2 Milandu 4 - Amazwi Yakwe Leza 2013

Iviya vino yisile mu Ng'anda ikulu yakwe Yawe

¹ Umwene Solomoni wapanzile kavuwa. Umu mbali zyonsi kavuwa kali amamita 9. Alino umu utali ukuya papela katalimfile amamita 4.

² Alino apanga ni tanki lya kufulalila ilya mukuwa. Lyazisile amamita 2. Alino ukusalala ukufuma apampela ya milomo ukufika uku lusansa luze umu kucilinganya namo mwali amamita 4. Alino ndi twatola umwando twalilizya, ungaya amamita 3.

³ Ukunzi ukuzinguluka imilomo iyalenga kweneko imisilwa iili ya vintu ivikoline na yacipambasi ya ng'ombe. Umusilwa onga iuya lwapapela, uze nao lwapisika. Vyonsi ala ivikumbilinkanyiziwe ukwi tanki.

⁴ Itanki lilyo lyatesilwe apapela ya ng'ombe 12 zino yapanzile ukucela ca mukuwa. Zitatu zyalozizye amanso ku kaeya, zyuze zitatu uku uwondaka, zitatu ku ufumondaka, alino na zitatu nazyo ku katutu.

⁵ Ukutikama kwi tanki kwali wa cizanza ukulingana na ya milimita 75. Ukunzi ya milomo yi tanki kwali ukusapalale kwati avino imilomo ya nsembo ikaloleka nanti vino iluwa likasapalala. Mwingilanga mwenemo amalita ya manzi 60,000.

⁶ Lyene alino yapangila penepo na mabeseni nayauze ukulingana ni kumi lyonga. Visano iyavitekela ukwi kasa lilunji, vyuze ukwimani. Ali muno yafulanga inyama zyonsi zino yapelanga wa mawila yakoca. Yasimapepo ali yano yafulanga inyama zizyo umwi tanki likalamba.

⁷ Alino iyapanga ni vyakutekapo inyali vyakwe zaabu ukulingana muno vyali nu kupangilwa, iyavika nu mu Ng'anda ikulu yakwe Yawe. Visano iyavitekeela lwaku katutu na visano lwaku kaeya.

⁸ Alino yapangila penepo na matebulo ikumi nga iyayika mu Ng'anda ikulu yakwe Yawe. Nayo kwene ya sano yayika ku katutu na yasano ku kaeya. Yapangile penepo ni ngeso zyakwe zaabu zyakukanyizizya amanzi, vyakwe Zaabu. Nazyo zyali 100.

⁹ Alino yapanzile umusolo wakwe yasimapepo umukasi. Alino nauze lwa kunzi. Imilyango yapa mpongolo iyakuila umukasi ka misolo iyo, yapomela kweneko umukuwa.

¹⁰ Alino lyene yika itanki likalamba umu pipi ni tungi ilya kwikasa lilunji.

¹¹ Hulamu wapanzile ni ntendo, yafosyolo, ni ngeso zyakukanyizizya. Acino wene wamalilile imilimo yonsi ino umwene Solomoni wamunenyile ukuomba mu Ng'anda ikulu yakwe Yawe.

¹² Alino akuula incesi zizya ziili, ukupanga imitwe iili apapela ya ncesi kwene zizya ukupikolezya vivya ivyakolana ni minyololo nu kumitwe kwene iya.

¹³ Alino nu kupanga ivintu imyanda iini ivyakolana ni viseekwa vya pomegeleneti, ivyakwika apa mitwe ilya. Uku mutwe onga ukwika penepo imikukulo iili.

¹⁴ Nu kupanga ivintu ikumi ivyakutendekela penepo ivyakufulalila. Alino ni vyakufulalila kwene ikumi.

¹⁵ Ukupanga itanki likalamba ni vintu ikumi ivyakutendekelapo itanki.

¹⁶ Alino nu kupanga inyungu, yafosyolo na yafoloko. Fwandi Hulamu Abi wacenjile sana mu vyakupangapanga. Wene uwapanzile iviya vyonsi vyamutengo vyakwe zaabu nu mukuwa utuputupu, mu musango kwene uno Solomoni wamunenyile kuti avino aombe.

¹⁷ Vyonsi vivyo avino umwene Solomoni wengululanga umu mapembo ya mbulo aku musumba waku Sukoti mbali nu ku muzi waku Zeleda mbali yuze umu nyika yaku Yodani.

¹⁸ Umwene Solomoni wapanzile ivintu ivingi sana icakuti kutali wenga uwapimile ukunyoma kwa mukuwa.

¹⁹ Umwene Solomoni wapanzile iviya ivyakuomvya mu Ng'anda ikulu yakwe Yawe vyakwe zaabu ivili wakwe vii: kavuwa kakwe zaabu, amatebulo yano yatantamikilanga penepo umukate uwapeelwa kuli Leza.

²⁰ Ivyakutekapo inyali vyakwe zaabu musuma cuze ni nyali zyaviko zino yakakozezya apa nkolelo ya ncende yamuzilo icindamisye ukulingana na masunde.

²¹ Alino lyene na maluwa ni nyali pamwi ni vyakumanikila kwene vyakwe zaabu mutuputupu.

²² Ivyakuzimizya inyali, imbale zya kukanyizya, ivifutikilo, amalata yakusendela amalasya. Vyonsi vivyo vyapanzilwe na zaabu musuma cuze. Imilyango ya kunzi iya Ng'anda ikulu yakwe Yawe pamwi ni vyamu muputule ukalamba uwamu Ncende Yamuzilo kuluta vyapanzilwe na zaabu.