1 Yamwene 9 - Amazwi Yakwe Leza 2013

Yawe waloleka nupya kuli Solomoni

¹ Lino Solomoni wamala ku kuula Ng'anda ikulu yakwe Yawe nga ni sano, nga na vyonsi vino wakasi ku kuula,

² Yawe aloleka kunoli iila lyakwe ciili, wakwe vino walolike kunoli ku Gibyoni kuku.

³ Alino Yawe amunena ati, “Natinuvwa ipepo lyako nga nu kupapata kwako kuno wacita pa manso yane. Nemo natimpaatula Ing'anda ii ino watukuula, nu kwikamo izina lyane pakuti antu yampepa mwenemo amanda pe. Namawakanga nu kucingilila Ng'anda iyo insita zyonsi.

⁴ Ndi cakuti umantumikilanga umu cumi na muli ukaele ndi vino so Davidi wacitanga, umayela na malamulo yane ni vyeo nga na masunde yane,

⁵ lyene ale ndaleka icilimba ca wene wako ciyelelele mu Izlaeli wakwe muno nalavile so inti, ‘Utalatala uulizye umuntu wako pa cilimba ca wene uwamu Izlaeli.’

⁶ Lelo ndi wewe na amu mupanda wako mwaca mwansangukila, mwakana nu kuyela amalamulo ni vipope vino namupeela nu kuya ku kutumikila tuleza tuze nu kutupepa,

⁷ lyene ndasukula aina Izlaeli mu mpanga ino nayapeela. Ndafuma nu mu Ng'anda ikulu kwene ii ino natimpolelela ukuya iya kumpepelamo. Alino na antu mpanga yonsi yalamusuula mwemwe mwe ina Izlaeli. Yalamulola azewane.

⁸ Na pa Ng'anda kwene ii palasyala itongwa, kwati pataizipiile. Nu muntu wensi uwafika penepo alauzya ati, ‘Uzye pacani cino Yawe wacitila icintu camusango uu ku mpanga ii nu ku Ng'anda kwene ii?’

⁹ Antu nayo yalaasuka yati, ‘Umulandu wakuti aina Izlaeli yasuzile Yawe Leza wao uwafumizye ivikolwe vyao mu mpanga ya Eguputo. Yalanga yasumba amano kuli tuleza twao utuluwi, atuno yapepanga nu kutucindikisya. Icati cilenga kuti nawe Yawe ayaletele isyamo lii.’ ”

Solomoni yapangana na Hilamu

¹⁰ Apa kukuula Ng'anda ikulu yakwe Yawe nga ni sano lyakwe, casendile Solomoni imyaka amakumi yaili.

¹¹ Hilamu umwene waku Tuli aliwe watwalile umwene Solomoni imikelide ni milando yakwe paini nga na zaabu wensi uwalondekwanga ku mulimo uu. Lino umulimo wasila, umwene Solomoni apeela Hilamu imisumba amakumi yaili yamu Galile.

¹² Lino Hilamu wawezile ukufuma ku Tuli kuti akalole imisumba ino Solomoni wamupile vino ili, itamuzanzizye foo.

¹³ Alino auzya Solomoni ati, “Mwinane, uzye icumi fwandi ii ili misumba ino ungampeela?” Pamulandu wakwe cico, incende ilya ikaamwa ukuti mpanga ya Kabulu ukufika na pilelo kwene.

¹⁴ Hilamu lilyo ala watumila Solomoni zaabu anganyoma pipi na matani 5000.

Ivintu navyuze vino Solomoni watukwite

¹⁵ Vii avino umwene Solomoni wacisile: wene wakuulizye antu kuti yaombe umulimo wa kukuula Ng'anda ikulu yakwe Yawe nga ni sano lyakwe, nu mwimbwe uwakucinga ku ufumondaka wa musumba, alino nu kukuula ilinga ukuzinguluka imisumba ii: Yelusalemu, Hazoli, Megido nga nu wa Gezeli.

¹⁶ (Falao umwene waku Eguputo walanga wazanza umusumba wa Gezeli, aupoka, akomola aikazi ya mwenemo, nga atumula umoto mpaka iupya. Alino aupela wa wila wapa winga ku mwana kaci, wino isi a Solomoni kwene wii.

¹⁷ Ali cino Solomoni wakuululwile umusumba uwo wa Gezeli.) Akuula ni misumba ii: Beti Holoni,

¹⁸ Baalati, Tadimoli mu lwanga, mu mpanga yakwe Yuda,

¹⁹ nga ni misumba yonsi yakusungilamo icuma cakwe na maceleta yakwe, ni misumba ya antu akwelanga pa mfwalasi, na vyonsi vino walondanga ku kuula mu Yelusalemu, mu Lebanoni ni mpanga yonsi muno wateekanga.

²⁰ Lelo kwali antu yamwi asiile amu mitundu ipusanepusane ali ndi yaa: aina Amoli, aina Hiti, aina Pelizi, aina Hivi, na ina Yebusi. Antu yaa yatali aina Izlaeli,

²¹ kuli kuti amu mupanda wao asiile mu mpanga ilya, yano aina Izlaeli yaposiwe kulovya. Antu kwene yaa ali yano Solomoni ayacita azya akuombela umulaza ukufika na pilelo kwene.

²² Lelo apa ina Izlaeli patali yano Solomoni wacisile azya foo. Yene wayacisile ivita vyakwe, yakalinda yakwe, aomvi yakwe, yamusika akalamba ya vita vyakwe, na yamusika ya maceleta na yao akwelanga mwenemo.

²³ Fwandi kwali yakangalila ya milimo ipusanepusane yakwe Solomoni, akwangalila imilimo ya makuule apusanepusane. Yayo yonsi pamwi yali 550 nga ala yakwangalila antu aombanga.

²⁴ Pa nsita kwene ilya umwana umwanaci wakwe Falao walanga ataiza ukufuma ku musumba wakwe Davidi nga aya kwi sano lino Solomoni wamukuulile. Alino Solomoni atandika kukuula ilinga lya Milo ilyayelile ku ufumondaka wa musumba.

²⁵ Amaila yatatu pa mwaka ali yano Solomoni wapeelanga amawila yakoca na mawila ya utandano pa kavuwa kano wakuulile Yawe. Ocanga nu ubani kwene pa kavuwa kako pa manso yakwe Yawe. Fwandi ali vino wamalilile umulimo wakukuula Ng'anda ikulu yakwe Yawe.

²⁶ Umwene Solomoni wapanzile ni vyombo ku Ezioni Gebeli, pipi nu ku Eloti, mu nkumba yakwe Yemba Muyenzu, umu mpanga ya Edomu.

²⁷ Alino umwene Hilamu atuma ivyombo vyakwe pamwi na aomvi yaviko, yano yamanyikisye incito ya pa luzi, akuti yakaomba na antu yakwe Solomoni.

²⁸ Nayo apali pakuya ku Ofili, nga yaya yasenda zaabu anganyoma ukulingana na makilogalamu 14,000, yaletela umwene Solomoni.