1 Yamwene 8 - Amazwi Yakwe Leza 2013

Yaleta Mbokosi ya Upangano ku Ng'anda ikulu yakwe Yawe

¹ Lyene Mwene Solomoni akonganika mu Yelusalemu aikolo amu Izlaeli, intunguluzi zyonsi zya mitundu nga ni nko zya ina Izlaeli, pakuti zisende Mbokosi ya Upangano yakwe Yawe ukufuma ku Zioni, umusumba wakwe Davidi nga ziilete ku Ng'anda ikulu yakwe Yawe.

² Alino aina Izlaeli yonsi iyakongana kuli Solomoni apa nsita ya kuzevya Cimulo ca Nsakwe mu mwezi wa Etanimu, umwezi walenga cinimbali.

³ Walanga lino intunguluzi zyonsi zyamu Izlaeli zyakongana, alino yasimapepo yakatusya Mbokosi ya Upangano.

⁴ Iyasenda kumwi ni Taalu lya Ukongano ni viya vyamuzilo vino vyali mwenemo. Yasimapepo pamwi na ina Levi ayano yavisenda.

⁵ Umwene Solomoni pamwi na ina Izlaeli yonsi akongine pamwi na aliwe, yimilila inkolelo ya Mbokosi ya Upangano, ala yakupeela impolelwa izingi zya mfwele ni ng'ombe, ivitanga vipendwe foo.

⁶ Lyene yasimapepo yasenda Mbokosi ya Upangano nu kuingizya mu Ng'anda ikulu yakwe Leza. Yaya yaiteka apa Ncende Yamuzilo kuluta umwisika ya mapa yakwe yakelubi.

⁷ Amapa yakwe yakelubi yano yaanzilwe, ayano yavimba Mbokosi kumwi ni mitembo ino yaisendile penepo.

⁸ Imitembo nayo yali itali sana cakuti visinte vyakweyo vyalolekanga sile lwa pansi ya muputule wa Ncende Yamuzilo, ndi cakuti wimilila ukulolenkanya Mbokosi iyo apakasi ka ng'anda, lelo nguli kutali awe. Ukufika na pilelo imitembo iyo apano icili.

⁹ Mukasi ka Mbokosi ya Upangano mutali nanti cimwi ukuluta pa vipampa vya mawe viili vino Mose wisile mwenemo, ukufuma ku Mwamba wa Holebu, kuko kuno Yawe wapangine upangano na ina Izlaeli lino yafumile mu Eguputo.

¹⁰ Lino yasimapepo yafumile mu Ncende Yamuzilo kuluta, ikumbi nalyo lizula mu Ng'anda ikulu yakwe Yawe.

¹¹ Yasimapepo yaposiwa kuswilila mwenemo ku kuyaomba incito zyao, pamulandu wakuti lulumbi lwakwe Yawe lwaziile mu Ng'anda ikulu ilya iyakwakwe.

¹² Solomoni pali pakutandika ukupepa ati, “Uwi we Yawe! Awewe wika ilanzi mu lwelele. Lelo wasolola ukwikala umwi kumbi lifite fititi.

¹³ Nga lelo anene nakukuulila ng'anda ikulu yalulumbi, umwakuti waikala pe na pe.”

Solomoni walanda ku antu yakwe

¹⁴ Lino iuvi lyonsi lya ina Izlaeli liciimi, alino Solomoni asenuka, alozya amanso ukuli iumba nu kuyapolelela.

¹⁵ Umu upolelelo wakwe avwanga ati, “Alumbanyiwe Yawe, Leza wa ina Izlaeli! Aliwe wafikilizya ulayo uno walavile tata Davidi, lino wamunenyile ati,

¹⁶ ‘Ukutandika sile lino ne Yawe nafumizye antu yane, aina Izlaeli mu Eguputo, ntatala nasolola umusumba uwa kukuula mwenemo Ng'anda ikulu ya kumpepela mwenemo. Lelo nakusolola wewe Davidi kuti wateeka nu kutungulula antu yane aina Izlaeli.’ ”

¹⁷ Solomoni atwalilila ukuvwanga ati, “Tata Davidi walondanga kukuula Ng'anda ikulu ya kupepela mwenemo Yawe, Leza wa ina Izlaeli.

