1 Yoane 2 - Amazwi Yakwe Leza 2013

Klistu ali kazwa witu

¹ Mwe ana yane, nkumulembela cii pakuti mutaifya. Lelo ndi umwi wifya, tukweti kaazwa akatuvwangila kuli Tata, ali Yesu Klistu umololoke.

² Klistu ali mpolelwa yapa maifyo itu, nga na maifyo ya antu yonsi amu nsi.

³ Ndi tukayela masunde yakwe Leza, ale lyene tukusininkizya vino twamumanya.

⁴ Umwi ndi wavwanga ukuti wamumanya, lelo asyayela masunde yakwe, ala wene uwa ntumpu ni cumi citaya munoli.

⁵ Lelo mu cumi wino wensi akayela mazwi yakwe, wiyo kwene awino kutemwa kuno watemwa Leza kwaya ukufumaluke. Vii, avino swemo tungasininkizya ukuti tuli muli Leza.

⁶ Wino wensi akalanda ukuti wikala muli Leza wene alinzile kucita vino Klistu wacitanga.

Isunde Lipya

⁷ Mwe yacuza yane akundwe, ntakumulembela isunde lipya. Lelo nkumulembela isunde lyampiti lino mwapilwe pa kutandika. Isunde lyampiti amazwi yano muvwa mpiti.

⁸ Lelo isunde lino nkumulembela ndakai, lyene ilipya, pamulandu wakuti cumi caliko cikaloleka muli Klistu nga na munomuli. Pano mwati mulola ukuti mfinzi ikupita, nga nu luswepo lwa cumi nalo lwati lutandika mpiti kuyengesa.

⁹ Wino wensi akalanda ukuti wene ali mu luswepo lelo wapata umwina wakwe, wene ali mu mfinzi na pa nsita kwene ii.

¹⁰ Wino wensi akatemwa umwina wakwe wene ali mu luswepo, nupya munoli musi cimwi icingalenga umuntu umwi kwifya.

¹¹ Lelo wino wensi uwapata umwina wakwe wene ali mu mfinzi. Wene akapita mu mfinzi nupya atamanya kuno akuya, pano mfinzi yamupafuzya.

¹² Mwe ana yane, nkumulembela pamulandu wakuti maifyo inu yelelwa mwi zina lyakwe Klistu.

¹³ Mwe yaisi, namwe nkumulembela pamulandu wakuti mwamanya wino uwayako kufuma ku utandiko. Mwe yalumendo nkumulembela pamulandu wakuti mwacimvya Mwipe wilya.

¹⁴ Mwe ana, nkumulembela pamulandu wakuti mwamanya Tata. Mwe yaisi, nkumulembela pano mwamanya wino uwayako kufuma ku utandiko. Mwe yalumendo, nkumulembela pamulandu wakuti mwakoma. Mazwi yakwe Leza yakomeleka munomuli, nupya mwacimvya Mwipe wilya.

¹⁵ Mutatemwa insi nanti cintu cili consi icamu nsi. Umwi ndi watemwa insi, ale atatemwa Tata.

¹⁶ Pano vintu vyonsi vyamu nsi, kutandika pa vilondwa viipe vino mili ikalonda, ni vintu vya lunkumbwa lwa manso nu kuitumika ku vyamu nsi, vyonsi vii visyafuma kuli Tata, lelo ku wikalo uwipe uwamu nsi.

¹⁷ Caleka insi ii ya pansi ikupita, pamwi nu lunkumbwa ululi mwenemo. Lelo umuntu wino akacita kulonda kwakwe Leza akaikalilila manda pe.

Mwanisi wakwe Klistu

¹⁸ Mwe ana yane impela ili pipi! Mwanenyilwe ukuti mwanisi wakwe Klistu aliza. Ndakai anisi aingi yakwe Klistu yaloleka mpiti. Acino twati tumanya vino impela ili pipi.

¹⁹ Cumi kwene antu yaa yatali mu utandano naswe. Uli mulandu uno yatusile. Ndi yali mu utandano naswe yene yange yaye pamwi naswe. Lelo yene yatusile pakuti cimanyike ukuti munoyali pasi nanti wenga wino mu cumi ali mu utandano naswe.

²⁰ Lelo Klistu wene wamupolelile pakumupongolwela Mupasi Wamuzilo. Acino mwensi kwene mwamanya icumi.

²¹ Nemo nkumulembela asi pamulandu wakuti mutamanya icumi. Lelo mwacimanya nupya mwamanya ukuti ufi usifuma ku cumi

²² Uzye lyene aweni uwa ntumpu? Uwa ntumpu umuntu ali wensi wino akati Yesu asi Katuula uwalavilwe. Uwakana Tata nu Mwana, wene ali mwanisi wakwe Klistu.

²³ Pano wino wensi uwakana Mwana ala wene wakana na Tata kwene. Wino wensi uwazumila Mwana ala wene wazumila na Tata kwene.

²⁴ Lyene namwe lekini ilandwe lino muvwile kufuma ku utandiko likalilile mu myenzo inu. Vino muvwile kufuma ku utandiko ndi vikalilila mu myenzo inu namwe lyonsi kwene mulikala mu Mwana na muli Tata.

²⁵ Klistu umwisikulu nawe watulaya kutupela umi wape.

²⁶ Nkumulembela ukumusoka pali yao akwezya ukumusomba.

²⁷ Lelo mwemo Klistu wamupolelela pa kumupongolwela Mupasi wakwe wikala munomuli, nupya citakulondekwa ukuti umuntu umwi amusambilizya. Mupasi Wamuzilo aliwe akamusambilizya vyonsi. Vino akamusambilizya ivya cumi visi vyaufi. Caleka mulinzile kuyela usambilizyo wakwe Mupasi Wamuzilo nga nu kwikalilila mu utandano na Klistu.

²⁸ Endi, mwe ana mwe ikalini mu utandano na aliwe, pakuti lino alaloleka swemo tuce tupame kwaula kuya ni nsonyi pa Wanda wa kwiza kwakwe nupya.

²⁹ Ndi mwamanya ukuti Klistu akacita vyaololoke, lyene mutatwisika ukuti umuntu akacita vyaololoke umwana wakwe Leza.