2 Samueli 13 - Amazwi Yakwe Leza 2013

Amunoni na Tama

¹ Abusalomu umwana wakwe Davidi wakweti kaci wakwe umuyembe nupya wali a nacisungu. Izina lyakwe a Tamala. Nga pacisila ca nsita imwi, Amunoni umwana wakwe Davidi amukumbwa.

² Amunoni wamutemilwe wakwe cimwi mpaka asuka alwalilapo, pamulandu wakuti atazanyile inzila iya kumuzembelekela. Wakwe umwi atatala wamanya umonsi, Tamala wasunzilwe sana ku kukana kumanya umonsi.

³ Lelo Amunoni wakweti cuza umwi umucenjele sana, izina lyakwe wali a Yonadabu, umwana wakwe Syimea umwina wakwe Davidi.

⁴ Yonadabu anena Amunoni ati, “Wewe mwana wa mwene, lelo cila wanda ukaloleka umukungumale. Uzye icani cikukucuzya?” Amunoni nawe amwaasuka ati, “Nemo nkukumbwa Tamala, kaci wa mwinane Abusalomu.”

⁵ Yonadabu nawe amunena ati, “Pitanga kalale pali bedi wako ukole kwati watulwala. Ndi cakuti yaso yiiza ku kukulola, wize uyanene uti, ‘Napapata munene Tamala awino aize andisya. Nkasi kuti anteyanyizizya icakulya mukwene ale nkumulola, nga lyene andisya.’ ”

⁶ Acino Amunoni acita kwati watalwala, nga aya alala pali bedi wakwe. Mwene Davidi aya ku kumulola, nga Amunoni amunena ati, “Napapata munene Tamala aize ampangile tukeke tunono sile kuno, ale nani nkumulola, nga aliwe umwisikulu andisya.”

⁷ Davidi nawe atuma akuya nena Tamala ukwi sano na mazwi akuti, “Pitanga ku ng'anda kwakwe kalume wako Amunoni ukamuteyanyizizye ivyakulya.”

⁸ Tamala pali pakuya kweneko amuzana alambalile pali bedi. Alino atoola usu wa ngano, nga akandila alino amupangila utumakeke tumwi tumwi, ale Amunoni akulola. Lino wamupangila

⁹ amupungwilapo tumwi pa mbale kuti alye. Lelo wene akana ukuilila umwisikulu. Alino Amunoni anena Tamala ati, “Nena antu yonsi yafume panzi.” Acino antu nayo iyafuma.

¹⁰ Alino Amunoni anena Tamala ati, “Leta kuno utumakeke undisye wewe kwene.” Nga Tamala pali pakutoola utumakeke tutu tuno wapanzile atuleta kuli Amunoni kalume wakwe umu muputule.

¹¹ Lelo lino wamutwalila kuti alye, nawe amulema api kasa nga amunena ati, “Iza kuno tulale nani.”

¹² Tamala nawe akana ati, “Awe nakana, utezya umpatikizye kuti tucite icintu icamuzewanya ndi cico, icisicitika mu Izlaeli! Cene cikaleta umuzewanya!

¹³ Uzye wemo ukulola ukuti ningacita uli ndi nazewana? Nupya nawe kwene papo pano uli ulasanguka sile iciwelewele ku ina Izlaeli. Napapata landanini nu mwene. Nemo nkusininkizya ukuti wene atanga akane ukuntwalizya kunuli.”

¹⁴ Lelo Amunoni wene wakanyile ukuvwa vyonsi vivyo. Pamulandu wakuti walusizye Tamala amaka, amulema ku kupatikizya acita na vino walondanga.

¹⁵ Kufuma papo kwene Amunoni pasi pakupata Tamala wakwe cimwi. Amupata ukuluta vino wamutemilwe mpiti. Amunena ati, “Katuka, fuma muno!”

¹⁶ Tamala nawe amwaasuka ati, “Awe, cakana. Ndi cakuti wanzinga, ale lyene cimaipisya ukuluta icintu cino watucita kunondi.” Lelo Amunoni akana ukuvwa kunoli.

¹⁷ Aama umuomvi wakwe amunena ati, “Fumya umwanaci wi apanzi. Musunkilizye afume ufunge nu mulyango.”

¹⁸ Icaleka umuomvi wilya amufumya nga afunga nu mulyango. Tamala wazwite ilaya ilitali amakasa, wakwe vino ana yakwe yamwene atatala yamanya umonsi yazwalanga pa manda yalya.

¹⁹ Tamala fwandi pali pakuipaka itwi ku mutwe pa kuilangizya ulanda uno wali nawo. Alepola ni laya lino wazwite, apanga na makasa pa mutwe nga atandika nu kulila ala akupita.

