2 Kolinto 1 - Amazwi Yakwe Leza 2013

¹ Kalata kufuma kuli Paulo, mutumwa wakwe Klistu Yesu kupitila mu kulonda kwakwe Leza, pamwi na Timoti mwina witu. Kwi uvi lyakwe Leza lino lili mu Kolinto, nga nu ku antu yakwe Leza yonsi ali mu mpanga yonsi yamu Akaya.

² Leza Tata nu Mwene witu Yesu Klistu amupeele cikuku nu mutende.

Paulo wataizya Leza.

³ Lekini tutaizye Leza nupya Isi wakwe Yesu Klistu Mwene witu. Wene a Tata wa luse, Leza ali ntulo ya kutekeziwa konsi!

⁴ Wene akatwazwa mu ntazi zitu zyonsi, pakuti naswe tungaya na maka akwazwa antu yauze yano akweti intazi zya misango yonsi, tula tukuomvya kutekeziwa kuli kumwi kuno twapokelela kufuma kuli Leza.

⁵ Wakwe vino twakumako ku macuzi aingi yakwe Klistu, vivyo kwene tukakumako ku kutekeziwa kukulu kuno Leza akatupeela kupitila muli Klistu.

⁶ Ndi twacula, ala pamulandu wa kumwazwa kuti namwe mutuulwe. Ndi swemo twazwiwa, ala lyene namwe kwene mwazwiwa nga nu kupelwa maka akuposya nu kuteeka myenzo mu macuzi ali yamwi na yano naswe kwene twacuzile nu kuposya.

⁷ Caleka upaalilo witu muno muli usi uwasilesile. Twamanya ukuti wakwe vino mukakumako ku macuzi itu, vivyo kwene mukakumako nu ku wazwilizyo kwene uno Leza akatupeela.

⁸ Inane tukulonda kumwiusya pamulandu wa ntazi zino twakweti mu muputule wa mpanga ya Asia. Ucuzi ukulu cuze cakuti twasumvile nu upaalilo witu onsi uwakuya aumi.

⁹ Nupya twaisininkizye ukuti twali nu kufwa. Lelo cii cacitike kuti tutemelela muno tuli sweisikulu, lelo twemelele sile muli Leza, wino akaleka kuti afwe yazyukuke.

¹⁰ Wene watutuuzile ku mazanzo aipisye a mfwa, Leza alatutuula. Tukweti upaalilo munoli wakuti alatutuula nupya.

¹¹ Mwemo mwatwika mu mapepo. Leza alaasuka mapepo inu aingi yano mukutupepela, nupya wene alatupolelela. Lyene na antu aingi yalataizya Leza pa kutupolelela.

Paulo wasenula mapange yakwe aingi.

¹² Tungaitumika pano yakampingu itu yasininkizya kuno tuli ukuti umi witu muno nsi waya uwa cumi nupya uwaula ucenjezi, maka maka lino twali mu utandano namwe. Nupya twatungululwanga na maka acikuku cakwe Leza kuluta kutungululwa na mano ya untu.

¹³ Tukamulembela sile vino mungawelenga nu kuvwa. Nkupaalila vino mulatuvwikisya,

¹⁴ wakwe vino mwatuvwa sile mbali. Lyene lino Mwene Yesu alawela, mulaya ni cilumba pamulandu witu wakwe vino twaya ni cilumba pamulandu winu.

¹⁵ Nasininkizye cuze pa cilumba cino mwakwata muno tuli cakuti nakweti pange lya kumutandalila nkolelo yakwe vyonsi. Mu musango uu, amuno mungapolelelwa naswe maila yaili.

¹⁶ Pano nakweti pange lya kumutandalila pakuya ku Makedoniya nga na lino ndawela kweneko, pakuti nkize nkapokelele uwazwilizyo kufuma kuno muli pakuya ku Yudeya.

¹⁷ Pa kukwata pange lii uzye nemo nafutwike? Nanti uzye nkaloleka wa muntu umwi wino akati, “Ee” nanti “Awe” kuti azanzye sile antu yauze?

¹⁸ Leza angatailwa, nga nani kwene ningatailwa, lino nalanda ukuti kwasuka kwitu kuno muli lyonsi ukwakuti “Ee” lelo asi “Awe”.

¹⁹ Cii, cili vivyo pamulandu wakuti Yesu Klistu Mwana wakwe Leza wene lyonsi kwene waya a “Ee” nupya atatala waya a “Awe”. Wene ali wino Siluvano, Timoti, nga nani twamunenyile pali aliwe.

²⁰ Klistu akati, “Ee” ku malayo yakwe Leza onsi. Uli mulandu uno tukavwangila muli Klistu Yesu tuti “Ameni” apa kulumbanya Leza.

²¹ Caleka Leza akalenga mwemwe nani twimilile akomeleke muli Klistu. Leza aliwe kwene uwatusolwile

²² nu kwika Mupasi wakwe mu myenzo itu kuti alangilile vino sweswe akwakwe.

²³ Leza ali kambone uwamanya mwenzo wane vino pa kukana mucuzya acino ntizile ku Kolinto.

²⁴ Swemo tusi angalizi pa utailo winu akumunena vino mungataila. Tukuomba pamwi namwe kuti muye a nsansa, pano utailo winu ukome.