2 Kolinto 3 - Amazwi Yakwe Leza 2013

Aomvi amu upangano upya

¹ Uzye twatandika nupya ukuitumika? Uzye naswe wa antu yauze tukulondekwa kuya na makalata akutulondola kuno muli nanti makalata akufuma kuno muli akutulondola.

² Kalata witu amwemwe, uwalembwa mu myenzo itu kuti muntu wensi angawelenga nu kuvwa.

³ Cimanyike vino mwemwe muli kalata uwalembwa na Klistu wino watumilizye sweswe. Kalata wii atalembwa na inki, lelo walemvilwe na Mupasi wakwe Leza wa umi. Nupya atalemvilwe pa vipampa vya mawe lelo mu myenzo ya antu.

⁴ Tukuvwanga vii pano tukataila Leza kupitila muli Klistu.

⁵ Tutakweti nsambu zyakulanda ukuti twati tucita cintu cili consi swenga pa lwitu. Leza uwatupela maka akucita vyonsi vino tukacita.

⁶ Aliwe kwene akatupeela maka akutumikila mu upangano upya. Upangano uu usi pa masunde yano alembwa, lelo pa Mupasi Wamuzilo. Masunde yano alembwa yene yakaleta imfwa, lelo Mupasi Wamuzilo wene akapela umi.

⁷ Masunde yalemvilwe pa vipampa vya mawe, nga lulumbi lwakwe Leza lwalolike lino yapilwe kuli Mose. Masunde yalenzile cinso cakwe Mose kuyengesa cuze cakuti aina Izlaeli yaposiwe kulolekesya penepo, nanti angala kuyengesa kwali mu kuzima. Ndi Masunde yano yakaleta imfwa, yapilwe nu lulumbi lwa musango uu,

⁸ uzye lyene lulumbi lwa kuomba kwakwe Mupasi Wamuzilo lutalalusya?

⁹ Ndi mulimo wakulenga kuti antu yavunukwe wali uwa lulumbi, nga lyene mulimo wakulenga kuti antu yaye aololoke pa manso yakwe Leza uzye utalalusya kuya uwa lulumbi?

¹⁰ Pano vintu ivyali nu lulumbi ndakai vitakweti, pamulandu wa lulumbi ululusilepo lukuloleka ndakai.

¹¹ Masunde yene yapilwe nu lulumbi luno lwazimile. Lelo lulumbi lwa upangano upya lwene lukulu kuluta, pano lutalatala luzime.

¹² Pamulandu wakuya nu upaalilo uu, twati tupama cuze.

¹³ Swemo tutakoline na Mose, wino wavimvile nsalu pa usyu wakwe pakuti aina Izlaeli yatalola kuno kuyengesa kukuzima nu kusila.

¹⁴ Mu cumi mano yao yali muli kupi. Ni lelo kwene insalu ikayavimba lino yakuwelenga zya mu upangano wa mpiti. Insalu ingavimbuka sile lino muntu waya muli Klistu.

¹⁵ Ni lelo kwene lino Masunde yakwe Mose yakawelengwa, yakampingu ya ina Izlaeli yakavimbwa

¹⁶ lelo muntu ndi waseleukila ku Mwene alino insalu ino ikavimba ikafumiwapo.

¹⁷ Mwene ali Mupasi. Acino kuno Mupasi wa Mwene ali ukuli untungwa.

¹⁸ Caleka mausyu itu yatavimbwa. Yakalanga kuyengesa kwa lulumbi lwa Mwene akatulenga kukolana nawe ndi vino cinso ca muntu cikaloleka mwi galasi. Mwene ali Mupasi akatusenula kuti tukolane nawe nu kuya nawe mu lulumbi.