¹⁸ Nga lelo Yawe umweneco uwanenyile Davidi icikolwe cane ati, ‘Pamulandu wakuti wisile amano ku kunkuulila Ng'anda ikulu muno mulauvwika izina lyane, ala wacita icintu icisuma pa kucita cico.

¹⁹ Lelo asi wewe Davidi wemuno ulankuulila Ng'anda ikulu ya kupepela mwenemo. Ala umwanako wino waivyalila, umwanako kololo, awino alankuulila Ng'anda ikulu muno mulauvwika izina lyane.’

²⁰ “Ali cino fwandi lyene Yawe watafikilizya ulayo wakwe. Pasi pano nene napyana Davidi, kuti nateeka aina Izlaeli ndi muno walavile, nga natinkuulila Yawe Ng'anda ikulu, Leza wa ina Izlaeli, umwakuti izina lyakwe lyauvwika.

²¹ Alino nupya mu Ng'anda ikulu iyo, ali muno natinika ni Mbokosi ya Upangano muno muli na mawe yaili apapatale, amawe ya upangano uno Yawe yapangine ni vikolwe vitu, lino wavifumizye mu mpanga ya Eguputo.”

Ipepo lyakwe Solomoni

²² Solomoni pali pakuya imilila inkolelo ya kavuwa kakwe Yawe ala na antu yonsi yakumulola. Alino akatusya amakasa mupela,

²³ nga apepa ati, “Iye, we Yawe, Leza wa ina Izlaeli, kutaya Leza akoline nawe pano pansi nu mwiyulu nanti pansi ya nsi! Wemo ukaiusya nu kusunga upangano wako na antu yako, nu kuyalanga ukutemwa ukwamuntaputuka, ndi yakucita ukulonda kwako.

²⁴ Utaweni vino wasunga ulayo uno walavile Davidi tata umuomvi wako, cino wafikilizya umwi lelo.

²⁵ Nga lelo we Yawe, Leza wa ina Izlaeli, nakupapata walukusunga amalayo yako yano walavile tata Davidi, uti, ‘Lyonsi sile ana yako aliyo yalaya aene amu Izlaeli. Cikulu sile yalondela ivisuma ndi vino wemo ukacita pa manso yane.’

²⁶ Ali cino ndakai, we Leza wa ina Izlaeli, sungala ufikilizye ulayo uno walavile tata Davidi, umuomvi wako.

²⁷ “Uzye we Leza wewe ungikala na antu pa mpanga ya pano nsi? Nga vino iyulu ilitaikulila litange likukumane foo. Ale fwandi, uzye ing'anda ino ninkuula ali ino ingakukumana?

²⁸ We Yawe, Leza wane, ala nene muomvi wako sile. Uvwa fwandi vino nkukupapata na vino nkukupepa. Uvwa impoma yane ni pepo lyane lino nkupepa kunuli ilelo.

²⁹ Uwalu kusumba amanso apa ng'anda ino ya kukupepela mwenemo usiku nu musanya, umu ncende ino twatitusolola ukuti twakupepela mwenemo. Sungala unguvwe likwene lino nkukupepa mu ng'anda yako.

³⁰ Uwauvwa amapepo yane na ya antu yako aina Izlaeli lino tumaizanga muno umu kukupepa. Uwatuvwa ukwako kuko kuno wikala kwiyulu. Uwatwelela amaifyo itu.

³¹ “Ndi cakuti umuntu umwi yamupeela umulandu uwa kwifya ku muze, alino yamuleta ku kavuwa kako aka mu Ng'anda ino ikulu, apakuti azenzuke asyale uwakaele,

³² we Yawe kuko kuno waya kwiyulu, uwauvwa nupya uwapingula aomvi yako. Umuntu mwipe wene uwamupezya ku anisi yakwe, lelo uwakaele wene uwamutungulula.

³³ “Antu yako aina Izlaeli ndi yayacimvya ku anisi yao, pamulandu wakuti wemo yakuluvyanya, lelo ndi cakuti yaweluluka kunuli, yatandika nu kukuwanzya, nu mu ng'anda ino yiza ingila, yamapapata pakuti uyayele uluse,

³⁴ wemo uwayuvwa kuko kuno wikala kwiyulu. Antu yako fwandi uwayayela uluse pa maifyo yao yano yacita. Uwayaswilizya nu mu mpanga ino wapile ivikolwe vyao.

