2 Samueli 18 - Amazwi Yakwe Leza 2013

Abusalomu yamucimvya nu kumukoma

¹ Umwene Davidi akonganika ivita vyakwe pamwi, nga ayapaatula mu mpuka, yamwi izimbi lyonga na yamwi umwanda onga, nga alasika yamusika akalamba ya vita akuyatungulula.

² Lyene Davidi atuma ivita mu maumba yatatu iyapita pamwi na Yoabu na Abisyai umwina wakwe Yoabu na Itai uwaku Gati, cila muntu atungulula iumba lyonga. Nga umwene anena antu yakwe ati, “Namapita namwe nene kwene nemwisikulu.”

³ Nayo iyamwasuka yati, “Utangapita naswe, awe. Anisi itu yalalola ukuti icili cimwi kwene ndi cakuti swe muno twasyala twapuka, nanti angala citika wakwe sweswe wakomwa. Lelo wemo ulingine swe antu amazimbi ikumi lyonga. Cingazipa ndu ngasyala mu musumba kwene uu ule ukututumila uwazwilizyo.”

⁴ Umwene nawe aasuka ati, “Namacita consi cino mwalola ukuti icingamuzipila ukuluta.” Alino umwene aimilila lwapa mpongolo lino antu yakwe yakufuma nu kupita mu mpuka, zimwi izimbi lyonga na zimwi umwanda onga.

⁵ Umwene apeela ilamulo kuli Abisyai, na Yoabu, na Itai ati, “Pamulandu wane mutaezya ukucita cimwi iciipe ku mulumendo Abusalomu.” Nga ivita vyonsi ivyuvwa kuno Davidi akupeela ilamulo lii kuli yamusika akalamba ya vita vyakwe.

⁶ Ivita vyakwe Davidi ivifumila ukunzi ya musumba nga ivilwisya aina Izlaeli mu mutengo wakwe Efulemu.

⁷ Kuku kwene aina Izlaeli iyayacimvya ku antu yakwe Davidi. Nupya kwali impendwa ikulu wakwe cimwi iya antu yano yakomile ukulingana na antu amazimbi amakumi yaili (20,000).

⁸ Ulwi iulunduluka monsi kwene ukunzi ya musumba, nga antu aingi iyafwa mu mutengo ukuluta yano akomilwe mu ulwi.

⁹ Umu kupumikizya, Abusalomu akomenkanya antu yakwe Davidi yamwi. Wene wakwezile pa nyumbu, nga lino nyumbu ikupita umwisika ya misambo ya muti umuoko ukulu, umutwe wakwe Abusalomu iufyantama umu misambo ya muti ulya. Nyumbu itwalilila ukupita, lelo Abusalomu asyala akunyinyinda ku muti.

¹⁰ Lino umuntu wenga pali yaya walola cii, aya anena Yoabu ati, “Nalinalola Abusalomu watalemya ku muti akunyinyinda.”

¹¹ Yoabu nawe anena umuntu wilya ati, “Ndi wali wamulola pacani cino utali wamukoma papo kwene? Nemwisikulu ngano nalinakupeela impiya ikumi zyakwe siluva nga nu musipi.”

¹² Lelo umuntu wilya aasuka ati, “Nantiangala ungampeela impiya izimbi lyonga zyakwe siluva, ntange inkatusye ikasa lyane nu kuzanza umwana wa mwene. Swemo twayuvwilanga na makutwi itu ilamulo lino umwene wapeezile wewe na Abisyai na Itai, ati, ‘Pamulandu wane mutaezya ukucita cimwi iciipe ku mulumendo Abusalomu.’

¹³ Lelo iciya cakuti nakana ukuyela umwene nga nkome Abusalomu, umwene wange auvwe nu kumanya vyonsi pa cintu cii, nga wemo utange umpokololeko.”

¹⁴ Yoabu avwanga ati, “Ntakutala insumbe insita nayuze pamwi nawe.” Acino atoola amasumo yatatu nga aya atota yonsi mu cisao cakwe Abusalomu lino acili nu umi, akunyinyinda ku muti umu oki.

¹⁵ Lyene ivita ikumi, yamusenda mpamba yakwe Yoabu yazinguluka Abusalomu, iyamutotola nu kumukoma.

¹⁶ Alino Yoabu apeela ilamulo kuti yalizye ipenga kuti yate ukulwa, nga ni vita vyakwe iviweluluka ku kuzinganya aina Izlaeli.

¹⁷ Alino iyatoola icala cakwe Abusalomu iyacisumbila mu ciwina icikulu umu mutengo nga iyatulika umutumba ukulu uwa mawe penepo. Aina Izlaeli yala yatiyasimula kumwao.

