkanya umwene Davidi.

¹⁷ Wene wali pamwi na onsi izimbi lyonga aina Benjamini. Na Ziba umuomvi wa aluko lwakwe Saulo, nawe kwene wizile pamwi na ana yakwe ikumi lyonga na yasano nga na aomvi yakwe amakumi yaili. Nga iyafika ku Yodani lino umwene atacili afike kweneko.

¹⁸ Iyalamba uluzi kuti yasukilile umwene na antu yakwe ku mbalama yuze nga nu kucita consi cino umwene akasi. Lino umwene akuiteyanya ukulamba, Syimei apona pansi inkolelo yakwe,

Davidi waya nu luse kuli Syimei

¹⁹ nga amunena ati, “We mwene wakwisaci, napapata unjelele pa kwifya kuno nifizye pa wanda uno wafumile umu Yelusalemu. Utampeela umulandu nanti ukwika icintu cii umu mwenzo wako nupya.

²⁰ Musambazi imanyile ukuti nifya, nupya uli mulandu uno ilelo nene naya uwankolelo mu amu mutundu wakwe Yosefu ukwiza kunoli ku kukomenkanya, we mwene wakwisaci.”

²¹ Lyene Abisyai umwana wakwe Zeluya avwanga ati, “Syimei alinzile kukomwa pamulandu wakuti wene watipwizile wiyo wino Leza wasolola ukuya umwene.”

²² Lelo Davidi anena Abisyai na Yoabu umwina wakwe ati, “Uzye aweni uwatamuzya mumunene ilangulusi linu? Uzye mukasi ukundetela intazi? Ndakai nene indi mwene wa ina Izlaeli, nga kusi umwina Izlaeli amakomwa ilelo.”

²³ Acino umwene anena Syimei ati, “Untaile ukuti utakukomwa, awe.”

Davidi waya nu luse kuli Mefibosyeti

²⁴ Lyene Mefibosyeti, umwizikulu wakwe Saulo, atentemuka ku kwizakomenkanya umwene. Wene atafulile ku ngazo nanti ukupela ivilezu nanti ukufula ivyakuzwala vyakwe ukufuma sile lino umwene wafumile umu Yelusalemu mpaka ukufika lino wawelulwike nu ucimvyo.

²⁵ Lino Mefibosyeti wafisile ukufuma ku Yelusalemu ku kwizakomenkanya umwene, umwene wamunenyile ati, “We Mefibosyeti, uzye pacani cino utandondile?”

²⁶ Nawe aasuka ati, “We musambazi umwene wane, umanyile ukuti nene cilema. Nanenyile umuomvi wane kuti anteyanyizizye punda nkwele nga mpite pamwi nawe mwene. Lelo wene ankanila.

²⁷ Wene wantumpwilile kunuli, we mwene wakwisaci, lelo wemo ukoline nu mungeli wakwe Leza. Acino cita consi icingakuzipila.

²⁸ Akazi kakwe tata cayalinga ukukomwa, lelo nemo wampiile insambu iya kulya api tebulo lyako. Nupya insi ni nsambu iya kukulenga kuti inje nu longo naluze ukufuma kunuli, we mwene wakwisaci.”

²⁹ Umwene aasuka ati, “Vino walanda vyavula. Nemo natimpingula ukuti wewe na Ziba mulankana impanga yakwe Saulo.”

³⁰ Mefibosyeti avwanga ati, “Leka Ziba aliwe atoole impanga iyo yonsi pyu. Nemo caticindingana ukulola ukuti we mwene wakwisaci wawela umutende ukwako.”

Davidi walanga uluse kuli Balizilai

³¹ Balizilai uwafumile ku Gileadi, nawe watentemwike ukufuma ku Logelimu, ku kwizasukilila umwene ukumulamvya Yodani.

³² Balizilai wali umukombe, uwa myaka yakuvyalwa amakumi cinani. Wene wali umukama wakwe cimwi. Nupya watwalilanga umwene ivyakulya lino umwene acili akwikala ku Maanaimu.

³³ Umwene anena Balizilai ati, “Iza tupite swensi ku Yelusalemu, nga nani namakusunga.”

³⁴ Lelo Balizilai aasuka ati, “Amanda ya umi wane anono sile, nga uzye pacani cino ningapita nawe ku Yelusalemu, we mwene wakwisaci?

³⁵ Indi ni myaka amakumi cinani iyakuvyalwa, nga kusi cimwi cino nkuzangilamo. Ntanguvwa umulyo muli consi cino nkulya nanti cino nkumwa. Nupya ntanguvwa amazwi yakwe yakiimba. Uzye lyene pacani cino ningakwanola sile we mwene wakwisaci?

³⁶ Nemo ntalingine ukupelwa icilambu icikulu wakwe cico. Acino namakusukilila sile panono inkulamvye Yodani.

³⁷ Lyene unte inswilile ukumwitu nkafwile apipi nu kwi lindi lya akwasi yane. Kimuamu, umwana wane umonsi aewi. Musende akaakutumikila, nupya umucitile icili consi icingakuzipila.”

³⁸ Umwene nawe aasuka ati, “Kimuamu amalamba pamwi nani, nga nani namamucitila consi icingakuzipila.”

³⁹ Lyene Davidi na antu yakwe yonsi iyalamba Yodani. Alino atonsola Balizilai nu kumupolelela, nga Balizilai aswilila ukwakwe.

Aina Izlaeli na ina Yuda yapazyanya

⁴⁰ Lino umwene walamba ala aina Yuda yonsi pamwi na citika wa ina Izlaeli yatiyamusukilila, ali lino atwalilila nu ulendo aya ku Giligali. Na Kimuamu kwene wapisile nawe.

⁴¹ Lyene aina Izlaeli yonsi iyaya ku mwene nga iyamunena yati, “Mwene wakwisaci, uzye pacani cino aina itu aonsi amu Yuda yelenginye ukuti yakweti insambu iya kukusenda nu kusukilila wewe, na aluko lwako, na antu yako, yamulamvye Yodani?”

⁴² Aonsi amu Yuda yaasuka yati, “Swemo twatitucita cico pamulandu wakuti umwene awenga uwa munotuli. Uzye lyene pacani cino icintu cii cingasosya mwemwe? Umwene atatukalile ivyakulya nanti ukutupeela icintu icili consi.”

⁴³ Aina Izlaeli nayo yaasuka yati, “Swemo tukweti insambu amaila ikumi izyakwelenganya pa mwene ukuluta zino mukweti. Ukulunda pali cico swemo tulusile mwemwe. Uzye lyene pacani cino mwatusuula? Mutilila ukuti sweswe twali ankolelo ukwelenganya ivyakuwezya umwene!” Lelo aina Yuda yalandikisye icikalale ukuluta aina Izlaeli.