³⁵ “Antu yako ndi cakuti yakuluvyanya, alino nawe apakuyakalipila walesya imvula kuti itatonya, alino lyene nupya ndi yazenzuka ala yatiyalozya na manso ku Ng'anda yako ikulu, yakukupepa nu kukuwanzya yakukuwanzya,

³⁶ wemo ulinzile wayuvwa kuko kuno wikala ukwako kwiyulu. Uwayelela aomvi yako uluse, aina Izlaeli. Uwayasambilizya ukucita ivintu visuma, uwaleka ni mvula ukutonya pa mpanga ino we mweneco watupile, swe antu yako yano waisolwela, kuti ingaya icaupyanyi citu.

³⁷ “Ndi cakuti cipowe nanti impungo yatuponela, limwi ivyakulya vyononeka ku cilala nanti umuza wakukonkotanika amafwa, nanti vyavuvuma, nanti vyaliwa ku tuzizi nanti makanta, nanti antu yako yayazanza ku anisi yao, nanti yaponelwa nu ulwale umwi uwa musango uli onsi,

³⁸ wemo uwauvwa amapepo yao nu kuyazwa. Ndi cakuti umuntu wako umwi umwina Izlaeli wazenzuka nu mwenzo wakwe onsi, icakuti pakupepa wakatusya amakasa yakwe umupela, walozya uku Ng'anda ikulu ii,

³⁹ wemo uwamuvwa uku mapepo yakwe. Uwamukutika kwiyulu ukwako kuko kuno wikala. Uwamuyelela uluse nu kumutuula wamutuula. Awewe wenga sile wewe wamanya vino antu yakaelenganya mu myenzo yao. Umuntu wensi uwamulambula kulingana navino akacita,

⁴⁰ pakuti antu yako we mweneco yakukwatila icoopo, pa manda yonsi yano yalikala mu mpanga ino wapile ivikolwe vitu.

⁴¹ “Mwinamasi asi wa kazi ka antu yako aina Izlaeli ndi cakuti wafuma ukutali nu kwiza kuno, pamulandu wi zina lyako,

⁴² apamulandu wakuti antu avule yaluvwa ukucindama kwi zina lyako, na maka yako asuma, alino fwandi ndi cakuti wiza wapepa mu Ng'anda ii ikulu,

⁴³ uli nu kuvwa kuko ukwako kwiyulu. Upeele nu mwinamasi wensi cino akulenga, pakuti imitundu yonsi ya pano nsi ice ikamanye izina lyako nu kukoopa, ndi vino antu yako aina Izlaeli yakacita. Lyene nu kumanya ali kwene pano yalasininkizya ukuti Ng'anda ii ikulu, ino nakuula ali ncende ino tulinzile twakupepela mwenemo.

⁴⁴ “Antu yako ndi yakatusya lulu uwakuyalwisya anisi yao, yatala yapepa kunuli we Yawe ukuli konsi kuno yali, ndi cakuti yatiyalozya amanso ku musumba uno wasolola ukuli Ng'anda ii ikulu, ino nakuula pakucindamika izina lyako,

⁴⁵ lyene uvwa ukwako kuko kwiyulu, ukupapata nu kupepa kwao, nu kuyatuula uyatuule.

⁴⁶ “Ndi cakuti yiifya kunuli, pano kutaya umuntu nanti wenga wino asitala aifya, nga alino nawe wayasokela nu kuyatazyela, nga na anisi yao yayacimvya yayasenda nu ku uzya ku mpanga yuze, nanti kungala kutalimpe uli,

⁴⁷ wemo wauvwa amapepo ya antu yako. Ku mpanga kwene iyo kuno yaya, ndi cakuti yazenzuka yatandika nu kupepa, yailongwela na maifyo yao na vyonsi vino yakuluvyanyizye, we Yawe uvwa mapepo yao.

⁴⁸ Mu mpanga kwene iyo muno yali, ndi cakuti yazenzuka umu cumi cumi yatandika nu kukupepa ala iyasenukila nu ku mpanga ii, ino wapile antu yako, na manso yalozizye ku musumba uno we mweneco wasolola, nu ku Ng'anda ikulu ino nakukuulila,

⁴⁹ lyene wemo uli nu kuvwa amapepo yao. Uwauvwa kuko ukwako ukwiyulu, nu luse uwayayela.