¹⁸ Mu manda ya umi wakwe Abusalomu walanga waikuulila icipilala umu Cifoloma ca mwene, pamulandu wakuti atakweti umwana uwakuti aimike umupanda wakwe. Acino watemile icipilala cici izina lyakwe, nga ni lelo kwene cikaamwa ukuti Icipilala cakwe Abusalomu.

Davidi yamwikwila imfwa yakwe Abusalomu

¹⁹ Lyene Aimaazi umwana wakwe Zadoki anena Yoabu ati, “Leka nsimule inje ku mwene nkamunene ilandwe lisuma ilyakuti Yawe watamutuula ku anisi yakwe.”

²⁰ Yoabu nawe avwanga ati, “Awe, ilelo utakuya ku kunena umwene ilandwe lisuma. Ungacita cico pa wanda uze, lelo apilelo pene foo, pamulandu wakuti umwana wa mwene watafwa.”

²¹ Alino Yoabu anena umuzya wakwe umwina Kusyi ati, “Pita ukanene umwene ivintu vino watulola.” Umwina Kusyi wilya akontama pansi inkolelo yakwe Yoabu nga asimula apita.

²² Aimaazi umwana wakwe Zadoki nupya anena Yoabu ati, “Ntasakamile icinganzana. Napapata leka nani kwene nsimule icisila ca mwina Kusyi, nkanene umwene ilandwe.” Lelo Yoabu amuuzya ati, “We mwanane, uzye pacani cino ukasi ukucita cico? Utalalambulwa pakucita cico.”

²³ Aimaazi nupya aasuka ati, “Ntasakamile icinganzana. Leka sile mpite.” Acino Yoabu amunena ati, “Ale pita!” Lyene Aimaazi asimula apita atentemukila ku museo uwapita mu Cifoloma ca Yodani, nga lilyo kwene aya apuzya umuzya wilya umwina Kusyi.

²⁴ Davidi ala atenzi pa ncende pakasi ka mpongolo iya mukasi ni ya kunzi. Lyene kalinda umwi aya apapela yi linga nga aimilila api paala lyapa wingililo. Alino aceleka, nga alola umonsi akusimula ala ali wenga.

²⁵ Alino alaizya ku mwene apisika nu kumunena. Umwene nawe amunena ati, “Ndi cakuti ali wenga, ale lyene asenzile ilandwe ilisuma. Alino umuntu wilya atwalilila kupalama pipi.”

²⁶ Lyene kalinda wilya alola umuntu namuze akusimula nga apundilila kalinda wa mpongolo ati, “Lola, umuntu namuze awiya akusimula wenga!” Umwene amunena ati, “Nawe kwene limwi akwiza ku kutunena ilandwe ilisuma.”

²⁷ Kalinda wa mpongolo nawe avwanga ati, “Nkulola kwati uwankolelo akusimula wakwe Aimaazi umwana umonsi wakwe Zadoki.” Umwene avwanga ati, “Wene umuntu musuma, nupya aizile tunena ilandwe ilisuma.”

²⁸ Lyene Aimaazi apunda ku mwene ati, “Vyonsi vili ningo!” Afukama inkolelo ya mwene nga avwanga ati, “Ululumbi luye kuli Yawe Leza wako! Wene watakupeela ucimvyo pa antu yano yakatukile umusambazi umwene wane!”

²⁹ Alino umwene auzya ati, “Uzye umulumendo Abusalomu umucingililwe?” Aimaazi nawe aasuka ati, “Musambazi, lino Yoabu umuomvi wako waliwantuma inalola icinduvyanya icikulu ica antu, lelo ntacimanyile.”

³⁰ Umwene amunena ati, “Imilila papa.” Alino nawe aya aimilila papa.

³¹ Lyene umuzya umwina Kusyi afika nga anena umwene ati, “Nkweti ilandwe ilisuma ilyakukunena we musambazi umwene wane! Ilelo Yawe watakupeela ucimvyo pali yonsi yano yakusangukile!”

³² Umwene nawe auzya umwina Kusyi wilya ati, “Uzye umulumendo Abusalomu umucingililwe?” Umwina Kusyi wilya aasuka ati, “Si cange cizipe ivicitike kunoli vicitikile anisi ya musambazi umwene wane na kuli yonsi yano yakusangukila.”

³³ Umwene anyomelwa cuze na malanda. Alino aya ku muputule ukupuzya pa wingililo, nga alila. Lino akupita ale akupunda ati, “Iye umwana wane Abusalomu, umwana wane Abusalomu! Si cange cizipe nene imfwe ukuluta kuti wewe ufwe, we mwana wane Abusalomu, we mwana wane!”