2 Milandu 1 - Amazwi Yakwe Leza 2013

Umwene Solomoni walenga amano

¹ Lino uwene wakwe Solomoni umwana wakwe Davidi wakomile, Leza wali nawe nu kumupolelela, wamupolelile sana nu kumupelesya amaka.

² Alino lyene Solomoni anena aina Izlaeli yonsi, yamusika ampuka ya vita izimbi lyonga, alino na yamusika ya vita umwanda onga na akalamba yamu uteko wakwe, amwazwilizyanga ukuteeka umu mpanga yamu Izlaeli ni ntunguluzi zya mitundu yao alino na antu sile yonsi.

³ Alino lyene Solomoni pamwi na antu yonsi akongine yakatuka nu kuya uku ncende yakupepela kweneko iyaku Gibyoni. Na cino yayilile kweneko umulandu wakuti ali kuno kwayelile Itaalu lya Ukongano lyakwe Yawe, lilyo lino Mose umuomvi wakwe Yawe wapanzile umu lwanga.

⁴ Lelo ukuya kwene wawezizye Mbokosi ya Upangano yakwe Leza ukufuma ku Kilyati Yealimu nga aitwala ku ncende ino waiteyanyizizye, pamulandu wakuti wene waipangile Taalu umu Yelusalemu.

⁵ Kavuwa ka mukuwa kano Bezalele umwana umonsi wakwe Uli, umwizikulu wakwe Huli wapanzile nako kwene kali uku Gibyoni, lwapa nkolelo yi Taalu lya Ukongano. Acino umwene Solomoni na antu yonsi yano wakongine nayo yapepa Yawe kuku kwene.

⁶ Solomoni apano lyene apepela Yawe, Leza wakwe. Atuulila penepo na mawila apa kavuwa ka mukuwa akali apa nkolelo yi Taalu. Apano afyulila inyama izimbi lyonga zya mawila yakoca nu kuzyocela papa kwene.

⁷ Uwanda kwene uwa usiku Yawe walolekile Solomoni nga amuuzya ati, “Uzye icani cino ungatemwa kuti nkupeele?”

⁸ Solomoni nawe aasuka ati, “Wemo wayelanga tata Davidi uluse ulukalamba, nupya awewe kwene watuleka kuti imupyane pa cilimba ca wene wakwe.

⁹ Acino we Yawe Leza wane, sungala ule ufikilizye ulayo uno walavile tata. Watumpeela uwene wakuteeka iuvi lii lyonsi livule wa musensenga wa nsi.

¹⁰ Ali cino fwandi nemo nakulenga sile kuti umpeele amano na malango akuti nteeke ningo antu yako. Pasi pano ntanzi vino ningateeka antu yako nyanya wakwe yaa!”

¹¹ Yawe nawe aasuka Solomoni ati, “Walenga icintu icisuma. Utalenzile ukama, ivyuma nanti ululumbi. Nupya utalenzile ukuti anisi yako yakomwe. Fwandi apamulandu wakuti wemo utalenzile ukutantalizya umi wako, lelo walenga sile amano na malango akuteekela mwenemo antu yano nakupeela ukuya umwene wao,

¹² nani fwandi namakupeela amano na malango akuteekela mwenemo antu yane. Namakupeela icuma nu ukama pamwi nu lulumbi kwene, cino yayo akukolelile yatatazile yakwate, nanti alalondelela icisila cako yatalatala yakwate.”

Ivyuma na maka yakwe Solomoni

¹³ Fwandi lyene ali vino Solomoni watumbezile uku Yelusalemu, ukufuma uku Gibyoni apa ncende ino yapepelanga penepo, ukwayelile Taalu lya Ukongano, atandika nu kuteeka aina Izlaeli.

¹⁴ Solomoni wakolonganike amaceleta izimbi lyonga ni myanda ini, ni mfwalasi amazimbi ikumi na yaili. Amaceleta yamwi ni mfwalasi ivisyala umu Yelusalemu. Alino ivyasyala vyene aviika umu misumba yuze.

¹⁵ Lino Solomoni wali apa utesi, siluva na zaabu umu Yelusalemu vyavuzile sana, ungati amawe. Imiti iyakolana ni myovu na yasondwa yali wa misamvu uku wingi.

¹⁶ Aculuzi akwisano lya mwene ali yano yalolekesyanga apa mitengo ya mfwalasi zino zyafumanga uku Eguputo nu ku Kue.

¹⁷ Alino napa mitengo ya maceleta yano yafumanga uku Eguputo yakazyanga imfwalasi ukufuma kuli yamwene ya ina Hiti na ina Asilya. Iceleta lyonga lyakalikangwa apa mutengo wa mpiya zyakwe siluva ukulingana ni myanda mutanda. Alino ni mfwalasi yonga nayo apa mutengo wa mpiya zyakwe siluva ukulingana umwanda onga na makumi yasano.