2 Kolinto 12 - Amazwi Yakwe Leza 2013

¹ Namaitumika, nanti angala musi cimwi cino ningalonka mukuitumika. Lelo ndakai namalanda pa vilolwa vino Mwene wampile nga ni vintu vino wene waumbula kunondi.

² Namanya muntu umwi umwina Klistu wino pa myaka ikumi na ini ino yapita wasenzilwe kupela kwi yulu lyalenga yatatu. Ntamanyile ndi wasenzilwe mu mwili nanti foo. Leza sile awino amanyile ningo.

³ Ndi vino nali ndanzile, nemo manyile kuti muntu wii wasenzilwe ku Paladaise. Ntamanyile ndi wasenzilwe mu mwili nanti foo. Leza sile awino amanyile ningo.

⁴ Kuku akuno uvwile vintu vino vitangalondololwa, vintu vino muntu atangazumiliziwa kulanda.

⁵ Namaitumika pamulandu wa muntu wiya, lelo pasi pamulandu wane nemwisikulu, suka sile pamulandu wa vintu vino vikalanga utonte wane.

⁶ Ndi nalondanga kuitumika, ntangaya mutumpe, pano ale nemo nkulanda cumi. Lelo nemo ntalezya kuitumika, pano ntakulonda muntu nanti umwi anjelenganya kuluta pa cipimo ca vintu vino mwalola nkucita nu kuvwanga.

⁷ Lelo pakuti ntaitutumula pamulandu wa vintu vingi vyakuzunguka vino vyaumbwilwe nu Mwene kunondi, Leza wampile ca kuntota ca munga mu mwili wane icili wa nkombe yakwe Satana ino wazumilizye kwiza nguma.

⁸ Maila yatatu napapasile Mwene kuti asisye kucula kuu.

⁹ Lelo wene waswike ati, “Cikuku cane sile icikulondekwa kunuli. Pano maka yane yakaombesya lilyo lino watonta.” Acino Klistu ndi watwalilila kumpela maka yakwe, lyene nakulaitumika pa utonte wane.

¹⁰ Endi, nemo ndi nu luzango lwa kuya nu utonte, kutukwa, kuzunyiwa, nu kukwata ntazi na macuzi, ndi vyonsi vili pamulandu wakwe Klistu. Pano lino ndi mu utonte, ale lyene nene mukome.

Paulo wasakamala aomvi ya Mwene ku Kolinto.

¹¹ Nacitanga vintu kwati nene mutumpe. Lelo mwemwe mwandenzile kucita vii, pano mwange mulande visuma vya pali nene. Pano nanti angala nemo nsi cimwi, lelo ntacepa kuluta pa atumwa inu yano mukati yacindamisya.

¹² Vinjelengwe nga ni vizungusyo vingi vino vikasininkizya ukuti nene mutumwa vyene vyacisilwe pakasi kinu mu kuteeka kwa myenzo.

¹³ Uzye cani cino nacitile mauvi yauze cino ntacitile mwemwe. Cii, cikusenula vino nemo ntali wa cisendo kuno muli. Acino nkumupapata munjelele pa kuluvyanya kuno muli.

¹⁴ Lii, ila lyakwe citatu lino nkupanga kwiza mutandalila. Lelo na ndakai ntakulonda kulenga cimwi kuno muli. Nkulonda sile mwemwe, lelo asi kuya wa cisendo kuno muli. Usi mulimo wa ana kusungila akwasi yao vyuma, lelo mulimo wa akwasi kusungila ana yao.

¹⁵ Acino nemo ndapela ni nsansa vyonsi vino nakwata pamwi nu umi wane. Namutemwa cuze, uzye lyene mwemo mumantemwa panono?

¹⁶ Mukuzumila ukuti nemo ntali wa cisendo kuno muli? Uzye nemo nali ncenjezi, ino yaomvizye citeyo ca usomvi kuno muli?

¹⁷ Uzye namulilile pa mitwe kupitila mu nkombe zino natumile?

¹⁸ Nakomelizye Tito kuti amutandalile, nupya namutumile pamwi nu mwina witu mu utailo. Uzye lyene mwemo mungati Tito wamulilile pa mitwe? Uzye Tito nani tutelenginye nu kucita mu musango uli onga kwene?

¹⁹ Limwi mukwelenganya ukuti lyonsi lii swemo twezyanga kuicingilila sweisikulu pa manso inu. Awe! Swemo tukalanda ndi vino Klistu akalonda kuti twalanda pa manso yakwe Leza. Yakundwe itu, vyonsi vino tukacita ivyakuti vimwazwe.

²⁰ Nkoopa kuti lino ndiza limwi ndazana kuti miyele inu ipusane na vino ningatemwa kuti iye, nupya nkoopa kuti limwi namwe kwene mulazana kuti miyele yane ipusane na vino mungatemwa kuti iye. Nkoopa kuti limwi ndazana kulemanila, uzuwa, cipyu, kuitemwa, musaalula, lwambo, cilumba, cimvulunganya muno muli.

²¹ Nkoopa kuti lino ndiza limwi Leza alandenga kuya ni nsonyi pa manso inu, ndalonda kulila pano aingi muno muli aifizye mpiti nupya yatazenzwike ku vya winyi vyao, imbunu nga nu uzelele wao.