2 Petulo 3 - Amazwi Yakwe Leza 2013

¹ Mwe yacuza akundwe, wii ali kalata wakwe ciili wino namulembela. Muli yakalata oili yano namulembile, nemo nezizye kuti mukatusye myenzo ya kwelenganya kusuma pa kumwiusya vintu vii.

² Nkulonda kuti mwiusye mazwi yano yakasema amuzilo yavwanzile ku mpiti, nga ni sunde kufuma ku Mwene nupya Katuula witu, lino atumwa yamupile.

³ Cankolelo, mulinzile kumanya ukuti mu manda yaa akusyalikizya antu yamwi yalaloleka yano umi wao ukatungululwa ni nsuna zyao. Yene yalamusoweka

⁴ nga nu kuuzya yati, “Uzye wene atalavile ukuti aliiza? Uzye ali kwi? Vikolwe vitu vyafwa mpiti, lelo vintu vyonsi vicili vili vimwi ndi vino vyali kufuma lino Leza waumvile insi!”

⁵ Yene yakavwanga cii ku mufulo pano yakalonda kwilila ukuti ku mpiti Leza wapile ilamulo, nga mayulu ni nsi vyaumvilwe. Insi yacisilwe kufuma ku manzi nupya yaumvilwe ku manzi.

⁶ Nupya cali uku manzi yakwe mulamba, kuno insi yampiti yononyilwe.

⁷ Lelo izwi lyakwe Leza ilyasunga mayulu nga ni nsi ino ilipo ilelo, kufika lino vilononwa nu moto. Vyene vyasungwa kufika pa wanda uno yakaifya yalapingulwa nu kononwa.

⁸ Lelo mwe yacuza akundwe, mutailila cintu conga! Kuli Leza wanda onga waya wa myaka izimbi, nga ni myaka izimbi yaya wa wanda onga.

⁹ Leza atazingota pa kucita cino walaya, ndi vino yamwi yakaelenganya. Lelo Wene akateeka mwenzo kunomuli, pamulandu wakuti wene asyalonda kuti muntu umwi akononwe. Wene akalonda kuti antu yonsi yazenzuke.

¹⁰ Lelo uwanda wa kuwela kwa Mwene uliza wa mwivi. Pa wanda ulya mayulu yalalowa ni congo cikulu nga moto ulasungulula nu konona vyamu mayulu nu konona insi na vyonsi vyayamo.

¹¹ Vintu vii vilasunguluka mu musango kwene uu, uzye mwemo mulinzile kuya antu amusango cii? Umi winu ulinzile kuya wamuzilo nupya muipelesye ku kutumikila Leza,

¹² lino mucili lolela Wanda wa Mwene. Acino citini consi cino mungacita kuti wanda uwo wize zuwa. Lilyo alino mayulu yalononwa nu moto, nga ni vyaya mwenemo vilasunguluka nu moto.

¹³ Lelo swemo tukalolela vino Leza watulaya, mayulu apya nga ni nsi ipya, muno mulaya kuteekwa na Leza.

¹⁴ Acino, mwe yacuza, lino mucili mukulolela, mulinzile kusininkizya ukuti Mwene akamuzane akaele, aula maifyo, nu kwikala mutende pakasi kinu na Leza.

¹⁵ Mutailila ukuti Leza wateka mwenzo pano wene akalonda kuti antu yatuulwe. Cikwene acino Paulo, cuza witu mukundwe wavwanzile lino wamulembile kulingana na mano yano Leza wamupile.

¹⁶ Vii avino akulanda mu makalata yakwe yonsi lino walemba pa vintu vii. Mu makalata yakwe mwaya vintu vimwi vitale kuvwa vino antu atutu nupya atatekela yakapililika. Vikwene avino yakapililika ni vyamu malembelo yauze.

¹⁷ Lelo mwemo yacuza, mumanyile cii mpiti. Cenjelini, kuti kuluvyanya kwakwe yakaifya kutamutungulula kuti mupone mu utailo.

¹⁸ Lelo mwemo mutwalilile kukula mu cikuku nga nu mukumanya Yesu Klistu, Mwene witu nupya Katuula witu. Kunoli kuye lulumbi, ilelo na manda pe! Ameni.