1 Yoane 5 - Amazwi Yakwe Leza 2013

Utailo ukatwazwa kucimvya vyamu nsi

¹ Wino wensi uwataila ukuti Yesu a Katuula Uwalavilwe wene umwana wakwe Leza. Na wino wensi uwatemwa mukwasi wene watemwa nu Mwana kwene.

² Muli cii twamanya ukuti twatemwa ana yakwe Leza, lino twatemwa Leza nu kuyela masunde yakwe.

³ Swemo tukalanga kutemwa kuno twatemwa Leza pa kuyela masunde yakwe. Na masunde yakwe angupale,

⁴ pano umwana wakwe Leza wensi angacimvya vyamu nsi. Nupya utailo uno twakwata auno ukatupela ucimvyo pa vintu vyamu nsi.

⁵ Uzye aweni angacimvya vintu vyamu nsi? Suka sile umuntu wino wataila ukuti Yesu ali Mwana wakwe Leza.

Yakambone akalanda vya pali Yesu

⁶ Wii ali wino wizile na manzi nu wazi, a Yesu Klistu kwene, nga atizile na manzi yatupu sile, lelo wizile na manzi nu wazi. Mupasi Wamuzilo umwisikulu akupeela umboni uwakuti cii icacumi, pano wene ali cumi.

⁷ Kwaya yakambone yatatu.

⁸ Mupasi Wamuzilo, amanzi nu wazi. Na yonsi yatatu yakapela umboni onga kwene.

⁹ Swemo tukataila umboni wa muntu. Lelo umboni wakwe Leza wene uwa maka kuluta, nupya Leza wapela umboni uu uwa Mwana wakwe.

¹⁰ Wino wensi uwataila Mwana wakwe Leza, wene wakwata umboni uu mu mwenzo wakwe. Lelo wino wensi asyataila Leza, ala wene akulanda ukuti Leza uwa ntumpu pano wene atataila vino Leza walanda vya pa Mwana wakwe.

¹¹ Umboni uu ukati Leza watupeela umi wape, nu umi uu uli mu Mwana wakwe.

¹² Wino wensi ali nu Mwana wene ali nu umi kwene uu. Wino wensi asi nu Mwana wakwe Leza wene asi nu umi.

Umi wape

¹³ Nkumulembela cii mwemuno mwataila mu Mwana wakwe Leza pakuti mumanye ukuti mwakwata umi wape.

¹⁴ Swemo tukaposya pa manso yakwe Leza, pano twasininkizya ukuti ndi twamulenga wene akatuvwa nu kutwasuka pali consi cino twalenga kulingana nu kulonda kwakwe.

¹⁵ Lyonsi lino twamulenga akatuvwa. Twamanya ukuti cii ica cumi. Nupya twamanya ukuti wene akatupeela vyonsi vino tukamulenga.

¹⁶ Ndi walola umunyonko akwifya, iifyo lino lisyatungulula ku mfwa, ulinzile kupepa kuli Leza, wino alamupeela umi. Cii cikumile yao yano maifyo yao yasyatungulula ku mfwa. Lelo kwaya iifyo lino likatungulula ku mfwa, nga nani nsyakuti mulinzile kupepa kuli Leza pi iifyo lilyo.

¹⁷ Kuluvyanya konsi ukwifya. Lelo kwaya iifyo lino ilisyatungulula ku mfwa.

¹⁸ Twamanya ukuti kusi umwi uwamu ana yakwe Leza wino angatwalilila kwifya, pano Yesu Mwana wakwe Leza akamusunga. Mwipe wilya atanga yacitila iciipe.

¹⁹ Twamanya ukuti sweswe yakwe Leza nanti angala insi yonsi ili pisika lya utesi wa Mwipe wilya.

²⁰ Twamanya ukuti Mwana wakwe Leza wiza nupya uwalenga kuti tumanye Leza wa cumi. Swemo tukaikala muli Leza wa cumi, na muli Yesu Klistu Mwana wakwe. Wene ali Leza wa cumi nupya aliwe akatupeela umi wape.

²¹ Mwe ana yane, mwaisunga ningo mutapepa tuluwi.