²⁰ Lino Abusalomu kalume wakwe wamulola, amuuzya ati, “Uzye uwakwifya a Amunoni? Utezya unene umuntu nanti wenga pali cii. Wene akalume wako.” Acino Tamala aikala umukungumale umu ng'anda mwakwe Abusalomu kalume wakwe.

²¹ Lino umwene Davidi uvwa icintu cii, pasi pakusoka.

²² Abusalomu apata Amunoni sana pa kwifya kuno wene wifizye kuli Tamala kaci wakwe, cakuti atalondanga nu kuvwanga na Amunoni

Abusalomu walandula pa kukoma Amunoni

²³ Lino papisile imyaka iili, Abusalomu ale akusenya imfwele zyakwe amavumbu ku Baali Hazoli, pipi nu ku Efulemu, nga aama ana ya mwene aonsi yonsi.

²⁴ Alino aya ku mwene Davidi amunena ati, “Mwene wakwisaci, indi apakusenya imfwele zyane amavumbu. Uzye mutange mwemo muzanweko pamwi na makombe inu?”

²⁵ Davidi pali pakumwasuka ati, “Awe, mwanane. Tutangetuye kweneko swensi.” Abusalomu apapata sana, lelo umwene akana. Lelo amupolelela sile.

²⁶ Lyene Abusalomu avwanga ati, “Ndutangiza, fwandi leka tupite nu mwinane Amunoni.” Umwene nawe amuuzya ati, “Uzye pacani cino ukulonda mupitile nawe?”

²⁷ Lelo Abusalomu atwalilila ku mupapata, asuka umwene azumila ukuti Amunoni pamwi na ana aonsi ya mwene yauze yonsi yapite nawe. Abusalomu ateyanya icimulo icilingine yamwene,

²⁸ nga apeela ilamulo ku yaomvi yakwe ati, “Uvwini kuno! Mulolekesye lino Amunoni amakoleka waini, nga nani ndi niza napeela ilamulo nati, ‘Mukomini Amunoni,’ mwemo ukumukoma. Mutuvwa intete, foo. Uwo umulandu wane nene. Mwemo musipe sile.”

²⁹ Acino aomvi yakwe Abusalomu iyakoma Amunoni wakwe muno Abusalomu wayanenyile. Alino ana ya mwene yonsi pyu yauze aonsi iyakatuka, nga iyakwela pa nyumbu zyao, yapuuka.

³⁰ Lino yali umu nzila, ale yakuswilila impwelo ifika kuli Davidi iyakuti, “Abusalomu watakoma ana ya mwene aonsi yonsi. Kusi nanti wenga asiile.”

³¹ Avili vino umwene Davidi wakatwike, alepola insalu zyakwe ukulanga ulanda uno wakwata. Aifwanta na pansi. Aomvi yakwe nayo iyimilila pamwi na aliwe kwene ale yatiyalepola ni nsalu zyao.

³² Lelo Yonadabu umwana wakwe Syimea, umwina wakwe Davidi, avwanga ati, “Mwene wakwisaci, ala utelenganya ukuti yatiyakoma ana yako yonsi. Lelo Amunoni mutupu uwatafwa. Lii lyali ipange lyakwe Abusalomu ukufuma sile lino Amunoni waifizye Tamala kaci wakwe.

³³ Acino we musambazi umwene wane utataila impwelo iyakuti ana yako yonsi pyu yatiyafwa. Amunoni sile uwatafwa.”

³⁴ Abusalomu nawe lilyo ala watapuuka. Alino umusilika uwali pa luti lwa kulinda alola iumba ilikulu kuno likwiza, ala likutentemuka umwamba umu nzila ino yafuma ku Holonaimu.

³⁵ Yonadabu pali pakunena Davidi ati, “Ana yako ayano yakwiza, wakwe muno nalimvwangile nati yakwiza.”

³⁶ Lino wamala sile ukulanda, ana ya mwene nayo iyafika, iyala yakulosya ni mpoma. Umwene nawe kwene pali pamwi na aomvi yakwe iyalosya wakwe cimwi.

³⁷ Abusalomu utwike aya ku kuzina kuli Talimai umwana umonsi wakwe Amiudi, umwene waku Gesyuli. Lelo umwene Davidi alosya Amunoni umwana wakwe umonsi pa nsita ntali.

³⁸ Pacisila cakuutukila ku Gesyuli, Abusalomu aikala kweneko imyaka itatu.

³⁹ Umwene Davidi atandika ukuluuka Abusalomu, pano watekeziwe pa mfwa yakwe Amunoni.