2 Samueli 12 - Amazwi Yakwe Leza 2013

Natani wakalipila Davidi, Davidi nawe azenzuka

¹ Yawe atuma kasema Natani kuli Davidi. Nga lino Natani wafika kuli Davidi, amunena ati, “Mu musumba umwi mwali antu yaili. Wenga wali umukama nu muze nawe wali umupina

² Umukama wakweti imfwele ni ng'ombe izingi wakwe cimwi.

³ Lelo umupina wene atakweti cimwi suka sile akana ka mfwele akamusesi konga kano wakazile. Wakasunganga ningo cakuti kakulilanga umu ng'anda umwakwe pamwi na ana yakwe. Kene kalyangako ivyakulya vyakwe, nu kumwela amanzi ku lwako lwakwe, nga nupya wakalelanga mu makasa yakwe. Kunoli, kene kali sile wa mwana wakwe umwanaci.

⁴ “Uwanda umwi umwenyi wizile ku ng'anda ya mukama. Nga umukama atalondanga ukufyula imfwele nanti ing'ombe yonga iyakuti aimule umwenyi wakwe wilya. Lelo wene atolela umupina akana ka mfwele akamusesi nga akomela umwenyi wakwe akano amwimula.”

⁵ Davidi nawe asokela umukama wiyo sana nga anena Natani ati, “Nalapa umwi zina lyakwe Yawe waumi ukuti umuntu wiyo uwacisile cico alinzile ukufwa!

⁶ Wene alinzile alipile amaila yani pa mfwele iyo, pamulandu wakuti watacita icintu camusango uwo nupya atakweti uluse.”

⁷ Lyene Natani anena Davidi ati, “Wewe uli muntu wilya! Yawe, Leza wa ina Izlaeli watavwanga ati, ‘Nakusolwile ukuya umwene waku Izlaeli, nu kukutuula kuli Saulo.

⁸ Nakupiile uwene wa musambazi wako nga na aci yakwe kwene. Nakucisile umwene waku Izlaeli na ina Yuda. Ndi cakuti vii vyonsi vitakukwanyile, ngano nakupiile navyuze ukongezya pali vii.

⁹ Uzye pacani cino wasuuzile amasunde yakwe Yawe pa kucita ulukota wakwe luu pa manso yakwe? Walesile kuti Uliya umwina Hiti afwe umu nkondo pa kuleka aina Amoni yamukome nga utola nu muci kuti aye uwako!

¹⁰ Lyene muli cila mukulo yamwi amu mupanda wako yalafwa imfwa iipisye, pamulandu wakuti wemo wakana ukunjela nga watwala nu muci wakwe Uliya umwina Hiti.

¹¹ “Yawe wavwanga wati, ‘Inkulapa sana ukuti ndaleka umwi ukufuma mu akazi kako akuletele intazi. Indatoola aci yako nu kuyapeela ku monsi muze pa manso yako, nga nawe alalala nayo umusanya wakwe mba.

¹² Wemo wayembwike nawe mu umfisolo, lelo indacita icintu cii umusanya wakwe mba pa manso ya ina Izlaeli yonsi.’ ”

¹³ Davidi pali pakuvwanga ati, “Naifya kunuli we Yawe.” Natani nawe aasuka ati, “Yawe wakwelela. Utakufwa.

¹⁴ Lelo kwene nanti ciye vivyo, umwana wako wene alinzile ukufwa pano wemo wacisile imisuli kuli Yawe.”

¹⁵ Lyene Natani aswilila ukwakwe. Yawe pali pakulwalika sana umwana wino Davidi waviile muli muka Uliya.

Mwana wakwe Davidi wafwa

¹⁶ Davidi wapapatile sana umwana wakwe kuli Leza pamulandu wa kulwala kwakwe. Davidi mpaka ata nu kulya nga aya umu ng'anda umwakwe nga alambalala pansi usiku onsi.

¹⁷ Aikolo akwi sano iyezya sana kumukatusya, lelo wene akana, nga atalile icakulya nanti cimwi pamwi na alio.

