2 Kolinto 11 - Amazwi Yakwe Leza 2013

¹ Nkupaalila ukuti mumanzumilizya nanti angala nene mutumpe. Namupapata munzumilizye!

² Nemo nkweti uzuwa pamulandu winu, wakwe vino Leza nawe akweti. Mukoline wakwe mwali musanguluke wino nalaya kumufumalizya ku muntu wenga sile. Muntu wiyo a Klistu umwisikulu.

³ Ndi ni ntete zyakuti mwemo mulasombwa, wakwe vino Eva wasomvilwe ni nzoka ya usomvi. Ndi ni ntete zya kuti limwi mwemo mulata kwelenganya pamulandu wakwe Klistu mu musango usuma uwa cumi.

⁴ Pano umwi ndi wiza nu kukosola ilandwe lyuze lipusane ni landwe lya pali Klistu, nanti ndi mwapokelela mupasi muze apusine na Mupasi Wamuzilo, nanti ndi mwapokelela ilandwe lyuze lipusane ni Landwe Lisuma lino mwapokelile, ale lyene mukuyela landwe lilyo.

⁵ Nkwelenganya vino nemo ntacepa pali wenga uwa mu atumwa yano mwemo mukati yacindamisya.

⁶ Nemo ntange ndande ndi vino yene yakalanda, lelo manyile vingi. Nupya twalondolola ningo kuno muli.

⁷ Nemo ntamulifizye cimwi lino nakosozile Ilandwe Lisuma lyakwe Leza kuno muli. Naicefizye nemwisikulu kuti muye akulu. Uzye ale naponzile pakucita cii?

⁸ Cali ngati ukwiila mauvi yauze pa kuzumila kulipilwa nayo lino nkuombela mwemwe.

⁹ Pa nsita ino nali pamwi namwe nemo ntamuletile masakamiko akungazwa lino nalondanga mpiya. Aina itu yano afumile ku Makedoniya yaletanga vyonsi vino nulilwanga. Ndi vino cali mpiti nga nu mu manda akwiza, nemo ntalatala nje wa cisendo kuno muli!

¹⁰ Ndi vino cumi cakwe Klistu cili munondi, nkulanda vino, kusi muntu nanti umwi mu Akaya wino angandesya kuitumika pali cii.

¹¹ Uzye pacani cino nalandila vii? Uzye kuli kuti ntamutemwa? Leza wamanya kuti namutemwa.

¹² Namatwalilila kucita vino ncili cita na ndakai, pakuti yao akaitaka kuya atumwa yatakakwate nzila yakuti yaitumikamo kucita vintu vili vimwi na vino swemo tukucita.

¹³ Antu yao yasi atumwa acumi, yene atumwa ya ufi, yano akatumpoka pamulandu wa mulimo wao nupya yakaomvya usomvi kuti yaloleke wa atumwa yakwe Klistu.

¹⁴ Endi, tutangazunguka pali cii! Na Satana kwene akaezya kuomvya usomvi kuti aloleke wa mungeli wa luswepo.

¹⁵ Caleka citange ciloleke cipya aomvi yakwe Satana ndi yaomvya usomvi kuti yaloleke kwati yene aomvi ya wololoke. Mpelelekezyo yao ilalingana ni milimo yao.

Paulo Wacula pamulandu nu Utumwa Wakwe

¹⁶ Nkuswilizya kulanda ukuti muntu nanti umwi atalinzile kwelenganya ukuti nene mutumpe. Lelo ndi mwacita vivyo, ale cingazipa mumpokelele wa muntu mutumpe, pakuti ni ngaitumika panono sile.

¹⁷ Vino nkuvwanga asi vino Mwene angatemwa kuti mvwange, lelo mu vintu vino nkuitumika nkuvwanga wa muntu mutumpe.

¹⁸ Antu yauze ndi yangaitumika pali vino yacita, ale nani kwene.

¹⁹ Mwemo mweisikulu mwaya na mano cuze, acino mukazumilizya vipuwa!

²⁰ Mukazumilizya antu kuti yamucite uzya nu kumucenjezya nga nu kwiya kufuma kuno muli. Mukaleka kuti yamusule nga nu kumuma impi pa manso.

²¹ Ndi ni nsonyi pa kuzumila kuti swemo twali atonte pa kucita vintu vivyo. Lelo ndi yangaitumika, ale nani kwene ningacita, lelo kucita cico kuli kutumpa kwene.

²² Uzye yene Ayebulai? Nani kwene avino ndi. Uzye yene aina Izlaeli? Nani kwene avino ndi. Uzye yene amu mupanda wakwe Abulaamu? Nani kwene avino ndi.

²³ Uzye yene aomvi yakwe Klistu? Nemo nkuvwanga wakwe cipena, lelo nemo nene muomvi wino alusile yaya. Naombesya kuluta alio, nupya nayalilwe mu ng'anda ya minyololo maila aingi kuluta alio. Nanyambozilwe maila aingi kuluta alio nga lyonsi nali mu uzanzo wa kufwa.

²⁴ Maila yasano Ayuda yangumile vikoti makumi yatatu na fundimbali.

²⁵ Maila yatatu aina Loma yanyambozile nu mukota ukulu, nga iila lyonga anisi yane nao yantamile na mawe. Maila yatatu napuswike mu kuunda kwa mato muli yemba, nga iila lyonga nali pali yemba uwanda nu usiku upuma.

²⁶ Mukasi ka nyendo zyane zingi, nali mu uzanzo wakusambela kwa nguzi, nu wa vipondo, nu wa Ayuda nga na Akulukuwa. Umi wane wali mu uzanzo mukasi ka misumba ikulu, mu lwanga, pali yemba, nga na pakasi ka antu yano aitakanga ukuti aina Klistu lelo yatali vivyo.

²⁷ Naomvile nu kupikintika. Lingi napitanga kwaula kulala. Napisile ni nzala nu lusala, lingi nulilwe vyakulya, mwakwikala, nacuzile ku mpepo nu kusizya.

²⁸ Kulunda pali vii, cila wanda nkaya ni cisendo, nupya nasakamikwa cuze pamulandu wa mauvi onsi.

²⁹ Lino umwi ali nu utonte, nani kwene nkaya nao. Lino yamwi yaponela mu kwifya, nani nkauvwa ulanda.

³⁰ Ndi ningaitumika, ndinzile kuitumika pa vintu vino vikalanga utonte wane.

³¹ Leza Isi wa Mwene witu Yesu, alumbanyiwe manda pe. Nupya wene amanyile ukuti nsyakutumpoka!

³² Lino nali mu Damasiko, mulasi uwaliko mu manda yakwe Aleta kateeka, wisile yakalinda pa mpongolo zya musumba kuti yandeme.

³³ Lelo nongolwike lino yanjisizye muli kasalanga yamfumizya pa nzota ya lung'umba lwi linga.