2 Milandu 3 - Amazwi Yakwe Leza 2013

¹ Lyene Solomoni atandika ku kuula Ng'anda ikulu yakwe Yawe apa Mwamba wa Moliya uku Yelusalemu, papa kwene pano Yawe walolekile umwene Davidi isi wakwe Solomoni. Davidi wateinye incende iyo mpiti. Ali ncende kwene apayelile ulwano lwa kupuulila lwakwe Alauna umwina Yebusi.

² Yatandike ku kuula Ng'anda yakwe Leza ilya umu mwezi wakwe ciili umu mwaka uwalenga cini uwa wene wakwe Solomoni.

³ Ng'anda ikulu yakwe Yawe ino Solomoni wakuuzile, umu utali yali amamita 27. Umu wipi namo yali amamita 9.

⁴ Umuputule wa wingililo walingine sile ni Ng'anda ikulu yakwe Yawe umu wipi. Ali kuti wali amamita 9. Alino ukuya apapela wali amamita 54. Umukasi ka muputule yakulumbile na zaabu.

⁵ Alino umu muputule ukalamba mwene yapampamile imbao zya mikelide. Alino nu kukulumbila zaabu mutuputupu. Alino iyazifilizya apakulemba apapela utuncindu uku ng'umba, na vimwi ivipikolezye ivikuloleka kwati umunyololo.

⁶ Umwene Solomoni ali vino wazifizye Ng'anda ikulu yakwe Yawe nu tumawe utuzipisye, utwa mutengo. Na zaabu wino yafumizye uku Palavaimu.

⁷ Wapomile zaabu mutuputupu uku lung'umba, uku nsondo, nu ku visasa. Uku viumba aomvi iyalenga kweneko yakelubi.

⁸ Akuula ni Ncende Yamuzilo kuluta, nga nu mu utali yali amamita 9 ndi vino Ng'anda ikulu yakwe Yawe yali. Mu wipi namo kwene yali amamita 9. Yaipomile na zaabu anganyoma amatani amakumi yaili.

⁹ Insunga zyakwe zaabu zino yapampamile kweneko, kwasyalilile panono kuti zifike kuli kilogalamu wenga. Uku ng'umba zya miputule yapapela nako kwene yapomile zaabu.

¹⁰ Umwene Solomoni ali pakunena aomvi yakwe kuti yapange yakelubi yaili. Yayengelela na zaabu nu kuyaika umu Ncende Yamuzilo kuluta.

¹¹ Ali muno yayimika ukulozyanya nu mulyango. Yakelubi yonsi yakweti amapa yaili yaili. Ilyapa lyonga lyatalimfile manye amamita yaili na citika. Amapa kwene yayo yakwe yakelubi, yasapalile nu kukomenkana apakasi ka muputule. Alino impela zyuze nazyo ale zisintilile uku ng'umba. Fwandi tungati amapa yakwe yakelubi yacilinginye umuputule onsi.

¹² Mu musango uli umwi kwene ilyapa lyakwe kelubi wakwe ciili umu utali lyali manye amamita yaili na citika, ala lisintilile ku lung'umba luze, nga ilyuze nalyo ala lili manye amamita yaili na citika, lisintilile nu ku lyapa lyakwe kelubi muze.

¹³ Amapa yakwe yakelubi yaa ndi yavungululwa yakumananga amamita 9. Yakelubi yimilile, ala ivinso vyao ivilungatana nu muputule ukalamba uwa Ng'anda ikulu ilya.

¹⁴ Alino yapikwile ni cisalu, icakucingilizya icitelepelele nu kucisenula umwi langi lya cifungo, ni liyenzulukile, alino ni liyenzu cee. Yapikwila penepo na yakelubi.

Incesi ziili izya mukuwa

¹⁵ Umwene Solomoni wakuulile penepo ni ncesi ziili, izyali pamwi yamita 15 na citika. Azisimpa apa mulyango wa Ng'anda ikulu yakwe Yawe. Cila lucesi lwakweti umutwe uwali amamita yaili umu utali.

¹⁶ Intupiko zya ncesi yaziyemvizye nu tuntu tumwi utupikolezye kwati utuminyololo. Iyika nu tuntu tumwi utwalolekanga wa viseekwa vikaamwa ukuti pomegeleneti, umwanda onga.

¹⁷ Incesi zizyo yazika apa mulyango wa Ng'anda ikulu yakwe Yawe. Ulucesi luno lwayelile ukwikasa lilunji yalwamanga yati Yakini, ulwa kwikasa limani nalo iyati Boazi.