⁵⁰ Uwayela antu uluse pa maifyo yao yonsi nu kusuula utalami wao onsi, nu kuleka kuti anisi yao yonsi yayatemwe nu kuyasakamala.

⁵¹ Pano yao kwene ali antu yako, yano wafumizye mu Eguputo muno mwali kwati umwi lungu lya moto.

⁵² “We Yawe uwakwatila lyonsi aina Izlaeli uluse, pali pamwi nani kwene ne muomvi wako Solomoni, lilyo lyonsi lino twalila twati tutuulwe!

⁵³ Wemo awewe watusolola pa mitundu yonsi pakuti tuye antu yako, sweswe sile, ndi muno watunenyile kupitila muli Mose umuomvi wako, lino we Yawe Simwandalali wafumizye ivikolwe vitu mu mpanga ya Eguputo.”

Ipepo lyakusyalikizya lyakwe Solomoni

⁵⁴ Lino Solomoni wamalila kupepa kuli Yawe, akatuka nga aimilila pa nkolelo ya kavuwa, pano walafukime, ala atumpwile na makasa umwiyulu.

⁵⁵ Alino aimilila nga akatusya izwi apolelela aina Izlaeli yonsi akongine, ati,

⁵⁶ “Lumbanyini Yawe, wiyo uwapile antu yakwe aina Izlaeli ukwikala ku matwi cele ndi muno we mweneco walavile. Awewe wasunga ulayo wako onsi utaizipila, vino walavile umuomvi wako Mose.

⁵⁷ We Yawe Leza witu sungala walukuya naswe, wakwe vino wayanga ni vikolwe vitu. Cingazipa ukuti utatutazyela nanti ukutufutatila.

⁵⁸ Nupya uleke ukuti twakutontela, apakuti twaikala ndi muno wemwisikulu ukalondela, twasunga na masunde yako yonsi ni vyeo vyako vino wapile ivikolwe vitu.

⁵⁹ Si angala we Yawe Leza witu waiusya ipepo lii cila nsita, pamwi ni vintu vyonsi vino nakulenga. Waelela aina Izlaeli uluse pee, kumwi nani kwene ne muomvi wako, ukulingana na vino tumalondanga amanda yonsi.

⁶⁰ Ali pakuti antu amu mitundu yuze, iyaya pano nsi, yakamanye ukuti we Yawe wewe uli Leza nu kuti kutaya namuze foo.

⁶¹ Naswe swe antu yako twakukwatila icumi we Yawe Leza witu. Twalondela na masunde yako yonsi, wakwe vikwene vino twacita umwi lelo.”

Yapeela impolelwa zyakupaatwila Yawe Ng'anda yakwe ikulu

⁶² Umwene Solomoni na antu yonsi yakongana ku kupeela impolelwa kuli Yawe.

⁶³ Solomoni wapeezile impolelwa ya mawila ya utandano kuli Yawe, apa kufyula ing'ombe 22,000 nga ni mfwele ni mbuzi 120,000. Ali vino fwandi antu pamwi nu mwene yapeela impolelwa nu kupaatwila Yawe Ng'anda yakwe ikulu.

⁶⁴ Uwanda kwene uo, ali uno Solomoni apaatwila kuli Yawe incende iyali apa musolo pakasi, kuti iye iya kupeelelapo amawila yakoca, amawila ya mbezu nga na mafuta ya mawila ya utandano. Wene wacisile vivyo pamulandu wakuti kavuwa ka mukuwa kali akanono kano yatange yapeelelepo kuli Yawe amawila Yaa yonsi.

⁶⁵ Kuku kwene, uku Ng'anda ikulu yakwe Yawe, ali kuno Solomoni na antu yonsi aina Izlaeli aizile ukufuma ku mupunda waku Lebo Hamati ukuyafika nu ku luzi lwa Eguputo, yazevizye Cimulo ca Nsakwe pa manso yakwe Yawe apa manda cinimbali.

⁶⁶ Alino uwanda wakwe cinani, Solomoni asalanganya antu kuti yaye kumwao. Yonsi pyu apakupita yataizya Solomoni wakwe cimwi nu kupita yapita nu luzango ulukalamba sana apamulandu ni vintu ivisuma vitupu vino Yawe wacitile umuomvi wakwe Davidi pamwi na antu yakwe aina Izlaeli.