2 Kolinto 10 - Amazwi Yakwe Leza 2013

¹ Ne Paulo, nkumupapata, ne muno antu yakati nene cantete lino ndi namwe, lelo mupame lino nsi namwe. Kupitila mu ufuke nga nu luse lwakwe Klistu nkumupapata

² kuti mutace mumpatikizye kuya na kasokonda kuno muli lino ndiza. Pano nati nsininkizya ukuti ningaya na kasokonda kuli yao akati swemo tukacita vintu mu mapange ndi muno amu nsi yakacitila.

³ Swemo tukaikala muno nsi, lelo tusyacita ndi vino antu amuno nsi yakacita

⁴ nanti kuomvya vyanzo vya muno nsi pa kulwa ulwi. Lelo mu cifulo cakwe cii, swemo tukaomvya maka yakwe Leza yano angonona malinga ya mwanisi. Swemo tukaonona kwelenganya kwa ntumpu

⁵ nga ni citutumusi cino cikalenga kuti muntu ali wensi atamanya Leza. Swemo tukaongola melenganyo ya antu nu kulenga kuti yayela Klistu.

⁶ Lyene lino mwamuyela cuze, naswe tulavunuka muntu ali wensi wino akakana kuyela.

⁷ Elenganyini ningo pa vintu vikuloleka paswe. Uzye kuku kungaya umwi wino waitaila ukuti wene uwakwe Klistu? Ndi avino cili, lekini wene aelenganye nupya pali aliwe umwisikulu, pano sweswe yakwe Klistu wakwe vino nawe kwene ali.

⁸ Manye nemo nati njitumika cuze pamulandu wa maka yano Mwene wampela akuti mwazwe kwaula kumucisa. Lelo ntakuzewana pamulandu wa kuitumika.

⁹ Nupya ntakumulembela makalata pakuti moofye.

¹⁰ Yamwi muno muli yakuti, “Makalata yakwe Paulo yaya na mazwi akome nupya a maka. Lelo lino ali pamwi naswe, pa manso itu, wene umutonte, nupya mazwi yakwe yasyasenula cimwi.”

¹¹ Muntu wa musango uu alinzile kumanya ukuti pasi ulekano pakasi ka mazwi yano tukalemba mu makalata itu lino tuli kutali nga na pali vino tulacita lino tuli pamwi namwe kuko.

¹² Tutange twezye kuilinganya nanti kuikolanya na antu akailola ukuti yalusile auze. Lelo lolini vino yatumpa pa kuilinganya nu kuikolanya aisikulu.

¹³ Swemo tutangaitumika kuluta pa cipimo. Lelo tumaikalilila mu cipimo ca mulimo uno Leza watutumile kwiza omba, kufika na kuno muli kwene.

¹⁴ Tusyakulusya pa cipimo, kwati limwi tutafisile kuno muli. Swemo twali ankolelo kwiza kuno muli ku kukosola Ilandwe Lisuma lya pali Klistu.

¹⁵ Swemo tusyaitumika pali vino yauze yacita, kwati limwi sweswe twacita vintu vivyo sweisikulu. Lelo tukupaalila ukuti utailo winu ungakulilako nga nu kuti swemo tulakwata maka akuomba mulimo ukulu cuze pakasi kinu, kulinga ni cipimo cino Leza wika.

¹⁶ Lyene tulakosola Ilandwe Lisuma mu mpanga zyuze mumo muno tutangalonda kutasiwa pa mulimo uno muntu umwi wacita mpiti.

¹⁷ Calembwa mu malembelo cati, “Wino wensi akulonda kuitumika, aitumika pali vino Mwene wacita.”

¹⁸ Pano asi muntu wino akaitasya umwisikulu angazumiliziwa, lelo suka wino Mwene watasya.