2 Samueli 11 - Amazwi Yakwe Leza 2013

Davidi na Betisyeba

¹ Apa mwela, lino yamwene yakaya ku ulwi, Davidi atuma Yoabu na makombe yakwe pamwi ni vita vyonsi ivya ina Izlaeli. Nayo pali pakuyalwisya nu kucimvya aina Amoni nga yazinguluka umusumba wa Laba. Lelo Davidi wene wasile umu Yelusalemu.

² Uwanda umwi ku manguzi, Davidi akatuka pa musanzi wakwe afuma akulyatoka apipaala li sano lyakwe. Lino ali apipaala, alola umwanaci akufulala. Umwanaci wilya wali umuyembe wakwe cimwi.

³ Davidi pali pakutuma intumi iya kuyalondelezya pa mwanaci wiya, nga nayo imunena iti, “Icizanikwa ukuti wene a Batisyeba, umwana umwanaci wakwe Elyamu nupya umuci wakwe Uliya umwina Hiti.”

⁴ Davidi atuma inkombe iyakuya mutoola. Lino wiza kunoli, Davidi amulanzya nga amumanya. Nupya cali sile ala Betisyeba wacifuma ku mpepo. Lyene Betisyeba aswilila ukwakwe.

⁵ Pacisila cakwe cii Betisyeba asenda indilwa nga atuma intumi izyakuyanena Davidi ukuti wene watasenda indilwa.

⁶ Davidi nawe pali pakutuma amazwi kuli Yoabu ati, “Ntumile Uliya umwina Hiti.” Nga Yoabu nawe pali pakutuma Uliya kuli Davidi.

⁷ Lino Uliya wafika Davidi amuuzya pa mutende wakwe Yoabu na vino ivita vili. Alino nu kumuuzya vino inkondo ikupitika

⁸ Lyene Davidi anena Uliya ati, “Pitanga utentemukile ukwako nga ufulale ingazo.” Acino Uliya afuma mwi sano, nga iyamulondezya uwila ukufuma ku mwene.

⁹ Lelo Uliya ataile ukwakwe. Wene ala asile pa mulyango wi sano pamwi na aomvi ya mwene yonsi.

¹⁰ Lino Davidi uvwa ukuti Uliya ataile ukwakwe, amuuzya ati, “Uzye wemo utacifumile pa lwendo ukutali? Uzye pacani cino utaile ukwako?”

¹¹ Uliya nawe aasuka Davidi ati, “Aina Izlaeli na ina Yuda yonsi yali ku nkambi, nga umusambazi wane Yoabu nga na makombe ya mwene yatiyakuula insakwe pa mpanga pa mbiliwili. Uzye lyene icani icingaleka nene inje ukwane ku kumwa nu kulya nu kulala nu muci wane? Awe icumi nalaya nu mulapo ukuti cico cene ntange ncicite!”

¹² Alino Davidi amunena ati, “Fwandi ulinde kuno uwanda nauze onga, nga mutondo indakutuma uswilile.” Acino Uliya walinzile mu Yelusalemu uwanda ulya nu wanda uwalondelilepo.

¹³ Davidi pali pakumwama ukwakwe ku kulya nu kumwa pamwi na aliwe nga aleka akoleka. Lelo ku manguzi Uliya aya alambalala pamwi na aomvi ya musambazi wakwe. Wene ataile ukwakwe, awe.

¹⁴ Akatondo Davidi alemba kalata nga apeela Uliya kuti atwalile Yoabu.

¹⁵ Muli kalata walemvile ukuti, “Uwike Uliya ku nkolelo pa mulongo wa nkondo kuno ulwi ukavile, uleke yamukome afwe.”

¹⁶ Akatondo lino Yoabu wika ivita umu kuteyamila kuzinguluka umusumba ulya, alola apali ivita vikalale apano aya afyantika Uliya.

¹⁷ Lino aonsi amu musumba ulya yiiza yafuma nu kulwisya Yoabu, yamwi aonsi amu vita vyakwe Davidi yakomilwe kumwi na Uliya umwina Hiti kwene.

¹⁸ Yoabu pali pakutumila Davidi amazwi yonsi akumile ulwi.

¹⁹ Akonkomezya ni nkombe ati, “Lino wamala ukulondolwela umwene vyonsi ivikumile ulwi uu,

²⁰ umwene angasoka nga akuuzye ati, ‘Uzye pacani cino mwali mwapalamila ku musumba ku kulwa? Uzye mutali mwamanya ukuti yangamulasa ni nceto lino yimilile apapela ya lung'umba?

²¹ Uzye mutange mwiusye vino Abimeleki umwana umonsi wakwe Gidyoni wakomilwe? Cali ku Tebezi kuno umwanaci umwi wamuponyezizye umwanansyo ukufuma apapela ya lung'umba amupoola afwa nu kufwa. Uzye pacani cino mwali mwapalamila ku lung'umba?’ Ndi cakuti umwene wamuzya vivyo, lyene mumwasuke muti, ‘Na Uliya kwene umuzya wako umwina Hiti watafwa.’ ”

²² Inkombe ilya itenuka, nga lino yafika kuli Davidi imunena vyonsi vino Yoabu waitumile.

²³ Inkombe inena Davidi iti, “Anisi itu yali akome ukutuluta. Ali cino yene yafumile ukunzi nu kwiza tulwisya pa lwalala. Lelo swemo twayasimwizye nu kuyayasikilizya pa wingililo pa mpongolo ya musumba.

²⁴ Lyene ali lino yakalasa ya nceto iyatandika ukulasa inceto ukufuma ku lung'umba, nga na onsi yamwi amwene nayo kwene iyakomwa, kumwi na Uliya kwene umuomvi wako umwina Hiti.”

²⁵ Davidi nawe anena inkombe ati, “Komelezya Yoabu nupya umunene ukuti atalinzile ukusakamikwa, pano umuntu akufwa umu nkondo asimanyika, awe. Lemasya sana ukulwisya umusumba nu kuwonona.” Umunene vii kuti umukomelezye.

²⁶ Lino Betisyeba, umuci wakwe Uliya uvwa ukuti iya watafwa, amulosya.

²⁷ Indosya lino yasila, Davidi atuma akuti yace yaye yakamutoole yamulete ukwi sano ukwakwe. Alino amutola aya umuci wakwe, nga nawe amuvyalila umwana umonsi. Lelo kwene Yawe atatemilwe icintu cino Davidi wacisile.