2 Samueli 17 - Amazwi Yakwe Leza 2013

Husyai wapumvyanya Abusalomu

¹ Patapisile insita sana, Aitofeli anena Abusalomu ati, “Leka nsolole antu amazimbi ikumi na yaili, nga usiku namatenuka ndondelele Davidi.

² Namaya nkamuzanze lino wene watatonta nu kutovoka. Namaya nkamoofye, nga antu yano yali nawe yamautuka. Alino lyene namakoma sile umwene.

³ Lelo antu yonsi asyala namaya nkayawezye kunuli wakwe vino yakaleta nawinga kuli iya wakwe. Wemo ukulonda ukukoma sile umuntu wenga. Antu asyala yatalacitilwa icintu cimwi iciipe.”

⁴ Amazwi yaa yuvwika wa umpandamano usuma kuli Abusalomu nu ku ntunguluzi zyonsi zyamu Izlaeli.

⁵ Lelo Abusalomu avwanga ati, “Ngamilini Husyai umwina Aliki, muleke tuvwe cino amalanda.”

⁶ Lino Husyai wafika, Abusalomu amunena ati, “Aitofeli watatupeela umpandamano uu. Uzye tucite ndi muno atunenyile? Ndi cisi vivyo tunene vino ukwelenganya.”

⁷ Husyai aasuka Abusalomu ati, “Pa nsita ii umpandamano uno Aitofeli watamupeela usi usuma.

⁸ Wemo umanyile ukuti so Davidi na antu yakwe akome mu ulwi nupya yakalwa wa cinyama icakolana ni ciuli, cino yatiyatolela utwana. So aumwi inkonkotela ya ulwi. Wene atangalinda usiku pamwi na asilika.

⁹ Na vikwene vino nkulanda, wene afisime mwi cele nanti mu ncende yuze. Ndi vita vyakwe Davidi vyazanza ivita vinu, lyene wensi wino uvwa ci zuwazuwa alalanda ati, ‘Antu yano yakalondela Abusalomu yatiyacimviwa.’

¹⁰ Lyene nanti umusilika ukuluta yonsi, wino wapama wakwe cisama, alazakaza ku ntete, pano aina Izlaeli yonsi yamanya ukuti so icita nga na antu yano ali nayo yapama.

¹¹ “Umpandamano wane uwakuti wewe wemwisikulu ule ukonganike aina Izlaeli yonsi pali pamwi, ukufuma sile ku mpanga yakwe Dani ukufika nu ku Belisyeba kwene, yano yavula wa musensenga uwamu nkumba yakwe yemba. Alino lyene wewe kwene uyatungulule ku ulwi.

¹² Lyene swemo tumalonda Davidi konsi kunoli, nga tumuzanze lino wene atacili amanye icikucitika. Aliwe nanti antu yakwe kwene kusi alapusuka.

¹³ Ndi cakuti wene alawelela icisila mu musumba, ale lyene antu itu yonsi yalaleta imyando mu musumba ulya, nga yautintile umu cifoloma mpaka sile kutasyala nanti iwe apapela ya mwamba uwo.”

¹⁴ Alino Abusalomu na ina Izlaeli yonsi yavwanga yati, “Umpandamano wakwe Husyai umwina Aliki wazipa ukuluta wakwe Aitofeli.” Pasi pano Yawe akweti ipange lya kuvulunganya umpandamano wakwe Aitofeli kuti alete uzanzo pali Abusalomu.

Davidi yamusokela nga apuuka

¹⁵ Lyene Husyai anena simapepo Zadoki nga na simapepo Abyata, ati, “Aitofeli watapanda Abusalomu amano pamwi ni ntunguluzi zya ina Izlaeli kuti yacite vivi na vivi. Lelo nemo natinjapanda amano kuti yacite vi na vi.

