2 Kolinto 8 - Amazwi Yakwe Leza 2013

¹ Inane tukulonda kuti mumanye vino Leza walanga cikuku ku mauvi amu Makedoniya.

² Yene yeziwe cuze na macuzi yano yapisilemo. Lelo luzango lwao lwali lukulu cuze cakuti kupeela kwao kwali kukulu cuze nanti angala yali apina cuze.

³ Nkusininkizya kuno muli ukuti yene yapile kulingana na pa maka yao, nupya nu kupeela kuluta pali vino yangapeela. Kwaula kupatikiziwa,

⁴ yene yuzizye nu kutupapata kuti tuyazumilizye kukwata syuko lya kwazwa antu yakwe Leza mu Yudeya.

⁵ Nao yacisile kuluta pali vino twapaalilanga. Inkolelo yene yaipile aisikulu ku Mwene nga pacisila kuno tuli, wakwe vino Leza walondanga kuti yacite.

⁶ Acino swemo twakonkomizye Tito, wino uwatandike mulimo uu, kuti atwalilile nga na kuti amwazwe kumalila kutumikila kwene kuu ukwa kutemwa.

⁷ Mwemo mukacita vintu vyonsi ningo kuluta muntu ali wensi. Mukweti utailo ukome kuluta. Mukalanda ningo nupya mwamanya vintu vingi kuluta. Mukalondesya kupeela, nupya mwatutemwa cuze. Caleka ndakai mulinzile kupeela kuluta vino muntu ali wensi angacita.

⁸ Nemo nsyakupeela ilamulo lili lyonsi. Lelo apa kumulanga vino antu yauze yakalondesya kwazwa, nkwezya kumanya kutemwa kuno mwakwata ndu kwa cumi.

⁹ Mwamanya cikuku ca Mwene witu Yesu Klistu. Nanti angala wali umukama, wene waicisile mupina kuti muye akama kupitila mu upina wakwe.

¹⁰ Ilango lino nkweti ilyakuti cingamuzipila kumalila vino mwatandike mwacizo. Mwemo mwali a nkolelo, asi sile mu kucita, lelo nu mu kutemwa kucita.

¹¹ Cazipa mumalile vino mwatandike. Ndi mungapela kulingana na vino mukweti, lyene mungasininkizya ukuti mukulondesya kupeela ndi vino mwelenganyanga kucita.

¹² Ndi mukulondesya kupeela, Leza alapokelela uwila winu pakulola pali vino mukweti, pano asilolekesya pali vino mutakweti.

¹³ Ntakwezya kwangupazizya yamwi visendo kuti namwe munyomelwe. Lelo ica nsambu ukuti

¹⁴ mwayankanyako yauze vintu lino mukweti vingi, na lino yene aulilwe. Lyene namwe lino mululilwa, lino nao yalakwata vingi, yalamwazwa. Mu musango uu, mwensi mulalingana kukwata.

¹⁵ Cili wakwe vino calembwa mu malembelo cati, “Yao akolonginye vingi yatavulilwe kuluta, nga na yao akolonginye vinono sile, yene yatulilwe.”

Tito na Yacuza Yakwe.

¹⁶ Tukutaizya Leza cuze pa kulenga kuti Tito alondesye kumwazwa wakwe vino naswe tukacita kuno muli.

¹⁷ Lino twapapasile Tito kwiza mutandalila, wene atazumile sile. Lelo walondesyanga kwiza mwazwa mukulonda kwakwe umwisikulu.

¹⁸ Pali pamwi na Tito twatuma wenga mwina witu mu utailo wino uwamanyika cuze mu mauvi, mu mulimo uwa kusalanganya Ilandwe Lisuma.

¹⁹ Wene atamanyikwa sile lelo wasololwa na mauvi kuti apita naswe lino tukusenda uwila uu uno ulaleta lulumbi ku Mwene nga nu kulanga vino tukapaalila kwazwa.

²⁰ Tutakulonda kuleka umwi azane kuluvyanya kumwi apamulandu na vino tukuomba pa wila uu uwa kuipelesya.

²¹ Ipange litu ilya kucita cisuma, asi sile pa manso ya Mwene, lelo na pa manso ya antu kwene.

²² Nupya tumatuma mwina witu mu utailo namuze pamwi na Tito. Wene twamusininkizya ningo. Mu cumi twalola maila aingi ukuti wene akulonda kwazwa. Na ndakai kwene acili akulonda kwazwa yauze nu kuluta, pamulandu wakuti mwemo wamutaila cuze.

²³ Tito wene muomvi unji, nupya wene akaomba pamwi nani mu kwazwa mwemwe. Ndi vino cili pamulandu wa ina itu yauze mu utailo yano akupita pamwi nawe, yene yatumwa na mauvi nupya yakaletela Klistu lulumbi.

²⁴ Mulange kutemwa kwinu kuno yali, pakuti mauvi yonsi yasininkizye cii, vino tukuitumika pali mwemwe.