2 Samueli 10 - Amazwi Yakwe Leza 2013

Davidi wacimvya aina Amoni na ina Asilya

¹ Pacisila ca nsita imwi, umwene Naasyi uwaku Amoni afwa, nga Hanuni umwana wakwe umonsi apyana.

² Umwene Davidi avwanga ati, “Ndinzile ukulanga ucuza uwacumi kuli Hanuni, ndi vino Naasyi, isi wacisile kunondi.” Acino Davidi atuma inkombe zyakwe kuti zikalange ulanda ni cililizi cakwe. Lino yafisile ku mpanga ya ina Amoni,

³ intunguluzi zya ina Amoni izinena Hanuni iziti, “Uzye ukwelenganya ukuti Davidi watatuma inkombe zii kunuli ku kwizalosya so pakuti alange umucinzi kuli aliwe nga nu ulanda kunuli? Awe cisi vivyo! Wene watayatuma kuno wa nengu ku kwizaendezya umusumba uu, pakuti angaucimvya!”

⁴ Acino Hanuni alema inkombe zyakwe Davidi, alino azipela ivilezu lwa kwitama lyonga, nga azilepwila ivyakuzwala ukufika umu ntungu, pakasi pa matako. Alino azita kuti ziswilile.

⁵ Ala cali icansonyi kunozili cakuti iziposiwa ukuswilila kumwao. Lino Davidi uvwa ivyati vicitikila, atuma inkombe zyakuyanena inengu zizi kuti zikale umu Yeliko nu kuti zitakaweluluke suka sile ivilezu vimele nga vitalimpe.

⁶ Aina Amoni iyiluka ukuti yatiyapanga uwanisi pakasi kao na Davidi. Pali pakutuma nu kulipila asilika kuti yize yayazwilizye. Asilika yapa ngazo aina Asilya ukufuma ku Beti Leobu nu ku Zoba yali amazimbi amakumi yaili, nayauze ukufuma ku Tobu yali amazimbi ikumi na yaili, nga ukwikapo nu mwene waku Maaka pamwi na antu yakwe izimbi lyonga.

⁷ Davidi auvwa pali cii, nga atuma Yoabu ku kusenda ivita vyakwe vyonsi nu kuyayalwisya.

⁸ Aina Amoni pali pakufuma ku kuteyamila pa wingililo waku Laba, umusumba ukulu uwakwao. Pa nsita ili imwi kwene aina Asilya yauze afumile ku Zoba nu ku Leobu nga na onsi aku Tobu nu ku Maaka, iyatantama pa lwalala.

⁹ Yoabu alola ukuti anisi yakwe yangamuzanza ku nkolelo nu kucisila kwene. Lyene asolola yanyela pa vita vya ina Izlaeli, ayano atantamika ulunga na ina Asilya.

¹⁰ Ivita vyuze ivyasyala avipeela kuli Abisyai umwina wakwe kuti awino aye musika wakwevyo. Nawe Abisyai ayatantamika ulunga na ina Amoni.

¹¹ Yoabu anena Abisyai ati, “Ndi walola ukuti aina Asilya yancimvya, wize ungazwe. Nani ndi nalola ukuti aina Amoni yakucimvya, namaiza inkwazwe.

¹² Wemo ule ukome sile nu kuposya! Leka tulwisizye antu itu na maka, tulwisizye ni misumba yakwe Leza witu. Ukulonda kwakwe Yawe kule kucitike!”

¹³ Lyene Yoabu ni vita vyakwe iyaya ku nkolelo ku kuzanza, nga aina Asilya iyapuuka.

¹⁴ Lino aina Amoni yalola ukuti aina Asilya yapuuka, iyutuka Abisyai, iyawelela icisila, iyingila nu mu musumba. Lyene Yoabu pali pakusenka asya wata ukulwisya aina Amoni nga aswilila ku Yelusalemu.

¹⁵ Aina Asilya iyiluka ukuti yatiyacimviwa ku ina Izlaeli. Icaleka yakonganika ivita vyao vyonsi.

¹⁶ Umwene Hadadezeli atuma akuya ama aina Asilya yano yali lwaku ufumondaka wa Luzi lwa Yufulate nga nayo yiiza ku Helamu ala yakutungululwa na Syobaki, musika mukalamba uwa vita vya mwene Hadadezeli uwaku Zoba.

¹⁷ Lino Davidi uvwa pali cii, akonganika aina Izlaeli yonsi, iyalamba Luzi lwa Yodani, nga iyatandika ukuya ku Helamu, kuko kuno wazanyile aina Asilya yatiyateyanya mpiti kuti yamukomanye nu kumulwisya. Alino ulwi iutandika.

¹⁸ Nga aina Izlaeli iyazinganya ivita vya ina Asilya mpaka iviswilila icisila. Davidi na antu yakwe iyakoma aina Asilya imyanda cinimbali, ali asilika akapisya amaceleta. Iyakoma na asilika amazimbi amakumi yani, akapita pa mfwalasi. Iyacisa Syobaki, musika mukalamba uwa vita vya anisi yao, uwafwilile kuku kwene ukwali ulwi.

¹⁹ Lino yamwene yonsi atontelanga Hadadezeli yiluka ukuti yatiyacimviwa ku ina lzlaeli, iyalaya ukuti yatalatala yalwe nupya na ina Izlaeli nga iyatandika ukuteekwa na alio. Alino aina Asilya lyene iyuvwa intete cakuti yatazumile nupya ukwazwilizya aina Amoni.