1 Yoane 3 - Amazwi Yakwe Leza 2013

¹ Elenganyini vino Tata watutemwa! Kutemwa kwakwe ukukulu cuze cakuti swemo twaamwa ana yakwe. Nu mu cumi avino tuli. Uu uli mulandu uno amu nsi yatatumanya, pano yene yatamanya Leza.

² Mwe yacuza yane, ndakai sweswe ana yakwe Leza. Citamanyike vino tulaya. Lelo twamanya ukuti lino Klistu alaloleka, swemo tulakolana nawe, pano tulamulola ndi vino waya.

³ Muntu ali wensi wino uwakwata upaalilo uu muli Klistu, ala wene akaikala mu muzilo ndi vino Klistu wikala.

⁴ Wino wensi akaifya wene ali nu mulandu wakuvuna masunde yakwe Leza, pano ukwifya kuli kuvuna masunde.

⁵ Mwamanya ukuti Klistu walolike kuti asende maifyo, nu kuti munoli mutaya iifyo.

⁶ Acino umuntu ali wensi wino akaikala muli Klistu wene asyaifya. Muntu ali wensi wino akaifya wene atatala wamulola nanti kumumanya.

⁷ Mwe ana yane, mutaleka umwi amusombe. Wino wensi akacita vyaololoke, wene waya umololoke ndi vino Klistu ali.

⁸ Wino wensi akatwalilila kwifya wene uwakwe Ciwa. Pano Ciwa wifizye kufuma ku utandiko kwene. Mwana wakwe Leza walolike pamulandu kwene uu, kuti aonone vino Ciwa wacita.

⁹ Kusi umwi uwamu ana yakwe Leza akatwalilila kwifya, pano mwata wakwe Leza waya muli aliwe. Leza ali Isi, acino umuntu wiyo atangatwalilila kwifya.

¹⁰ Uu uli upusano apaswe, uwaya pakasi ka ana yakwe Leza nga na ana yakwe Ciwa. Muntu wensi asyacita visuma nanti kutemwa mwina wakwe wene asi mwana wakwe Leza.

Mwatemwana

¹¹ Landwe lino muvwile kufuma ku utandiko likati mulinzile kutemwana.

¹² Tutalinzile kukolana na Kaini. Wene wali kumbali ya Mui, nupya wakomile Abeli mwina wakwe. Uzye pacani cino Kaini wamukomile? Apamulandu wakuti milimo yakwe Kaini yali iipe. Lelo milimo ya mwina wakwe yali iisuma.

¹³ Acino inane, mutazunguka ndi antu amu nsi ii yamupata.

¹⁴ Twamanya ukuti kutemwana kwitu kukasininkizya vino twafuma mu mfwa nu kuya mu umi. Wino wensi asyatemwa antu yauze wene acili mu mfwa.

¹⁵ Wino wensi uwapata umwina wakwe wene inkomi. Mwamanya ukuti inkomi yene itakwata umi wape mu mwenzo wakweyo.

¹⁶ Twamanya vino kutemwa kwaya pano Klistu wapile umi wakwe pamulandu witu. Uli mulandu uno naswe kwene tulinzile kupeela umi witu pamulandu wa antu yauze.

¹⁷ Muntu ndi akweti cuma nupya walola mwina wakwe wataulilwa, lelo wakomya umwenzo nu kuntazwa mwina wakwe, uzye wene angavwanga uli ukuti watemwa Leza?

¹⁸ Mwe ana yane mwe, kutemwa kwitu kutaya sile mukulanda. Kwene kulinzile kuya ukwa cumi nupya kwaloleka mu milimo.

Kuposya pa manso yakwe Leza

¹⁹ Lyene vii avino tulamanya ukuti swemo tuli kumbali ya cumi. Nupya tulikala ateke myenzo pa manso yakwe Leza.

²⁰ Yakampingu itu ndi yatuvunuka, twamanya ukuti Leza wene umukulu kuluta yakampingu itu. Wene wamanya vintu vyonsi.

²¹ Acino mwe yacuza akundwe, yakampingu itu ndi yasyakutuvunuka, lyene tulaya aposye pa manso yakwe Leza.

²² Wene akatupeela cili consi cino tukalenga, pano tukayela masunde yakwe nu kucita vintu vino vikamuzanzya.

²³ Ilamulo lino watupeela ilyakuti tutaile mu Mwana wakwe Yesu Klistu nga nu kutemwana ndi vino Klistu watupile ilamulo.

²⁴ Wino wensi akayela malamulo yakwe Leza wene wikala munoli, na Leza nawe wikala muli aliwe. Nupya twamanya ukuti Mupasi Wamuzilo wino watupeela wene ali cisininkizyo cakuti Leza wikala munotuli.