¹⁶ Lyene tuma inkombe zuwazuwa kuli Davidi kuti imunene iti, ‘Mutezya mulinde usiku api lambwa mu lwanga, lelo mulambe Yodani lilyo kwene pakuti wewe na antu yako yatamulema nu kumukoma.’ ”

¹⁷ Yonatani umwana wakwe Abyata na Aimaazi umwana wakwe Zadoki yalolelanga pa kafukoka kaku Eni Logeli, lwa kunzi ya musumba wa Yelusalemu, pamulandu wakuti yatalondanga ukuloleka ku antu lino yakwingila mu musumba. Umuomvi umwi umwanaci wayanga ku kuyanena ivyativicitika, nga nayo iyaya yanena umwene Davidi.

¹⁸ Lelo uwanda umwi umulumendo ayalola, nga anena Abusalomu. Acino iyafuma kuku zuwazuwa nga iyaya ku kufisama ku ng'anda yakwe Baulimu. Wene wakweti icifula umu musolo wakwe, nga nayo amuno yingila.

¹⁹ Umuci wakwe Baulimu atoola intupiko ya cifula nga asalanganya imbezu penepo pakuti kutaya umwi uwa kumanya cimwi pali cii.

²⁰ Lelo lino aomvi yakwe Abusalomu yiiza ku ng'anda ilya, iyuzya umwanaci wilya yati, “Uzye Aimaazi na Yonatani yali kwi?” Umwanaci wilya nawe aasuka ati, “Yatiyalamba uluzi.” Aonsi yaya iyayalonda lelo ukwaula ukuyalola, nga acino iyaswilila ku Yelusalemu.

²¹ Pacisila lino yapita, Aimaazi na Yonatani iyafuma umu cifula iyaya ku kumanyisya umwene Davidi. Iyamunena amapange aipe yano Aitofeli wamukwatile yati, “Si ule utenuke nga ulambe uluzi likwene.”

²² Acino Davidi pamwi na antu yakwe iyatenuka nga iyalamba Luzi lwa Yodani lilyo kwene. Lyene lino caya pa macaca yonsi kwene ale yatiyalambila ku mbalama yuze.

²³ Lino Aitofeli walola ukuti umpandamano wakwe utalondilwe, akwela pali punda wakwe nga aswilila ku musumba kumwao. Alino pacisila cakupeela amazwi ya utunguluzi ku ang'anda yakwe, Aitofeli aikulika. Acino afwa nga iyamuzika mwi lindi lya aluko lwakwe.

²⁴ Lino Abusalomu pamwi na ina Izlaeli yalamvile Luzi lwa Yodani, walanga Davidi watafika mpiti ku Maanaimu.

²⁵ Abusalomu wasonsile Amasa kuti atoole cifulo cakwe Yoabu uwali musika mukulu uwa vita. Amasa wali umwana umonsi wakwe Yeteli umwina Isumeli. Na nyina wali a Abigelo, umwana umwanaci wakwe Naasyi uwali kaci muze wakwe Zeluya nyina wakwe Yoabu.

²⁶ Aina Izlaeli pamwi na Abusalomu iyaya yakuula insakwe mu mpanga ya Gileadi.

²⁷ Lino Davidi wiza ku Maanaimu, iyakomenkana na Syobi umwana umonsi wakwe Naasyi uwafumile ku musumba wa Laba, umu mpanga ya ina Amoni, nga na Makili umwana umonsi wakwe Amiyeli, uwafumile ku Lodebali, nga na Balizilai umwina uwafumile ku Logelimu umu mpanga ya Gileadi.

²⁸ Iyaletela Davidi pamwi na antu yakwe ivyakuvimbala ni ngeso, ni nyungu. Yayaletile ni ngano kwene ni mbezu zyakwe baale, nu usu wa ngano, ni ngano izipuke, na cilemba, na mutumpe,

²⁹ nu uci ni ziya lisase, ni mfwele, nu lwambu lwi ziya nga avipeela kuli Davidi na antu yakwe kuti yalye. Yene yamanyile ukuti Davidi na antu yakwe yamauvwa inzala nu lusala, nga nu kutonta mu lwanga.