2 Samueli 16 - Amazwi Yakwe Leza 2013

Davidi na Ziba

¹ Lino Davidi wapita sile akatalamukila ukucila pa kansonsi ka mwamba, lilyo kwene iyakomenkana na Ziba, umuomvi wakwe Mefibosyeti, wino wasenzile yapunda asenzile imikate imyanda iili, ni ving'ango umwanda onga ivya mikoto ya matingi, nga ni mikungo umwanda onga iya viseekwa, nga ni nyambi yakwe waini.

² Umwene Davidi auzya Ziba ati, “Uzye vivyo vyonsi ivyacani?” Ziba nawe aasuka ati, “Yapunda akupitapo aluko lwako we musambazi, imikate ni viseekwa ivyakulya aonsi, na waini uwakuti yamwe lino yatonta mu lwanga.”

³ Umwene auzya ati, “Uzye Mefibosyeti, umwizikulu wakwe Saulo umusambazi wako ali kwi?” Ziba nawe aasuka ati, “Akwikala umu Yelusalemu pamulandu wakuti wene atakutwisika ukuti aina Izlaeli yamawezezya kunoli uwene wakwe Saulo, uwali a sikulu.”

⁴ Umwene anena Ziba ati, “Ivintu vyonsi ivyali vyakwe Mefibosyeti ivyakwako.” Ziba nawe aasuka ati, “Nene muomvi wako. Musambazi, leka nakuzanzya lyonsi kwene!”

Davidi na Syimei

⁵ Lino umwene Davidi akupalamila ku Baulimu, umuntu umwi ukufuma mu luko ululi lumwi nu lwa akazi kakwe Saulo aiza ukufuma kuku. Izina lyakwe wali a Syimei umwana umonsi wakwe Gela, ala akumutipwila lino akufuma.

⁶ Syimei atandika ukutama Davidi na aomvi ya mwene yonsi amawe, nanti angala ivita vyonsi na yakalinda asololwe yali ku mbali zyonsi zyakwe Davidi.

⁷ Syimei atipwila Davidi ati, “Senka pano, senka pano, we mutazi wa katwe we! We mpulamasunde we!

⁸ Wemo wapokolola uwene wakwe Saulo. Acino ndakai Yawe akukuvunuka pamulandu wa kukoma aingi amu luko lwakwe Saulo. Yawe watapeela uwene kuli Abusalomu umwana wako umonsi, nga nawe watuononeka, we nkomi we!”

⁹ Alino Abisyai umwana wakwe Zeluya anena umwene ati, “We mwene wakwisaci, uzye pacani cino waleka simbwa wi akutuka? Si leka nje panoli imuputule umutwe.”

¹⁰ Lelo umwene anena Abisyai na Yoabu umwina wakwe, ati, “Icintu cii citamupazi, mwe ana yakwe Zeluya. Ndi wene akuntipwila pamulandu wakuti Yawe watamunena ukucita cico, uzye lyene aweni akweti insambu zya kuuzya umulandu cino akucitila cico?”

¹¹ Alino Davidi anena Abisyai na aomvi yakwe yonsi ati, “Mwana wane umonsi akwezya ukunkoma, nga fwandi pacani cino mwemo mwazunguka vino umuntu wi uwamu luko lwakwe Benjamini akucita! Mwemo mutini sile. Mulekini alukutipwila, pano Yawe watamunena ukucita cico.

¹² Cingaya limwi Yawe angalola ulanda wane nu kundandwila ivisuma pa ntipu zino natipwilwa api lelo.”

¹³ Acino Davidi na antu yakwe iyatwalilila ukupita umu museo, nga Syimei wene ala akupita lwamu mbali ya museo pa cituntu, ala akutipwila nu kumuvwintila amawe nu lutukumbu.

¹⁴ Umwene na antu yakwe yonsi iyafika ku Yodani, nga iyapuza pano walanga yatiyatonta.

¹⁵ Pa nsita ilya, Abusalomu na onsi yonsi aina Izlaeli yiiza ku Yelusalemu, nga Aitofeli wali pamwi nayo.

¹⁶ Lino Husyai umwina Aliki, nupya cuza wakwe Davidi, wakomenkanya Abusalomu, apunda ati, “Si kawala we mwene! Si kawala we mwene!”

¹⁷ Alino Abusalomu nawe auzya Husyai ati, “Uzye kuu kuli kutemwa kuno ukulanga kuli cuza wako? Uzye pacani cino utapisile na cuza wako?”

¹⁸ Husyai pali pakunena Abusalomu ati, “Uzye umu nzila cii muno nange ncite cico? Nemo indi ku lusansa lwakwe wino Yawe wasolola, ukupitila mu antu yaa, nu mu ina Izlaeli yonsi. Nemo namasyala nawe.

¹⁹ Ukulunda pali cico, uzye aweni wino ningatumikila ndi cakuti ntangentumikile umwana wa musambazi wane? Vivi kwene vino natumikile so, avino namakutumikilanga.”

²⁰ Abusalomu pali pakunena Aitofeli ati, “Uzye utange utupandeko amano, utunene ivyakuti tucite?”

²¹ Aitofeli nawe aasuka ati, “Lala na aci yauze yakwe so yano wene wasile kuti yasunga isano. Lyene aina Izlaeli yonsi yalamanya ukuti so akukulola wa mwanisi kunoli, nga na yao akukulondela yalakomeleka wakwe cimwi.”

²² Acino iyimikila Abusalomu itaalu api paala li sano, nga nawe amanyana na aci yauze yakwe isi pa manso ya ina Izlaeli yonsi.

²³ Mu manda yalya umpandamano uno Aitofeli wapeelanga wali ungati amazwi akufuma kuli Leza umwisikulu. Davidi na Abusalomu yoili kwene avino yaulolanga.