¹⁸ Pa wanda uwalenga cinimbali umwana wilya afwa. Aomvi yakwe Davidi iyuvwa intete zyakumunena ukuti umwana wakwe watafwa, pano yelenginye yati, “Lino umwana acili nu umi, Davidi atatwasukanga lino tukuvwanga kunoli. Uzye lyene tungamunena uli tuti umwana wakwe watafwa? Wene angaicitila cimwi iciipe!”

¹⁹ Davidi alola ukuti aomvi yakwe yakutotozana nga amanya ukuti umwana wilya watafwa. Alino auzya ati, “Uzye umwana watafwa?” Nayo yaasuka yati, “Ee mukwai, watafwa.”

²⁰ Lyene Davidi akatuka pansi, aya mu kufulala, asakula ni nyele zyakwe ningo, nga azwala ni vyakuzwala vyuze. Alino aya ku ng'anda yakwe Yawe atandika nu kupepa. Lino waweluluka ukwi sano ukwakwe, alenga icakulya nga zuwazuwa lino yamwimula alya nu kulya.

²¹ Aomvi yakwe iyamuzya yati, “Swemo twaposiwa ukutezya cii. Lino umwana wako wali nu umi wemo wamulilile nu kukanalya icakulya. Lelo zuwazuwa lino umwana wafwa, wemo ukatuka nu kulya icakulya!”

²² Davidi nawe aasuka ati, “Ee, intalyanga nu kumwa lino umwana acili nu umi. Nelenginye ukuti limwi Yawe anganguvwila uluse nu kuleka kuti umwana atafwa.

²³ Lelo vino lyene caticisila watafwa, cino ningakanila ukulya icani? Uzye ningamututulula aye nu umi nupya? Uwanda umwi ndasuka inje kunoli, lelo wene atangatala aize kunondi.”

Solomoni wavyalwa

²⁴ Nga lyene Davidi atekezya umuci Batisyeba. Alino aya aingila munoli amanyana nawe, nga umuci amuvyalila umwana umonsi, nga Davidi amutemela izina ati a Solomoni. Yawe atemwa umulumendo wilya

²⁵ nga atuma kasema Natani kuti akamutemele izina ati a Yedidaya, pamulandu wakuti Yawe wamutemilwe.

Davidi wapokolola umusumba wa Laba

²⁶ Pa nsita ilya Yoabu watwalilile ukulwisya Laba, umusumba ukalamba uwa ina Amoni nga lilyo ale kwasyala sile panono kuti aupokolole. Apokolola nu muputule wa mukasi na nkasi ki sano.

²⁷ Yoabu atuma inkombe kuli Davidi, ati, “Natindwisya umusumba wa Laba nu kupokolola ivifula vyakweo ivya manzi.

²⁸ Alino cino fwandi konganika ivita vyako mukazinguluke umusumba nu kuupoka. Nga cisi vivyo namapoka umusumba nu kuutemela izina lyane.”

²⁹ Acino Davidi akonganika ivita vyonsi nga iyaya ku musumba wa Laba, iyauzanza nu kuupoka.

³⁰ Pali pakutoola ni cilongwe ku mutwe wakwe kaleza ka ina Amoni, ka Moleki. Icilongwe cico capangilwe na zaabu nupya canyomile ukufika nu ku makilogalamu manye amakumi yatatu na yasano nga cakweti ni iwe lyamutengo umukasi. Asenda ni visampwe ivingi ukufuma mu musumba ulya.

³¹ Asenda kumwi na antu yano yali mu musumba ulya, aya ayapeela incito iyakulepula imbao, ni yakulepula amawe na yapiki. Ukulunda penepo ni ncito iyakuomvya impasa alino nu kutama injelwa. Avili vino wene wacisile na kuli yonsi ali mu misumba ya ina Amoni. Lyene Davidi ni vita vyakwe vyonsi iyaswilila ku Yelusalemu.